ଭୁବନେଶ୍ୱର,୦୪/୦୨: ଆସନ୍ତା ୬ ତାରିଖରେ ଓଡ଼ିଶା ପହଞ୍ଚିବେ ରାହୁଲ ଗାନ୍ଧୀ । ଓଡ଼ିଶାରେ ରାହୁଲ କରିବେ ଭାରତ ଯୋଡ଼ ନ୍ୟାୟ ଯାତ୍ରା। ରାହୁଲଙ୍କ ଓଡ଼ିଶାରେ ଭାରତ ଯୋଡ଼ ନ୍ୟାୟ ଯାତ୍ରା କାର୍ଯ୍ୟକ୍ରମ ସଫଳ କରିବାକୁ ଲାଗି ପଡିଛନ୍ତି ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟ୍ଟନାୟକ । ତାଙ୍କ ସହିତ ଏଆଇସିସିର ୨ ସମ୍ପାଦକ ମଧ୍ୟ ରାହୁଲଙ୍କ ଗସ୍ତ ଅଞ୍ଚଳଗୁଡିକରେ ଡେରା ପକାଇଛନ୍ତି । ଏଆଇସିସି ସମ୍ପାଦକ ସାହାନୱାଜ ଚୌଧୁରୀ ଓ ରାମକୃଷ୍ଣ ଓଝାଙ୍କ ସମେତ ଯୁବ କଂଗ୍ରେସ ସଭାପତି ରଣଜିତ୍ ପାତ୍ର, ଛାତ୍ରକଂଗ୍ରେସ ସଭାପତି ୟାସିର ନୱାଜ ପ୍ରମୁଖ ପ୍ରସ୍ତୁତିରେ ଲାଗି ପଡିଛନ୍ତି । ପ୍ରଥମେ ଝାରସୁଗୁଡ଼ାରେ ପହଞ୍ଚି ସ୍ଥାନୀୟ କଂଗ୍ରେସ ନେତାଙ୍କ ସହ ରାହୁଲଙ୍କ ଗସ୍ତର ପ୍ରସ୍ତୁତି ନେଇ ଆଲୋଚନା କରିଥିଲେ । ସୁନ୍ଦରଗଡ଼ ଓ ରାଉରକେଲାରେ ମଧ୍ୟ ପ୍ରସ୍ତୁତି ବୈଠକ ସରିଛି ।
ସେହିପରି ସୁନ୍ଦରଗଡ଼ର ବୀରମିତ୍ରପୁର ଦେଇ ରାହୁଲ ଓଡ଼ିଶା ଆସିବାକୁ ଥିବାରୁ ସୀମା ନିକଟରେ କିଭଳି ସ୍ୱାଗତ କାର୍ଯ୍ୟକ୍ରମ ହେବ, ସେ ନେଇ ପିସିସି ସଭାପତି ଶ୍ରୀ ପଟ୍ଟନାୟକ ଟିମ୍ ସହ ବୁଲି ଦେଖିଥିଲେ । ଆଜି ରାଜଗାଙ୍ଗପୁର, ବ୍ରଜରାଜନଗର, ବେଲପାହାଡ଼ ଓ ଶେଷରେ କନକତରା ବୁଲି ଦେଖିବେ ।
ଅପରପକ୍ଷେ ରାହୁଲ ଯିବାକୁ ଥିବା ଅଞ୍ଚଳଗୁଡିକରେ ଆସନ୍ତାକାଲି ପହଞ୍ଚିବେ ପ୍ରଭାରୀ ଡ. ଅଜୟ କୁମାର । ତାଙ୍କ ସହିତ ଦଳର ଗଣମାଧ୍ୟମ ବିଭାଗ ଅଧ୍ୟକ୍ଷ ବିଶ୍ୱରଞ୍ଜନ ମହାନ୍ତି ଓ ଟିମ୍ ପଶ୍ଚିମ ଓଡ଼ିଶାରେ ପହଞ୍ଚିବେ । ଡ. କୁମାର ଆସନ୍ତାକାଲି ସାମ୍ବାଦିକ ସମ୍ମିଳନୀରେ କଂଗ୍ରେସର ଟିକଟ୍ ବଣ୍ଟନ ସମ୍ପର୍କରେ ବିସ୍ତୃତ ସୂଚନା ଦେବେ ବୋଲି ଜଣାପଡ଼ିଛି ।