କେନ୍ଦୁଝର,୦୪/୦୮: ପ୍ରବାଦ ପୁରୁଷ ବିଜୁ ବାବୁଙ୍କ ସହିତ କେନ୍ଦୁଝର ଜିଲ୍ଲାର ଏକ ନିଆରା ସମ୍ପର୍କ ରହିଥିଲା । ଜଣେ ବିଖ୍ୟାତ ଶିଳ୍ପପତି ସହିତ ରାଜନେତା ଭାବେ ସେ ସମଗ୍ର ବିଶ୍ୱରେ ପରିଚିତ । ଅନେକ ସ୍ଥାନରେ ତାଙ୍କର ବିଭିନ୍ନ ସ୍ମୃତି ରହିଥିବା ବେଳେ କେନ୍ଦୁଝର ସହିତ ବିଜୁବାବୁଙ୍କ ସମ୍ପର୍କ ମଧ୍ୟ ଅତି ନିବିଡ଼ ରହିଥିବା ଜଣାପଡିଛି ।
କେନ୍ଦୁଝର ମାଟିକୁ ସେ ଅନେକ ଭଲ ପାଉଥିବାର ନମୁନା ଏବେ ଜଣାପଡିଛି । କେନ୍ଦୁଝର ଜିଲ୍ଲାର ବଡ଼ବିଲ ତହସିଲ କୋହ୍ଲ ବରପଦା ମୌଜାରେ ପ୍ରବାଦ ପୁରୁଷଙ୍କ ଘରବାଡି ଜମି ରହିଥିବା ଜଣାପଡିଛି । ଏହି ସ୍ଥାନର ସଂରକ୍ଷଣର ଆବଶ୍ୟକତା ରହିଥିବା ବେଳେ ବଡ଼ବିଲ କଳିଙ୍ଗ ଆଇରନ କାରଖାନାରେ ରହିଥିବା ବିଜୁ ବାବୁଙ୍କ ଅନେକ ସ୍କୃତିକୁ ନେଇ ଏକ ସଂଗ୍ରାହଳୟ କରାଯିବାକୁ ଦାବି ଉଠିଛି । କେନ୍ଦୁଝରରେ ବିଜୁ ବବୁଙ୍କ ସମ୍ପର୍କରେ ଅନେକ ସାମଗ୍ରୀ ସଂଗ୍ରହ କରିଥିବା ସଂଗ୍ରାହକ ସୁଜିତ କୁମାର ପଟ୍ଟନାୟକ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ଏହି ଦାବି କରିଥିବା ଜଣାପଡିଛି । ଓଡ଼ିଶାର ବରପୁତ୍ର ବିଜୁ ପଟ୍ଟନାୟକ ଓଡ଼ିଶାରେ ଜଣେ ବିଶିଷ୍ଟ ଶିଳ୍ପପତି ଭାବେ ଜଣାଶୁଣା । ରାଜ୍ୟର ସ୍ୱାର୍ଥକୁ ସବୁବେଳେ ଗୁରୁତ୍ୱ ଦେଇ ଅନେକ ଶିଳ୍ପକୁ ସେ ବିକ୍ରି କରିବାକୁ ବାଧ୍ୟ ହୋଇଥିଲେ । କେନ୍ଦୁଝର ଜିଲ୍ଲା ବଡ଼ବିଲ ଅଞ୍ଚଳ ମାଟଙ୍ଗଶ୍ୱେତା ଓ ସୁନ୍ଦୁରା ଗ୍ରାମରେ ବିଜୁ ବାବୁ କଳିଙ୍ଗ ଇଣ୍ଡଷ୍ଟ୍ରିଜ୍ ପ୍ରତିଷ୍ଠା କରିଥିଲେ । ଅନେକ ସମୟରେ ବିଜୁ ବାବୁ ଏହି ଶିଳ୍ପାୟନର ବିକାଶ ସହିତ କେନ୍ଦୁଝରବାସୀଙ୍କ କିଭଳି ଉନ୍ନତି ହୋଇପାରିବ ସେହି ଚିନ୍ତା କରୁଥିଲେ ।
ବିଜୁ ବାବୁ କଳିଙ୍ଗ ଇଣ୍ଡଷ୍ଟ୍ରିଜ୍ କରିବା ପାଇଁ ଆବଶ୍ୟକ ୬୬୦ ଏକର ଜମି ରାଜ୍ୟ ସରକାରଙ୍କ ଠାରୁ ନେବାକୁ ଆବେଦନ କରିଥିଲେ । ଉକ୍ତ କାରଖାନାରେ ୭ଟି ଲୋ ସାଷ୍ଟ ଫର୍ଣ୍ଣେସ୍, ଟୋକିଏ ସ୍କାନପାଇପ୍ ପ୍ଲାଣ୍ଟ ପ୍ରତିଷ୍ଠା କରିଥିଲେ । କାରଖାନା ମୁଖ୍ୟ କଞ୍ଚାମାଲ ଲୁହାପଥରକୁ ବିଶୋଧନ କରି ଉଚ୍ଚତର ଲୌହପଦାର୍ଥ ଉତ୍ପାଦନ ହୋଇପାରୁଥିଲା । ଆବଶ୍ୟକ ୬୬୦ ଏକର ଜମିରେ ବ୍ୟକ୍ତିଗତ ଜମି ୧୮୦ ଏକର ସଂରକ୍ଷିତ ଜଙ୍ଗଲ ଜମି ୮୩.୩୮ ଏକର ଓ ଅବଶିଷ୍ଟ ସରକାରୀ ଅନାବାଦୀ ଜମି ଥିବା ପ୍ରମାଣ ରହିଛି । ବିଜୁ ବାବୁ ଏହି ସ୍ଥାନରେ ଅନେକ ରାତ୍ରୀଯାପନ କରି ଓଡ଼ିଶାର ବିକାଶ ପାଇଁ ସ୍ୱପ୍ନ ଦେଖୁଥିଲେ । ଉକ୍ତ କାରଖାନାରେ ବିଜୁ ବାବୁ ରହିଥିବା ଘରେ ତାଙ୍କର ଅନେକ ନିତ୍ୟ ବ୍ୟବହାର ସାମଗ୍ରୀ ରହିଛି । ଏହାବ୍ୟତିତ ବଡ଼ବିଲ ତହସିଲ ଅଧିନରେ ଥିବା କୋହ୍ଲ ବରପଦା ମୌଜାରେ ବିଜୁ ବାବୁ ୩ ଏକର ୮୦୦ ଡିସିମିଲ୍ ଘରବାଡି ଜମି କିଣିଥିଲେ । ଉକ୍ତ ସ୍ଥାନରେ ସେ ନିଜେ ରହିବା ପାଇଁ ମନସ୍ଥ ମଧ୍ୟ କରିଥିବା ପ୍ରମାଣ ମିଳିଛି । କାରଣ ଜମିକୁ ଘରବାଡି କିସମରେ ପରିବର୍ତ୍ତନ କରାଯାଇଥିଲା । ତେଣୁ ଘର କରିବା ପାଇଁ ବିଜୁ ବାବୁଙ୍କ ସ୍ୱପ୍ନ ରହିଥିଲା ବୋଲି ଏହି ଘଟଣାରୁ ସ୍ପଷ୍ଟ ହୋଇଛି ।
ଉକ୍ତ ଜମି ଏବେ ଅବ୍ୟବହୃତ ହୋଇ ପଡିରହିଛି । ଅନେକ ଦିନରୁ ଖଜଣା ମଧ୍ୟ ରାଜସ୍ୱ ବିଭାଗକୁ ଦିଆଯାଇନଥିବା ଜଣାପଡିଛି । ଉକ୍ତ ଜମି ସମ୍ପର୍କରେ ଖ୍ୟାତିନାମା ସଂଗ୍ରାହକ ସୁଜିତ କୁମାର ପଟ୍ଟନାୟକ ଅବଗତ ହେବା ପରେ ଏହାର ସମସ୍ତ କାଗଜପତ୍ର ସଂଗ୍ରହ କରିଛନ୍ତି । କେନ୍ଦୁଝର ଜିଲ୍ଲାରେ ବିଜୁ ବାବୁଙ୍କର ଅନେକ ସ୍ମୃତି ରହିଥିବାରୁ ଉକ୍ତ ଜମିରେ ଏକ ସଂଗ୍ରାହଳୟ କରାଯାଇ ବିଜୁ ବାବୁଙ୍କ ବ୍ୟବହୃତ ସାମଗ୍ରୀ ପ୍ରଦର୍ଶୀତ ହୋଇପାରିଲେ ପରପିଢ଼ି ବିଜୁ ବାବୁଙ୍କ ସମ୍ପର୍କରେ ଜାଣିବାର ସୁଯୋଗ ପାଇବେ ବୋଲି ଶ୍ରୀ ପଟ୍ଟନାୟକ ଚିନ୍ତା କରିଛନ୍ତି । ତେଣୁ ନବୀନ ପଟ୍ଟନାୟକଙ୍କୁ ଚିଠି ଲେଖି ଉକ୍ତ ଜମିରେ ସଂଗ୍ରାହଳୟ କରିବାକୁ ପ୍ରସ୍ତାବ ଦେଇଛନ୍ତି ।
ବିଜୁ ବାବୁଙ୍କ ସମ୍ପର୍କରେ ତାଙ୍କ ପାଖରେ ଯେଉଁ ସନ୍ତକ ରହିଛି ତାହା ମଧ୍ୟ ସେ ସଂଗ୍ରାଳୟକୁ ଦେବାକୁ ଇଚ୍ଛା ପ୍ରକାଶ କରିଛନ୍ତି । ବିଜୁ ବାବୁ କଳିଙ୍ଗ ଇଣ୍ଡଷ୍ଟ୍ରିଜ୍ରେ ରହୁଥିବା ଖଟ ସ୍ୱତନ୍ତ୍ର ଭାବେ ତିଆରି ହୋଇଥିଲା । ୧୦ ଲମ୍ବର ଖଟରେ ବିଜୁ ବାବୁ ଶୋଇବା ସହିତ ସେ ବ୍ୟବହାର କରୁଥିବା ରାଜଦୂତ ମୋଟର ସାଇକେଲ ଓ ଅନ୍ୟାନ୍ୟ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଚେୟାର, ଟେବୁଲ, ଆଲମିରା, ଜୋତା, ଛତା ପ୍ରଭୃତି ସାମଗ୍ରୀ ରହିଛି । ସେ ସମସ୍ତ ସାମଗ୍ରୀ ନଷ୍ଟ ହେବାକୁ ବସିଥିବା ବେଳେ ଘରବାଡି ମଧ୍ୟ ରକ୍ଷଣାବେକ୍ଷଣ ଅଭାବରୁ ପଡି ରହିଛି । ଉକ୍ତ ଜମିରେ ଘର କରିବା ପରେ ବିଜୁ ବାବୁଙ୍କ ସ୍ୱପ୍ନ ପୂରଣ ହେବା ସହିତ ସଂଗ୍ରହାଳୟରେ ପ୍ରବାଦ ପୁରୁଷଙ୍କ ସାମଗ୍ରୀ ଓ ତାଙ୍କ ସମ୍ପର୍କରେ ବିଭିନ୍ନ ପତ୍ରପତ୍ରିକା ପ୍ରଦର୍ଶୀତ ହୋଇପାରିଲେ ପରପିଢ଼ି ବିଜୁ ବାବୁଙ୍କ ସମ୍ପର୍କରେ ଜାଣିବାର ସୁଯୋଗ ପାଇବେ ବୋଲି ଶ୍ରୀ ପଟ୍ଟନାୟକ ପୂର୍ବତନ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି ।
