ଜଳେଶ୍ୱର, ୦୯/୦୮ : ମାଛ ନେଇ ଆସୁଥିବା ବେଳେ ଘଟିଲା ଅଘଟଣ । ବାଇକ୍ ଆରୋହୀଙ୍କୁ ପଛପଟୁ ଧକ୍କା ଦେଲା ଚୋରା ବାଲି ବୋଝେଇ ଟ୍ରାକ୍ଟର । ବାଇକ୍ ଆରୋହୀ ମୃତ। ବାଲିଆପାଳ-କାଳିପଦା ମୁଖ୍ୟ ରାସ୍ତାର କେନାଲ ଆଡି ଛକ ନିକଟରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି । ମୃତ ବାଇକ୍ ଆରୋହୀ ଜଣଙ୍କ ହେଉଛନ୍ତି ମୁରଲୀଧର ମଣ୍ଡଳ । 

ସୂଚନା ଅନୁଯାୟୀ, ବାଲେଶ୍ଵର ଜିଲ୍ଲା ବାଲିଆପାଳ ଥାନା କାଳରୋହୀ ଗ୍ରାମର ମୁରଲୀଧର ମଣ୍ଡଳ ଶୁକ୍ରବାର ଦିନ ୧୦ଟାରେ ବାଇକ୍ ଯୋଗେ ଡଗରା ଅଞ୍ଚଳରୁ ମାଛ ନେଇ ବାଲିଆପାଳ ବଜାରକୁ ବିକିବାକୁ ଯାଉଥିଲେ। ଏହି ସମୟରେ ବାଲିଆପାଳ-କାଳିପଦା ମୁଖ୍ୟ ରାସ୍ତାର କେନାଲ ଆଡି ଛକ ନିକଟରେ ଏକ ଚୋରା ବାଲି ବୋଝେଇ ଟ୍ରାକ୍ଟର ପଛପଟୁ ଦ୍ରୁତଗତିରେ ଆସି ତାଙ୍କୁ ଧକ୍କା ଦେଇଥିଲା । ଘଟଣାସ୍ଥଳରେ ମୁରଲୀଧର ବାଇକରୁ ଖସି ପଡ଼ିଥିଲେ। ଘଟଣାସ୍ଥଳରୁ ଡ୍ରାଇଭର ଟ୍ରାକ୍ଟର ନେଇ ଛୁ ମାରିଥିଲା । ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସ ଯୋଗେ ବାଇକ ଆରୋହୀଙ୍କୁ ବାଲିଆପାଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ବାଲିଆପାଳ ପୋଲିସ ଶବ ଜବତ କରିଛି । ଏଥି ସହିତ ଘଟଣାର ତଦନ୍ତ ଜାରି ରଖିଛି।