ନୂଆଦିଲ୍ଲୀ,୨୯/୦୧: ଇ-କମର୍ସ କମ୍ପାନି ଫ୍ଲିପ୍‌କାର୍ଟର ସହ- ପ୍ରତିଷ୍ଠାତା ବିନି ବଂଶଲ କମ୍ପାନି ବୋର୍ଡରୁ ଇସ୍ତଫା ଦେଇଛନ୍ତି। କିଛି ଦିନ ପୂର୍ବରୁ ସେ ଫ୍ଲିପ୍‌କାର୍ଟରେ ଥିବା ତାଙ୍କର ଅବଶିଷ୍ଟ ଅଂଶଧନକୁ ମଧ୍ୟ ବିକ୍ରି କରି ଦେଇଥିଲେ । ଇ-କମର୍ସ କ୍ଷେତ୍ରରେ ଆଉ ଏକ ନୂଆ କମ୍ପାନି ଆରମ୍ଭ କରିବା ପାଇଁ ବିନି ଯୋଜନା ରଖିଥିବା କିଛି ଦିନ ତଳେ ଏକ ରିପୋର୍ଟ ପ୍ରକାଶ ପାଇଥିଲା। 

୨୦୦୭ରେ ସଚିନ ବଂଶଲ ଏବଂ ବିନି ବଂଶଲ ଫ୍ଲିପକାର୍ଟର  ସ୍ଥାପନା କରିଥିଲେ । ୨୦୧୮ରେ ଫ୍ଲିପକାର୍ଟର ସିଂହଭାଗ ଅଂଶଧନକୁ ୱାଲମାର୍ଟ କ୍ରୟ କରିଥିଲା । ଏହା ପରେ ସଚିନ  ବଂଶଲ କମ୍ପାନି ଛାଡି ଦେଇଥିଲେ । ସଚିନ ଏବେ ଫିନ୍‌ଟେକ କମ୍ପାନି ନବିର ପରିଚାଳନା କରୁଛନ୍ତି । ଫ୍ଲିପକାର୍ଟ ଛାଡିବା  ଅବସରରେ ବିନି ବଂଶଲ କହିଛନ୍ତି, ଗତ ୧୬ ବର୍ଷରେ ଫ୍ଲିପକାର୍ଟ ଅନେକ ଉପଲବ୍ଧି ଦେଇଛି, ଯାହାକୁ ନେଇ ଗର୍ବିତ । କମ୍ପାନିର  ମଜଭୂତ ଟିମ୍‌ ଆଗକୁ ମଧ୍ୟ ଏହାର ଅଭିବୃଦ୍ଧିରେ ସହାୟକ ହେବ ।