ଭୁବନେଶ୍ୱର,୨୧/୦୩: ବିଜେଡି ଓ ବିଜେପି ମଧ୍ୟରେ ଆଉ ମେଣ୍ଟ କିମ୍ବା ଆସନ ବୁଝାମଣା ସମ୍ଭାବନା ନାହିଁ । ବିଜେପି କେନ୍ଦ୍ରୀୟ ନେତୃତ୍ୱ ତରଫରୁ ଏମିତି କିଛି ସଙ୍କେତ ଦିଆଯାଇଛି । ନିର୍ଭରଯୋଗ୍ୟ ସୂତ୍ରରୁ ଏମିତି ସୂଚନା ମିଳିଛି । ବିଜେଡି ଶୀର୍ଷ ନେତୃତ୍ୱ ବି ଏକଥା ଜାଣି ସାରିଲେଣି । ଦଳ ବି ଏକ ପ୍ରକାର ମନସ୍ଥ କରି ସାରିଲାଣି, ଏକୁଟିଆ ଲଢ଼ିବ ନିର୍ବାଚନ । କର୍ମୀ ଓ ନେତାଙ୍କୁ ଗୁରୁବାର କିମ୍ବା ଶୁକ୍ରବାର ଏକଥା ଖୋଲାଖୋଲି ଜଣାଇ ଦେବାକୁ ବିଚାର କରାଯାଉଛି ।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା କହୁଛି, ଆସନ ଭାଗବଣ୍ଟା ଏବଂ ନିର୍ବାଚନ ପରେ କ୍ଷମତା ବଣ୍ଟନରେ କେଉଁ ଦଳର ଭାଗ କେତେ ରହିବ ସେ ନେଇ ସହମତି ହେଉ ନାହିଁ । ବିଜେପି ଯାହା ଚାହୁଁଛି ସେକଥା ବିଜେଡିକୁ ଜଣାଇ ଦିଆଯାଇଛି । ଏଥିରେ ବିଜେଡି ରାଜି ହେଲେ ମେଣ୍ଟ ହେବ।
କିନ୍ତୁ ବିଜେପିର ଦାବି ମାନିବା ସମ୍ଭବ ନୁହେଁ ବୋଲି ବିଜେଡି ବିଚାର କରୁଥିବା ଜଣାପଡ଼ିଛି । କୁହାଯାଉଛି, ବିଜେପି ୧୪ ଲୋକସଭା ଏବଂ ୪୯ ବିଧାନସଭା ଆସନରୁ ତଳକୁ ଖସିବ ନାହିଁ ବୋଲି ଜଣାଇ ଦେଇଛି । ସରକାର ଗଠନ ବେଳେ ଅନ୍ୟ ରାଜ୍ୟର ମେଣ୍ଟ ସରକାର ଭଳି ଉପ ମୁଖ୍ୟମନ୍ତ୍ରୀ ପଦ ବିଜେପି ନେବ ବୋଲି ସୂଚନା ଦିଆଯାଇଛି । ଏହା ଦଳର ସ୍ୱାର୍ଥ ବିରୋଧୀ ବୋଲି ବିଜେଡି ନେତୃତ୍ୱ ବିଚାର କରୁଛି ।
ଦିଲ୍ଲୀରୁ ମିଳିଥିବା ଖବରକୁ ବିଶ୍ୱାସ କରାଗଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଆଲୋଚନା କରି ଫେରିବା ପରେ ଅମିତ ଶାହ ଜଣାଇଥିଲେ, ମେଣ୍ଟ ଧର୍ମ ଏବଂ ଅନ୍ୟ ରାଜ୍ୟରେ ବିଜେପି ସହଭାଗିତାରେ ଚାଲିଥିବା ମେଣ୍ଟ ସରକାର ଯେଭଳି ନିୟମ ଏବଂ ବୁଝାମଣାରେ ଚାଲିଛି ତାହା ମାନିବାକୁ ବିଜେଡି ରାଜି ହେଲେ ମେଣ୍ଟ ହେବ । ଦଳ କ’ଣ ଚାହୁଁଛି ସେକଥା ବିଜେଡିକୁ ଜଣାଇ ଦିଆଯାଇଛି ।
ଯାହା ଆଲୋଚନା ହେଉଥିଲା, ବିଜେପିକୁ ଅଧିକ ଲୋକସଭା ଆସନ ଛାଡ଼ି ଅଧିକ ବିଧାନସଭା ଆସନ ନିଜ କବ୍ଜାରେ ରଖିବାକୁ ବିଜେଡି ଚାହୁଁଥିଲା । ୧୩ଟି ଲୋକସଭା ଆସନ ଛାଡ଼ିବାକୁ ପ୍ରସ୍ତୁତ ଥିଲା । କିନ୍ତୁ ବିଧାନସଭାରେ ୩୫ରୁ ୪୨ ଆସନରୁ ଅଧିକ ହାତଛଡ଼ା ନ କରିବାକୁ ଜଣାଇଥିଲା । ଏହାଛଡ଼ା ସରକାର ଗଠନରେ ବିଜେଡିର ଦବ୍ଦବା ରହିବ ବୋଲି ପ୍ରସ୍ତାବ ଦେଇଥିଲା ।
ରାଜ୍ୟ ଶାଖା ବିଜେପି ଗତ ଚାରି ଦିନ ହେଲା ଦିଲ୍ଲୀରେ ଡେରା ମାରିଥିଲା । କେନ୍ଦ୍ରୀୟ ନେତୃତ୍ୱ ଆଗରେ ଯୁକ୍ତି ବାଢ଼ିଥିଲା ଯେ ମେଣ୍ଟ ହେଲେ ବିଜେପିର କିଛି ଫାଇଦା ହେବ ନାହିଁ । ଦୃଢ଼ୋକ୍ତି ଦେଇଥିଲେ, ଏକୁଟିଆ ଲଢ଼ିଲେ ୧୪ରୁ ଅଧିକ ଲୋକସଭା ଏବଂ ୫୦ରୁ ଅଧିକ ବିଧାନସଭା ଆସନରେ ଜିତିବ ଦଳ ।
