ନୂଆଦିଲ୍ଲୀ: ଉତ୍ତରପ୍ରଦେଶର ହାଥରସ୍ ଲୋକସଭା ଆସନରୁ ବିଜେପି ସାଂସଦ ରାଜଭୀର ଦିଲରଙ୍କ ହୃଦଘାତ ଯୋଗୁଁ ମୃତ୍ୟୁ ଘଟିଛି । ଆଲିଗଡର ଏକ ଡାକ୍ତରଖାନାରେ ଚିକିତ୍ସା ସମୟରେ ସାଂସଦଙ୍କ ମୃତ୍ୟୁ ଘଟିଛି । ବିଜେପି ଏଥର ୨୦୨୪ ନିର୍ବାଚନରେ ହାଥରସ୍ ଆସନରୁ ତାଙ୍କୁ ପ୍ରାର୍ଥୀ କରିନଥିଲା । ତାଙ୍କ ବଦଳରେ ଦଳ ଅନୁପ୍ ବାଲ୍ମିକିଙ୍କୁ ମୈଦାନକୁ ଓହ୍ଲାଇଛି । ୨୦୧୯ ଲୋକସଭା ନିର୍ବାଚନରେ ରାଜଭୀର ଦିଲର ହାଥରସ୍ ଆସନରୁ ଜିତିଥିଲେ। ରାଜଭୀର ଦିଲରଙ୍କ ପିତା ମଧ୍ୟ ହାଥରସ୍ ଆସନରୁ ସାଂସଦ ଥିଲେ ।

ଲୋକସଭା ନିର୍ବାଚନ ପୂର୍ବରୁ ରାଜଭୀର ଦିଲରଙ୍କ ମୃତ୍ୟୁ ବିଜେପି ପାଇଁ ଏକ ପ୍ରକାର ବଡ ଝଟକା ବୋଲି କୁହାଯାଉଛି । ଗତ କିଛି ଦିନ ହେବ ସାଂସଦ ରାଜଭୀର ସିଂ ଦିଲର ଅସୁସ୍ଥ ଥିଲେ। ଚଳିତ ନିର୍ବାଚନରେ ହାଥରସ୍ ଲୋକସଭା ଆସନ ପାଇଁ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ମାନଙ୍କ ମଧ୍ୟରେ ରହିବା ପରେ ବି ତାଙ୍କୁ ଦଳ ଟିକେଟ ଦେଇ ନଥିଲା । ଆଉ ଏଥିପାଇଁ ସେ ଚିନ୍ତିତ ଥିଲେ । ରାଜଭୀର ଦିଲରଙ୍କ ମୃତ୍ୟୁ ପରେ ଭାରତୀୟ ଜନତା ପାର୍ଟିରେ ଆଲୋଡ଼ନ ସୃଷ୍ଟି ହୋଇଛି । 

ରାଜଭୀର ସିଂ ଦିଲରଙ୍କ ପିତା କିଶନ ଲାଲ ଦିଲର ଲଗାତାର ଚାରିଥର ହାଥରସ୍ ଆସନରୁ ସାଂସଦ ହୋଇଥିଲେ। ସେ ୧୯୯୬ ରୁ ୨୦୦୪ ପର୍ଯ୍ୟନ୍ତ ହାଥରସ୍ ସିଟ୍ ଜିତିଥିଲେ। ତେବେ ୨୦୧୯ ମସିହାରେ ରାଜଭୀର ଦିଲର ବିଜେପିକୁ ଏହି ଆସନରେ ବିଜୟୀ କରାଇଥିଲେ ।