ଭୁବନେଶ୍ୱର,୧୨/୦୮: ରବିବାର ରାତି ପ୍ରାୟ ସାଢ଼େ ୧୦ଟା । ରାଜମହଲରୁ ଶିଶୁଭବନ ରାସ୍ତା ପ୍ରାୟତଃ ଫାଙ୍କା । ରାସ୍ତାରେ କାଁ ଭାଁ ବାଇକ୍, କାର୍ ଯାଉଥିଲା । ବାପୁଜୀନଗର ପାଶ୍ୱର୍ ପ୍ରାୟ ସବୁ ଦୋକାନରେ ତାଲା ପଡିଲାଣି । ହଠାତ୍ ଏକ କଳା କାର୍ ଦ୍ରୁତଗତିରେ ମାଷ୍ଟରକ୍ୟାଣ୍ଟିନ ଛକରୁ ଶିଶୁ ଭବନ ଆଡ଼େ ମାଡି ଚାଲିଲା । କାର୍ ସାଇଲେନ୍ସରରୁ ବିକଟାଳ ଶଦ୍ଦ ବାହାରୁଥାଏ । ମଝିରେ ମଝିରେ ଉଚ୍ଚ ଶବ୍ଦସମ୍ପନ୍ନ ହର୍ଣ୍ଣ ମାରୁଥାଏ ଚାଳକଜଣକ । କଳା କାର୍ ସାମ୍ନାରେ ଯେଉଁ ଗାଡି ଯାଉଥିଲା, ଦୁର୍ଘଟଣା ଆଶଙ୍କାରେ ଆପେ ରାସ୍ତାକଡ଼କୁ ପଳାଉଥିଲା ।
ଶିଶୁଭବନ ଟ୍ରାଫିକ୍ରେ ଘୁରି ପୁଣି ରାଜମହଲ ଆଡ଼େ ମୁହାଁଇଲା କାର୍ । ସମାନ ଗତିରେ ରାଜମହଲ ଓଭରବ୍ରିଜ ଯାଏଁ ମାଡ଼ିଗଲା । ସେଠାରୁ ପୁଣି ଶିଶୁଭବନ ଆଡ଼େ ମାଡ଼ି ଯାଇ ଏଥର କ୍ୟାପିଟାଲ ହସ୍ପିଟାଲ ଆଡ଼େ ମୁହାଁଇଲା କାର୍ । ସେଠାରୁ ଫେରି ପୁଣି ରାଜମହଲ ଦେଇ ମାଷ୍ଟରକ୍ୟାଣ୍ଟିନ ଆଡ଼େ ପଳାଇଲା । ଏହି ପ୍ରଶସ୍ତ ଓ ନିଛାଟିଆ ରାସ୍ତାରେ କାରର ଗତି ଆଦୌ କମୁନଥିଲା ବରଂ ବଢ଼ୁଥିଲା । ମିଟର କଣ୍ଟା ୮୦ରୁ ୧୦୦ ଛୁଉଁଥିଲା ।
କଳା କାର୍ଟି ପ୍ରାୟ ୧୫ ମିନିଟ୍ ଧରି ଜନପଥ ଓ ଶିଶୁଭବନ-କ୍ୟାପିଟାଲ ହସ୍ପିଟାଲ ରାସ୍ତାରେ ଆତଙ୍କ ଖେଳାଇ ଚାଲିଲା । ରାସ୍ତାରେ ଯାଉଥିବା ଯାତ୍ରୀ ଓ ପଥଚାରୀ ସଭିଏଁ ଆତଙ୍କିତ ହୋଇପଡିଥିଲେ । ଦୁଃଖର କଥା, ଥରଟିଏ ବି ପିସିଆର କି ପୁଲିସ ଭ୍ୟାନର ଦେଖା ମିଳିଲାନି । ଏଭଳି ବିପଜ୍ଜନକ କାର ଚାଳନାରୁ ଲାଗୁଥିଲା, ଯେମିତି କାର ଚାଳକଜଣକ ହୋସ୍ରେ ନାହିଁ । ନାକେ ଯାଏଁ ପିଇକି ଗାଡି ଚଳାଉଛି ।
ରାଜଧାନୀର ଜନଗହଳି ରାସ୍ତାରେ ଏପରି ଘଟଣା ପ୍ରଥମ ଥର ନୁହେଁ । ଅଧିକାଂଶ ରାତିରେ ଏମିତି ବାଇକ୍ ଓ କାର ଚାଳକଙ୍କ ଔଦ୍ଧତ୍ୟ ସହିବାର ସବୁ ସୀମା ଟପୁଛି । ବେଳେବେଳେ ରାତି ବଢ଼ିବା ସହ ଚାଳକଙ୍କ ଏଭଳି ବିପଜ୍ଜନକ ଗାଡି ଚାଳନାର ପ୍ରତିଯୋଗିତା ଲାଗୁଛି । କିଛିଦିନ ତଳେ ଏଜି ଛକ ଟ୍ରାଫିକରୁ ରାଜଭବନ ଆଡ଼କୁ ଏକ ଧଳାରଙ୍ଗର ଦାମୀ କାର୍ ମୁହାଁଇବା ବେଳେ ଅନ୍ୟ ଏକ କାର୍କୁ ଖୁବ୍ ଜୋର୍ରେ ଧକ୍କା ଦେଇଥିଲା । ଦୁର୍ଘଟଣାରେ ଛୋଟ କାର୍ଟି ଭାଙ୍ଗିରୁଜି ଯାଇଥିଲା । ସମ୍ପୃକ୍ତ କାର୍ ଚାଳକ ମଧ୍ୟ ଆହତ ହୋଇଥିଲେ ।
ରାତି ଅଧରେ ମଦ୍ୟପ ଚାଳକ ଉପରେ କଠୋର କାର୍ଯ୍ୟାନୁଷ୍ଠାନ ନେଉଛି କମିଶନରେଟ୍ ପୁଲିସ । କାହାରିକୁ ଛାଡୁନି । ମଦ୍ୟପ ଚାଳକଙ୍କୁ ଗିରଫ କରୁଛି । ମାଳ ମାଳ ଦାମୀ କାର୍ ଜବତ ବି କରୁଛି । ରାଜମହଲ ଛକରେ ଦିନତମାମ ଟ୍ରାଫିକ୍ ଯାଞ୍ଚ ଜୋର୍ଦାର ଚାଲୁଛି । ବିନା ହେଲ୍ମେଟଧାରୀ ଓ ବିପରୀତ ଦିଗରେ ନେଉଥିବା ଗାଡି଼ ଚାଳକଙ୍କୁ ଗୋଡ଼ାଇ ଧରୁଛି ପୁଲିସ । ରାତି ୯ଟା ପରେ ଟ୍ରାଫିକ୍ ପୁଲିସର ଯାଞ୍ଚ ସରିବା ପରେ ଅମାନିଆଙ୍କ ମନମାନି ଆରମ୍ଭ ହୋଇଯାଉଛି ।
