ନୂଆଦିଲ୍ଲୀ, ୩।୪: ନଗଦ ସଂକଟ ମଧ୍ୟରେ ଗତି କରୁଥିବା ଏଡୁଟେକ୍ କମ୍ପାନି ବାଇଜୁସ୍ ଏବେ ଫୋନ୍ କଲ୍ରେ କର୍ମଚାରୀଙ୍କୁ ଛଟେଇ କରିବା ଆରମ୍ଭ କରିଦେଲାଣି । ଗଣମାଧ୍ୟମ ରିପୋର୍ଟ ଅନୁସାରେ, କମ୍ପାନିର ଆର୍ଥିକ ସ୍ଥିତି ଏତେ ମାତ୍ରାରେ ଖରାପ ଯେ, ଏହା କର୍ମଚାରୀଙ୍କ କାର୍ଯ୍ୟକୁ ସମୀକ୍ଷା କରୁନାହିଁ କିମ୍ବା ସେମାନଙ୍କୁ ନୋଟିସ୍ ପରିୟଡ ସର୍ଭ କରିବାର ବି ସୁଯୋଗ ଦେଉନାହଁ । କମ୍ପାନି ଫୋନ୍ କଲ୍ରେ ହିଁ କର୍ମଚାରୀମାନଙ୍କୁ ଚାକିରିରୁ ବିଦା କରିଦେଉଛି ।
ବାଇଜୁସ୍ରେ କାର୍ଯ୍ୟ କରୁଥିବା ରାହୁଲ ନାମକ ଜଣେ କର୍ମଚାରୀଙ୍କ କହିବାନୁସାରେ, ତାଙ୍କ ପରିବାରର ଜଣେ ସଦସ୍ୟଙ୍କ ସ୍ୱାସ୍ଥ୍ୟ ଖରାପ ଥିବାରୁ ଦେଖାଶୁଣା କରିବାକୁ ସେ କିଛି ଦିନ ପାଇଁ ଛୁଟିରେ ଯାଇଥିଲେ । ମାର୍ଚ୍ଚ ମାସ ମଝିରେ ସେ ଅଫିସ୍ରୁ ଛୁଟି ନେଇଥିବାବେଳେ ମାର୍ଚ୍ଚ ୩୧ରେ ହଠାତ୍ ତାଙ୍କ ପାଖକୁ ବାଇଜୁସ୍ର ଏଚ୍ଆର୍ ଅଧିକାରୀଙ୍କ ଫୋନ୍ ଆସିଥିଲା । ମାନବ ସମ୍ବଳ ଅଧିକାରୀ କହିଲେ ଯେ, ତାଙ୍କୁ କମ୍ପାନିରୁ ଛଟେଇ କରାଯାଇଛି । ଏଚ୍ଆର୍ କହିଲେ ଯେ, ତାଙ୍କର ଛଟେଇ ପ୍ରକ୍ରିୟା ଆରମ୍ଭ ହୋଇଯାଇଛି ଏବଂ ଆଜି ହିଁ ଅଫିସ୍ରେ ତାଙ୍କର ଅନ୍ତିମ ଦିନ ।
ଛଟେଇର କାରଣ ପଚାରିବାରୁ ଏଚ୍ଆର୍ କହିଲେ ଯେ, କମ୍ପାନିର ଆର୍ଥିକ ସ୍ଥିତି ଅତ୍ୟନ୍ତ ଖରାପ, ଯେଉଁ କାରଣରୁ ମ୍ୟାନେଜ୍ମେଣ୍ଟ କିଛି କର୍ମଚାରୀଙ୍କୁ କାଢ଼ିଦେବାକୁ ନିଷ୍ପତ୍ତି ନେଇଛି । ରାହୁଲଙ୍କୁ କୌଣସି ନୋଟିସ୍ ପିରିୟଡ୍ ମଧ୍ୟ ସର୍ଭ କରିବାର ସୁଯୋଗ ଦିଆଯାଇନାହିଁ । ରାହୁଲଙ୍କ ଭଳି ଏଭଳି ଅନେକ କର୍ମଚାରୀଙ୍କୁ ଫୋନ୍ କଲ୍ରେ ହିଁ ଛଟେଇ କରାଯାଇଥିବା ଜଣାପଡ଼ିଛି । ସୂତ୍ର ଅନୁସାରେ, ବାଇଜୁସ୍ ଏହି ପର୍ଯ୍ୟାୟରେ ପ୍ରାୟ ୫୦୦ କର୍ମଚାରୀଙ୍କୁ ଛଟେଇ କରିଛି । ଏଥିମଧ୍ୟରୁ ଅଧା କମ୍ପାନିର ଟ୍ୟୁସନ ସେଣ୍ଟର ବ୍ୟବସାୟରୁ ଅଛନ୍ତି । କମ୍ପାନିରେ ଛଟେଇ ଟ୍ରେଣ୍ଡ ୨୦୨୨ରୁ ଆରମ୍ଭ ହୋଇଛି । ଗତ ଦୁଇ ବର୍ଷରେ ଏହା ୧୦,୦୦୦ କର୍ମଚାରୀଙ୍କୁ ଛଟେଇ କରିଛି । ବାଇଜୁସ୍ର ଜଣେ ମୁଖପାତ୍ର କହିଛନ୍ତି ଯେ, କମ୍ପାନି ଏବେ ପୁନଃ ସଂରଚନାର ଅନ୍ତିମ ପର୍ଯ୍ୟାୟରେ ଅଛି । ୨୦୨୩ ଅକ୍ଟୋବରରେ ଏହି ପ୍ରକ୍ରିୟା ଆରମ୍ଭ ହୋଇଥିଲା । ଖର୍ଚ୍ଚ କମାଇବା ଏହାର ଲକ୍ଷ୍ୟ ।
