ମାଲକାନଗିରି,୦୨/୦୯: ଅଭିନୟ ଉପାୟରେ ଗଞ୍ଜେଇ ଚୋରା ଚାଲାଣ କରୁଥିବା ବେଳେ ମାଡ଼ିବସିଲା ପୋଲିସ । ରଦ୍ଦି କାଗଜ କଣ୍ଟେନର ଭିତରୁ ୭୦ ଲକ୍ଷ ଟଙ୍କାର ଗଞ୍ଜେଇ ଜବତ । ଏହି ଘଟଣାରେ ୨ଜଣ ଅଭିଯୁକ୍ତ ଗିରଫ ହୋଇଛନ୍ତି । ଦୁଇ ଅଭିଯୁକ୍ତ ମହାରାଷ୍ଟ୍ରର ଅମୋଲ ଶାନ୍ତାରାମ ଶଙ୍କପାଲ ଓ କମଲେସ ଜଗନ୍ନାଥ ବୋଲି ଜଣାପଡ଼ିଛି । ମାଲକାନଗିରି ଜିଲ୍ଲା ବାଲିମେଳା ବ୍ଲକ ଚିତ୍ରକୋଣ୍ଡା ଛକରେ ଏଭଳି ଘଟଣା ଘଟିଛି ।

ସୂଚନା ଅନୁଯାୟୀ, ଚିତ୍ରକୋଣ୍ଡା ଛକରେ ନିୟମିତ ଯାନବାହନ ଯାଞ୍ଚ ଚାଲିଥିଲା । ଏହି ସମୟରେ ଚିତ୍ରକୋଣ୍ଡା ଘାଟିରୁ ଏକ କଣ୍ଟେନର ଦ୍ରୁତ ଗତିରେ ଆସୁଥିବାର ଦେଖିବାକୁ ପାଇଥିଲା ଓର୍କେଲ ଥାନା ପୋଲିସ । ଏନେଇ ଯାଞ୍ଚ କରୁଥିବା ପୋଲିସଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା । ସନ୍ଦେହ ହେବାରୁ କଣ୍ଟେନରଟିକୁ ଯାଞ୍ଚ କରିବା ପାଇଁ ଅଟକାଇଥିଲା ପୋଲିସ । ଯାଞ୍ଚ କରିବାରୁ କଣ୍ଟେନର ଭିତରେ ରଦ୍ଦି କାଗଜ ସହ ୧୨ ବସ୍ତା ଗଞ୍ଜେଇ ଚୋରା ଚାଲାଣ ହେଉଥିବା ନେଇ ଜାଣିବାକୁ ପାଇଥିଲା ପୋଲିସ । ଏହି ୧୨ଟି ଗଞ୍ଜେଇ ବସ୍ତାରେ ୪୨୦ କେଜି ଗଞ୍ଜେଇ ରହିଥିବା ନେଇ ଖବର ମିଳିଛି । ପୋଲିସ ଗଞ୍ଜେଇ କଣ୍ଟେନରଟି ଜବତ କରିବା ସହ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଥିଲା । ଏହି ଦୁଇ ଜଣ ଅଭିଯୁକ୍ତ ଉକ୍ତ ଗଞ୍ଜେଇ ନେଇ ଚିତ୍ରକୋଣ୍ଡା ଅଞ୍ଚଳରୁ ମହାରାଷ୍ଟ୍ର ଯାଉଥିଲେ ବୋଲି ପୋଲିସ ତଦନ୍ତରୁ ଜଣାପଡିଛି । ତେବେ ଜବତ ହୋଇଥିବା ୪୨୦ କେଜି ଗଞ୍ଜେଇର ବଜାର ମୂଲ୍ୟ ପ୍ରାୟ ୭୦ ଲକ୍ଷ ଟଙ୍କା ହେବ ବୋଲି ପୋଲିସ ସୂଚନା ଦେଇଛି ।