ଭୁବନେଶ୍ୱର,୩୦/୦୫:ରାଜଧାନୀବାସୀଙ୍କୁ ଭଗବାନ ଭରସା । ଯଦି ବାଣ ବିସ୍ଫୋରଣ କି ପୋଡ଼ାଜଳା ଭଳି ଅଘଟଣ ଘଟେ, ତାହେଲେ କ୍ୟାପିଟାଲ ହସ୍ପିଟାଲ୍ରେ ଚିକିତ୍ସା ପାଇଁ ନାହିଁ ସ୍ୱତନ୍ତ୍ର ବର୍ଣ୍ଣ ୟୁନିଟ୍। ଏତେ ବଡ଼ ହସ୍ପିଟାଲ୍ରେ ପୋଡ଼ାଜଳା ଆହତଙ୍କ ପାଇଁ ସେଭଳି ଅତ୍ୟାଧୁନିକ ଚିକିତ୍ସା ବ୍ୟବସ୍ଥା ନାହିଁ । ଆହତ ହସ୍ପିଟାଲକୁ ଆସିଲେ ସର୍ଜରୀ ପାଖ ରୁମ୍ରେ ଚିକିତ୍ସିତ ହୁଅନ୍ତୁ । ଆଉ ଯନ୍ତ୍ରଣାରେ ଛଟପଟ ହୋଇ ଜୀବନ ମଧ୍ୟ ଯାଉଛି । ସେଠାରେ କେବଳ ମଶାରୀ ସହିତ ପୁରୁଣା କାଳିଆ ପଦ୍ଧତିରେ ଚିକିତ୍ସା କରାଯାଉଛି । ଏପରି କ୍ଷେତ୍ରରେ ହସ୍ପିଟାଲ୍ରେ ସ୍ୱତନ୍ତ୍ର ବର୍ଣ୍ଣ ୟୁନିଟ୍ ସ୍ଥାପନ ଲାଗି ଜରୁରି ହୋଇପଡ଼ିଛି । ପୁରୀ ନରେନ୍ଦ୍ର ପୁଷ୍କରିଣୀ ନିକଟରେ ହୋଇଥିବା ଅଘଟଣ ଏକ ଚୋତାବନୀ ଦେଇଛି ।
ପୁରୀ ନରେନ୍ଦ୍ର ପୁଷ୍କରିଣୀ ନିକଟରେ ବୁଧବାର ବାଣ ବିସ୍ଫାରଣରେ ୫୦ରୁ ଅଧିକ ଆହତ ହୋଇଥି ବେଳେ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଚନ୍ଦନଯାତ୍ରା ଉତ୍ସବ ଚାଲିଥିବାବେଳେ ବାଣ ଫୁଟାଉ ଫୁଟାଉ ହଠାତ୍ ବଡ଼ ବିସ୍ଫୋରଣ ହୋଇଥିଲା । ସମସ୍ତ ଆହତଙ୍କୁ ପୁରୀ ସଦର ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ହେଲେ ସେଠାରେ ପର୍ଯ୍ୟାପ୍ତ ବର୍ଣ୍ଣ ୟୁନିଟ୍ ନଥିବାରୁ ଆହତଙ୍କୁ କଟକ ଏସ୍ସିବିକୁ ସ୍ଥାନାନ୍ତର କରାଯାଇଥିଲା ।
ଉଲ୍ଲେଖଯୋଗ୍ୟ, ଏମ୍ସ ଭୁବନେଶ୍ୱର ବର୍ଣ୍ଣ ୟୁନିଟ୍ରେ ୩୬ଟି ଶଯ୍ୟା ରହିଛି । ଯେଉଁଥିରେ ୬ଟି ଆଇସିୟୁ ବ୍ୟବସ୍ଥା ରହିଛି । ସେହିପରି ଏସ୍ସିବିରେ ମଧ୍ୟ ବର୍ଣ୍ଣ ୟୁନିଟ୍ରେ ୯ଟି ଶଯ୍ୟା ରହିଛି । କିନ୍ତୁ କ୍ୟାପିଟାଲ ହସ୍ପିଟାଲରେ ସ୍ୱତନ୍ତ୍ର ବର୍ଣ୍ଣ ୟୁନିଟ୍ ନାହିଁ ।
