ନୂଆଦିଲ୍ଲୀ,୦୧/୦୩: ଆଗାମୀ ଲୋକସଭା ନିର୍ବାଚନ ଓ କେତେକ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ଲାଗି ମୋଟ ୩ ଲକ୍ଷ ୪୦ ହଜାରରୁ ଅଧିକ କେନ୍ଦ୍ରୀୟ ବାହିନୀର ଯବାନଙ୍କୁ ମୁତୟନ କରାଯିବ । ସେଥିପାଇଁ ଦେଶର ଅତି ସମ୍ବେଦନଶୀଳ ଅଞ୍ଚଳରେ ଶୁକ୍ରବାରଠୁ ଅର୍ଥାତ ମାର୍ଚ୍ଚ ୧ରୁ କେନ୍ଦ୍ରୀୟ ବାହିନୀର ଯବାନଙ୍କୁ ମୁତୟନ ପ୍ରକିୟା ଆରମ୍ଭ ହୋଇଛି। ଅତି ସମ୍ବେଦନଶୀଳ ଅଞ୍ଚଳରେ ୨ ହଜାର କମ୍ପାନି କେନ୍ଦ୍ରୀୟ ବାହିନୀ (ପ୍ରାୟ ୧.୫ ଲକ୍ଷ ଯବାନ) ମୁତୟନ ହେବ ।
ମାର୍ଚ୍ଚ ପ୍ରଥମ ସପ୍ତାହ ସୁଦ୍ଧା ପଶ୍ଚିମବଙ୍ଗ, ଜମ୍ମୁ-କାଶ୍ମୀର ଓ ବାମପନ୍ଥୀ ଉଗ୍ରବାଦୀ ପ୍ରଭାବିତ ଅଞ୍ଚଳରେ କେନ୍ଦ୍ରୀୟ ବାହିନୀ ପହଞ୍ଚିବ । ସେହିଭଳି ଦ୍ୱିତୀୟ ପର୍ଯ୍ୟାୟ କେନ୍ଦ୍ରୀୟ ବାହିନୀର ମୁତୟନ ମାର୍ଚ୍ଚ ୭ରୁ ଆରମ୍ଭ ହେବ । ଏହା ପରେ ମାର୍ଚ୍ଚ ଦ୍ୱିତୀୟ ଓ ତୃତୀୟ ସପ୍ତାହ ସୁଦ୍ଧା ଅବଶିଷ୍ଟ ଅଞ୍ଚଳରେ କେନ୍ଦ୍ରୀୟ ବାହିନୀର ଯବାନଙ୍କୁ ପହଞ୍ଚାଇବାର ବ୍ୟବସ୍ଥା ହୋଇଛି ।
କେନ୍ଦ୍ରୀୟ ସଶସ୍ତ୍ର ବାହିନୀର ଜଣେ ବରିଷ୍ଠ ଅଧିକାରୀଙ୍କ ସୂଚନା ଅନୁସାରେ ମୁତୟନ ହେବାକୁ ଥିବା ଯବାନଙ୍କୁ ସମ୍ପୃକ୍ତ ଅଞ୍ଚଳ ସହ ପରିଚିତ କରାଇବା ଲାଗି ସମସ୍ତ କମାଣ୍ଡିଂ ଅଫିସରମାନଙ୍କୁ ନିର୍ଦ୍ଦେଶ ଦିଆଯାଇଛି । ନିର୍ବାଚନ କମିଶନଙ୍କ ଆଦେଶ ଓ କେନ୍ଦ୍ରୀୟ ବାହିନୀର ନିର୍ଦ୍ଦେଶ ଅନୁପାଳନ କରିବାକୁ ସେମାନଙ୍କୁ କୁହାଯାଇଛି । ଏହି କେନ୍ଦ୍ରୀୟ ବାହିନୀରେ ସିଆରପିଏଫ, ବିଏସ୍ଏଫ, ଆଇଟିବିପି, ସିଆଇଏସ୍ଏଫ ଏବଂ ଏସ୍ଏସ୍ବି ଯବାନ ସାମିଲ ଅଛନ୍ତି । ଲୋକସଭା ନିର୍ବାଚନ ସହିତ ଦେଶର ୪ଟି ରାଜ୍ୟରେ ବିଧାନସଭା ନିର୍ବାଚନ କରାଯିବ । ଏସବୁ ରାଜ୍ୟ ମଧ୍ୟରେ ରହିଛି ଓଡ଼ିଶା, ଆନ୍ଧ୍ରପ୍ରଦେଶ, ଅରୁଣାଚଳ ପ୍ରଦେଶ ଓ ସିକ୍କିମ । ମତଦାନକୁ ନିରପେକ୍ଷ ଓ ଅବାଧ କରିବା ଲାଗି ନିର୍ବାଚନ କମିଶନ କେନ୍ଦ୍ରୀୟ ବାହିନୀ ଓ ରାଜ୍ୟ ପୁଲିସର ମୋଟ ୩୪୦୦ କମ୍ପାନି ମାଗିଛନ୍ତି । ମାର୍ଚ୍ଚରେ ନିର୍ବାଚନ କମିଶନ ତାରିଖ ଘୋଷଣା କରିବାର ସମ୍ଭାବନା ରହିଛି।
