ନୂଆଦିଲ୍ଲୀ : ପଞ୍ଜାବ ପୁଲିସ କେନ୍ଦ୍ରୀୟ ଏଜେନ୍ସି ସହ ମିଳିତ ଅଭିଯାନରେ ଚଣ୍ଡିଗଡ଼ର ସେକ୍ଟର-୧୦ର ସ୍ଥିତି ଘର ଉପରକୁ ହ୍ୟାଣ୍ଡ ଗ୍ରେନେଡ ଫିଙ୍ଗିବା ମାମଲାରେ ମୁଖ୍ୟ ଅଭିଯୁକ୍ତକୁ କରିଛି ଗିରଫ। ଅମୃତସର ଗାଁ ପାସିଆ ନିବାସୀ ରୋହନ ମସିହକୁ ଖାନ୍ନାର ଅମଲୋହ ରୋଡ୍ ଅଞ୍ଚଳରୁ ଗିରଫ କରାଯାଇଛି । ସେ ଏଠାରେ ନିଜର ପରିଚିତ ଜଣେ ମହିଳାଙ୍କୁ ଘରକୁ ଆସିଥିଲା। ପଞ୍ଜାବର ଡିଜିପି ଗୌରବ ଯାଦବ ଏହି ସୂଚନା ଦେଇଛନ୍ତି ।
ଅଭିଯୁକ୍ତର କବଜାରୁ ଏକ ୯-ଏମଏମ ଗ୍ଲାକ୍ ବନ୍ଧୁକ ଓ ଗୋଳାବାରୁଦ ମଧ୍ୟ ଜବତ କରାଯାଇଛି। ଏହି ମଧ୍ୟରେ ଉକ୍ତ ମାମଲାରେ ଖଲିସ୍ତାନୀ ଆତଙ୍କୀ ଗୁରପତୱନ୍ତ ସିଂହ ପନ୍ନୁର ମଧ୍ୟ ଏଣ୍ଟ୍ରି ହୋଇଛି ଏବଂ ସେ ଅଭିଯୁକ୍ତଙ୍କୁ ସାହାଯ୍ୟ କରିବା କଥା କହିଛି।
ଜେରାରେ ରୋହନ ସ୍ୱୀକାର କରିଛି ଯେ, ୧୧ ସେପ୍ଟେମ୍ୱରରେ ଚଣ୍ଡିଗଡ଼ରେ ହୋଇଥିବା ଗ୍ରେନେଡ୍ ବିସ୍ଫୋରଣରେ ନିଜର ସଂପୃକ୍ତି ରହିଛି। ଅଭିଯୁକ୍ତ ରୋହନ ମସିହ ଗତ ୩ ଦିନ ହେବ ଗାଁରୁ ଗାଏବ ଥିଲା। ଆମେରିକାରେ ରହୁଥିବା ଆତଙ୍କୀ ହାପ୍ପି ପାସିଆ ଚଣ୍ଡିଗଡ଼ ସେକ୍ଟର -୧୦ର ଘରେ ହୋଇଥିବା ହମଲାରେ ନିଜର ସଂପୃକ୍ତି ଥିବା କହିଥିଲା। ସେ ମଧ୍ୟ ମୂଳ ରୂପେ ରୋହନ ମସିହର ଗାଁ ପାସିଆରେ ରୁହେ। ପୁଲିସ ଏହା ଜାଣିବାକୁ ପ୍ରୟାସ କରୁଛି କି, ରୋହନ ଆମେରିକା ସ୍ଥିତ ଆତଙ୍କବାଦୀ ହାପ୍ପି ପାସିଆ ସଂପର୍କରେ କେମିତି ଆସିଲା। ଶୁକ୍ରବାର ତାକୁ ଅମୃତସର କୋର୍ଟରେ ହାଜର କରାଯାଇଛି। କୋର୍ଟ ତାକୁ ୬ଦିନର ରିମାଣ୍ଡରେ ପଠାଇ ଦେଇଛନ୍ତି।
ଏହି ମାମଲାରେ ଏବେ ଶୁଖ୍ ଫର୍ ଜଷ୍ଟିସ୍ର ଆତଙ୍କୀ ଗୁରପତୱନ୍ତ ସିଂହ ପନ୍ନୁର ମଧ୍ୟ ଏଣ୍ଟ୍ରି ହୋଇଛି। ପନ୍ନୁ ପଞ୍ଜାବର ମୁଖ୍ୟମନ୍ତ୍ରୀ ଭଗୱନ୍ତ ମାନ ଓ ପଞ୍ଜାବ ପୁଲିସକୁ ଚ୍ୟାଲେଞ୍ଜ ଦେଇ ଧମକ ଦେଇଛି। ପନ୍ନୁ ନିଜର ନୂଆ ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ କରିଛି , ଯେଉଁଥିରେ ସେ ଚଣ୍ଡିଗଡ଼ ବ୍ଲାଷ୍ଟର ଅଭିଯୁକ୍ତଙ୍କର ଆଇନ ସହାୟତା କରବା କଥା କହିଛନ୍ତି। ପଞ୍ଜାବ ପୁଲିସର ଅଧିକାରୀଙ୍କ ପାଇଁ ମଧ୍ୟ ଆଗକୁ ଏମିତି ହିଁ ହମଲା କରିବାର ଚେତାବନୀ ଦେଇଛି।
