ଡେରାଡୁନ, ୧୬/୫:ବଦ୍ରିନାଥ କିମ୍ବା କେଦାରନାଥ ସମ୍ପର୍କରେ ନକଲି ଭିଡିଓ ,ଫଟୋ କିମ୍ବା ମିଥ୍ୟା ଖବର ସେୟାର କଲେ  ହେବ କଠୋର କାର୍ଯ୍ୟାନୁଷ୍ଠାନ । ଏନେଇ ନିର୍ଦ୍ଦେଶନାମା ଜାରି କରିଛନ୍ତି ଉତ୍ତରାଖଣ୍ଡ ସରକାର  । ସେ ଗତକାଲି ଅନୁଷ୍ଠିତ ଏକ ଉଚ୍ଚସ୍ତରୀୟ କମିଟିର ବୈଠକତେ ଏହି  ନିର୍ଦ୍ଦେଶନାମା ଜାରି କରିଛନ୍ତି। ଏଥିରେ ଚାରିଧାମ ଯାତ୍ରାକୁ ନେଇ କୌଣସି ବ୍ୟକ୍ତି ନକଲି ଭିଡିଓ କିମ୍ବା ଭୁଲ ଖବର ଅପପ୍ରଚାର କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ନିର୍ଦ୍ଦେଶ ଦେଇଛନ୍ତି । 

ତେବେ ଏନେଇ ଶାସନ ସଚିବ ରାଧା ରାତୁରୀ କହିଛନ୍ତି ଯେ,ଯଦି କୌଣସି ବ୍ୟକ୍ତି କିମ୍ବା ସଙ୍ଗଠନ ଏହି ପବିତ୍ର ଚାରିଧାମ ଯାତ୍ରାକୁ ବଦନାମ କରିବାକୁ ଚେଷ୍ଟା କରିବ ତା'ବିରୁଦ୍ଧରେ ମାମଲା ରୁଜୁ କରାଯିବ । ଗତ ମେ'୧୦ ତାରିଖରେ କେଦାରନାଥ ଧାମ,ଗଙ୍ଗୋତ୍ରୀ ଓ ଯମୁନେତ୍ରୀ ମନ୍ଦିରରେ ଦ୍ବାର ଖୋଲିବା ସହିତ ୧୨ ତାରିଖରେ ବଦ୍ରିନାଥ ଧାମର ଦ୍ବାର ଭକ୍ତଙ୍କ ପାଇଁ ଖୋଲିଛି । ଏନେଇ ଚାରି ଧାମରେ ଭକ୍ତଙ୍କ ଭିଡ ଜମୁଛି। ତେଣୁ  ଶାସନ ସଚିବ ରାଧା ରାତୁରୀ ଅଧିକାରୀମାନଙ୍କୁ ଦିନକୁ 24 ଘଣ୍ଟା ମୋବାଇଲ୍ ଫୋନ୍ କାର୍ଯ୍ୟକ୍ଷମ ରଖିବାକୁ ଏବଂ ତୀର୍ଥଯାତ୍ରୀଙ୍କ ଦ୍ୱାରା କରାଯାଇଥିବା ଯାତ୍ରା ସମ୍ବନ୍ଧୀୟ ଅଭିଯୋଗ ପ୍ରତି ଧ୍ୟାନ ଦେବାକୁ ନିର୍ଦ୍ଦେଶ ଦେଇଛନ୍ତି । ଏହା ବ୍ୟତୀତ ଜିଲ୍ଲାରେ ପୋଷ୍ଟିଂ କରାଯାଇଥିବା ସଚିବମାନଙ୍କୁ ଯାତ୍ରାର  ଗତିବିଧି ଉପରେ ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି ।