ଭୁବନେଶ୍ୱର,୧୧/୦୮: ବିବାହର ପ୍ରତିଶ୍ରୁତି ଦେଇ ସାରା ଦେଶରେ ମହିଳାଙ୍କୁ ଧୋକା ଦେଇଥିବା ଯାଜପୁରର ସତ୍ୟଜିତ୍‌ ସାମଲ ବିଷୟରେ ପୁଲିସ ବହୁ ବିସ୍ଫୋରକ ତଥ୍ୟ  ପାଇଛି । ତା’ ମହିଳା ସହଯୋଗୀକୁ ଠାବ କରିଛି କ୍ୟାପିଟାଲ୍‌ ଥାନା ପୁଲିସ୍‌ । ଯିଏ କି  ସତ୍ୟଜିତ୍‌ର କଳା କାରନାମା ବିଷୟରେ  ଜାଣି ମଧ୍ୟ ତା’ ସହଯୋଗୀ ସାଜିଥିଲା ।  ସତ୍ୟଜିତ୍‌ର ପତ୍ନୀ ଓ ପ୍ରେମିକାଙ୍କ  ବିଷୟରେ ଅବଗତ ଥିଲା । ସତ୍ୟଜିତ୍‌ ଠକେଇ କରୁଥିବା ଟଙ୍କାରେ ସେ ବିଦେଶ  ବୁଲୁଥିଲା । ସେ ସହଯୋଗୀ ହେଉଛନ୍ତି  ଭୁବନେଶ୍ୱର ପଟିଆ ଅଞ୍ଚଳର ସ୍ୱାତୀ  ନାମ୍ନୀ ମହିଳା । ପୁଲିସ୍‌ ତାଙ୍କୁ ଜେରା କରିବାକୁ ନୋଟିସ୍‌ କରିଛି ।   

ସତ୍ୟଜିତ୍‌ ଗିରଫ ହୋଇ ଜେଲ୍‌ ଗଲା  ପରେ ତା’ ଆକାଉଣ୍ଟରୁ ୫୦ ହଜାର  ଟଙ୍କା ଟ୍ରାନ୍ସଫର ହୋଇଥିଲା । କିଏ ଏହି  ଟଙ୍କା ଟ୍ରାନ୍ସଫର କରିଛି ? କାହା ପାଖକୁ  ଯାଇଛି? ସେ ବିଷୟରେ ଜାଣିବା ପାଇଁ  ପୁଲିସ୍‌ ବ୍ୟାଙ୍କ୍‌କୁ ତଥ୍ୟ ମାଗିଥିଲା । ଉକ୍ତ  ତଥ୍ୟରୁ ପୁଲିସ୍‌ ଜାଣିବାକୁ ପାଇଛି,  ପଟିଆ ମହାବୀର ନଗରରେ ରହୁଥିବା  ସ୍ୱାତୀଙ୍କ ଆକାଉଣ୍ଟକୁ ଟଙ୍କା ଟ୍ରାନ୍ସଫର  ହୋଇଛି । ପୁଲିସ୍‌ ସ୍ୱାତୀଙ୍କ ବିଷୟରେ  ଅଧିକ ତଥ୍ୟ ଜାଣିବା ପାଇଁ ସତ୍ୟଜିତ୍‌ର  ଫୋନ୍‌ ଯାଞ୍ଚ କରିଥିଲା । ମୋବାଇଲ୍‌ରେ  ‘ସ୍ୱାତୀ ପଟିଆ ୱାଇଫ୍‌’ ବୋଲି ନମ୍ବର  ସେଭ୍‌ ରହିଥିଲା । ଏହାପରେ ପୁଲିସ୍‌  ଅଧିକ ତଦନ୍ତ କରି ଜାଣିବାକୁ ପାଇଛି  ସ୍ୱାତୀକୁ ସତ୍ୟଜିତ୍‌କୁ କୋର୍ଟରେ ବିବାହ  କରିଛି । ଉକ୍ତ ବିବାହ ପ୍ରମାଣପତ୍ର ଜବତ  ବି ହୋଇଛି । ସତ୍ୟଜିତ୍‌ର କଳା ଦୁନିଆର  ସବୁ ଖବର ସେ ଜାଣିଛି । ସତ୍ୟଜିତ୍‌  ମହିଳା-ଯୁବତୀଙ୍କୁ ବିବାହ ପ୍ରତିଶ୍ରୁତି  ଦେଇ ଇଜ୍ଜତ ଓ ଟଙ୍କା ଲୁଟ୍‌ କରେ । ଉକ୍ତ  ଟଙ୍କାରେ ସ୍ୱାତୀ ଓ ସତ୍ୟଜିତ୍‌ ବିଦେଶରେ  ବୁଲୁଥିଲେ ।   

ଏ ସବୁ ବିଷୟରେ ଅଧିକ ତଥ୍ୟ  ପାଇଁ ପୁଲିସ୍‌ ସତ୍ୟଜିତ୍‌ ଓ ସ୍ୱାତୀଙ୍କୁ  ମୁହାଁମୁହିଁ ଜେରା କରିବ । ସେଥିପାଇଁ  ପୁଲିସ୍‌ ସତ୍ୟଜିତ୍‌ ପାଇଁ ୧୦ ଦିନ ରିମାଣ୍ଡ  ମାଗିଥିଲା । କୋର୍ଟ ୫ ଦିନ ରିମାଣ୍ଡ  ମଞ୍ଜୁର କରିଛନ୍ତି । ଶନିବାର ଠାରୁ  ତାକୁ ରିମାଣ୍ଡରେ ଆଣି ଜେରା ଅରମ୍ଭ  କରିଛି । ଜେରା ପାଇଁ ସ୍ୱାତୀକୁ ପୁଲିସ୍‌  ନୋଟିସ୍‌ କରିଛି । ତା’ଛଡ଼ା ଗତ ୩ ବର୍ଷ  ଭିତରେ ସତ୍ୟଜିତ୍‌ କେତେଥର ବିଦେଶ  ଯାଇଛି ସେ ସବୁ ଯାଞ୍ଚ କରିବ ପୁଲିସ୍‌ ।  ଅନ୍ୟପକ୍ଷରେ ସତ୍ୟଜିତ୍‌ ନାଁରେ  ପୁରୀରେ ଏକ ପ୍ଲଟ୍‌ ଠାବ ହୋଇଛି ।  ଠକେଇ ଟଙ୍କାରେ  ଉକ୍ତ ପ୍ଳଟ୍‌ କିଣା  ଯାଇଥିବା ପୁଲିସ୍‌  କହିଛି ।