ପ୍ୟାରିସ୍ ୨୯/୦୧: ଫ୍ରାନ୍ସରେ କୃଷକଙ୍କ ବିକ୍ଷୋଭ ପ୍ରଦର୍ଶନ ମଧ୍ୟରେ ଲୋୟର ମ୍ୟୁଜିୟମରେ ଏକ ଅଜବ ଘଟଣା ଘଟିଛି । ସେଠାରେ ଦୁଇ ପରିବେଶ କାର୍ଯ୍ୟକର୍ତ୍ତା ବିଶ୍ୱ ପ୍ରସିଦ୍ଧ ମୋନାଲିସା ପେଣ୍ଟିଂ ଉପରେ ସୁପ୍ ଫିଙ୍ଗିଛନ୍ତି । ପେଣ୍ଟିଂକୁ ବୁଲେଟପ୍ରୁଫ୍ କାଚ ମଧ୍ୟରେ ସୁରକ୍ଷିତ ଭାବେ ରଖାଯାଇଥିବାରୁ ଏହା କୌଣସି ପ୍ରକାରେ କ୍ଷତିଗ୍ରସ୍ତ ହୋଇନାହିଁ ।
ବିକ୍ଷୋଭକାରୀମାନେ କୃଷି ବ୍ୟବସ୍ଥାରେ ପରିବର୍ତ୍ତନ, ସୁସ୍ଥ ଏବଂ ଦୀର୍ଘସମୟ ପର୍ଯ୍ୟନ୍ତ ରହିପାରୁଥିବା ଖାଦ୍ୟ ଉତ୍ପାଦନ ଉପରେ ଗୁରୁତ୍ୱ ଦିଆଯିବା, ଇନ୍ଧନର ଦର ହ୍ରାସ ଆଦି ଲାଗି ଦାବି କରୁଛନ୍ତି । ବିରୋଧ ପ୍ରଦର୍ଶନ ଭିତରେ ଦୁଇ ପରିବେଶବିତ୍ଙ୍କ ଏହି କାର୍ଯ୍ୟ ସମସ୍ତଙ୍କୁ ଚକିତ କରିଥିଲା । ପରେ ମ୍ୟୁଜିୟମରେ ନିୟୋଜିତ ସୁରକ୍ଷାକର୍ମୀମାନେ ପେଣ୍ଟିଂ ଆଗରେ କଳା ପରଦା ଲଗାଇ ତାହାକୁ ଘୋଡ଼ାଇଥିଲେ ।
ପ୍ରକାଶଥାଉ କି, ୧୯୫୦ ଦଶକ ପ୍ରାରମ୍ଭରୁ ମୋନାଲିସା ପେଣ୍ଟିଂକୁ ସୁରକ୍ଷା ଗ୍ଲାସ୍ ମଧ୍ୟରେ ରଖାଯାଇଥିଲା । ଥରେ ଜଣେ ବ୍ୟକ୍ତି ପେଣ୍ଟିଂ ଉପରେ ଏସିଡ୍ ଫିଙ୍ଗିଦେଇଥିଲେ । ଏଥିଯୋଗୁ ପେଣ୍ଟିଂ କ୍ଷତିଗ୍ରସ୍ତ ମଧ୍ୟ ହୋଇଥିଲା । ଏହାପରଠାରୁ ଉକ୍ତ ପେଣ୍ଟିଂକୁ ବୁଲେଟ୍ପ୍ରୁଫ୍ ଗ୍ଲାସ୍ ମଧ୍ୟରେ ରଖାଯାଇଛି । ୨୦୨୨ରେ ଜଣେ କାର୍ଯ୍ୟକର୍ତ୍ତା ମୋନାଲିସା ପେଣ୍ଟିଂ ଉପରକୁ କେକ୍ ଫିଙ୍ଗି ଲୋକଙ୍କୁ ‘ପୃଥିବୀ ବାବଦରେ ଚିନ୍ତା କରିବାକୁ’ ଅପିଲ କରିଥିଲେ । ୧୯୧୧ରେ ମ୍ୟୁଜିୟମର ଜଣେ କର୍ମଚାରୀ ଭିନ୍ସେଞ୍ଜୋ ପେରୁଜିଆ ମ୍ୟୁଜିୟମରୁ ପେଣ୍ଟିଂ ଚୋରି କରିନେଇଥିଲେ । ଇଟାଲୀରେ ଏକ ବଜାରରେ ପେଣ୍ଟିଂକୁ ବିକ୍ରି ପାଇଁ ଉଦ୍ୟମବେଳେ ୧୯୧୩ରେ ତାହାକୁ ଉଦ୍ଧାର କରାଯାଇଥିଲା ।
