ଚୌଦ୍ୱାର-ଗୁରୁଡ଼ିଝାଟିଆ,୧୩/୦୯: ଜଣେ କି ଦୁଇ ଜଣ ନୁହନ୍ତି, ୪ ଜଣ ଅଧ୍ୟାପିକା କଲେଜର ଅଧ୍ୟକ୍ଷ (ପ୍ରିନ୍ସପାଲ) ଙ୍କ ବିରୋଧରେ ସଙ୍ଗିନ ଅଭିଯୋଗ ଆଣିଛନ୍ତି । ଅଧ୍ୟକ୍ଷ ସେମାନଙ୍କୁ ନିଜ ପ୍ରକୋଷ୍ଠକୁ ଡକାଇ ଅଶାଳୀନ ବ୍ୟବହାର କରିବା ସହ ଯୌନ ଓ ମାନସିକ ନିର୍ଯାତନା ଦେଉଥିବା କଥା ଦର୍ଶାଇ ଗୁରୁଡ଼ିଝାଟିଆ ଥାନାରେ ଏତଲା ଦେଇଛନ୍ତି । ଏହି ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
ଯୌନ ନିର୍ଯାତନା ଦିଆଯିବା ପରି ଏକ ଧର୍ତ୍ତବ୍ୟ ଅପରାଧ ଘଟଣାରେ ଥାନାରେ ପୀଡ଼ିତାମାନେ ଏତଲା ଦେବା ସତ୍ତେ୍ୱ ପୁଲିସ୍ ମାମଲା ରୁଜୁ ନକରିବା, କଲେଜ କର୍ମଚାରୀଙ୍କଠାରୁ ଆରମ୍ଭ କରି ଛାତ୍ରୀଙ୍କ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ଏତଲା ଦେବାର ୩ ଦିନ ପରେ ମଧ୍ୟ ମାମଲା ନହେବା ଦୁର୍ଭାଗ୍ୟଜନକ ବୋଲି ପୀଡ଼ିତା ଅଧ୍ୟାପିକାମାନେ କହିଛନ୍ତି । ଅଧ୍ୟକ୍ଷଙ୍କ ବିରୋଧରେ ଅପରାଧିକ ମାମଲା ରୁଜୁ ନହେବା ପଛରେ ପୁଲିସ ଚାପରେ ଥିବା ନେଇ ବି ଚର୍ଚ୍ଚା ହେଉଛି । ପୀଡ଼ିତା ଅଧ୍ୟାପିକାମାନେ ନିରାଶ ହୋଇ ଗୁରୁବାର ଏ ସଂପର୍କରେ ଏସ୍ପିଙ୍କୁ ଅବଗତ କରି ନ୍ୟାୟ ଭିକ୍ଷା କରିଛନ୍ତି । ଏପରି ବିବାଦୀୟ ସ୍ଥିତିରେ କଲେଜର ଅଧ୍ୟାପିକାଙ୍କ ସୁରକ୍ଷାକୁ ନେଇ ସେମାନଙ୍କ ପରିବାର ଲୋକେ ଆଶଙ୍କାରେ ରହିଛନ୍ତି ।
ଅଭିଯୋଗ ମୁତାବକ, ଗୁରୁଡ଼ିଝାଟିଆସ୍ଥିତ ଶ୍ରୀ ଶ୍ରୀ ଧବଳେଶ୍ୱର (ଏସ୍ଏସ୍ଡି) ମହାବିଦ୍ୟାଳୟର ୪ ଜଣ ଅଧ୍ୟାପିକାଙ୍କୁ କଲେଜ ଅଧ୍ୟକ୍ଷ ନିର୍ଯାତନା ଦେଇ ଆସୁଛନ୍ତି । ଖରାପ ଉଦ୍ଦେଶ୍ୟ ରଖି ସମ୍ପୃକ୍ତ ଅଧ୍ୟାପିକାମାନଙ୍କୁ କାର୍ଯ୍ୟକ୍ଷେତ୍ରରେ ହଇରାଣ କରୁଛନ୍ତି । ଅଧ୍ୟକ୍ଷଙ୍କ ନିର୍ଯାତନା ବଢ଼ିବାରୁ ବାଧ୍ୟ ହୋଇ ଅଧ୍ୟାପିକାମାନେ ମଝିରେ ଉପରିସ୍ଥ ଅଧିକାରୀଙ୍କୁ ଜଣାଇଥିଲେ । ତତ୍କାଳୀନ ଉପଜିଲ୍ଲାପାଳ ଘଟଣାର ତଦନ୍ତ କରିବା ପରେ ଅଧ୍ୟକ୍ଷଙ୍କୁ ନିଲମ୍ବିତ ବି କରାଯାଇଥିଲା । ପରବର୍ତ୍ତୀ ସମୟରେ ନିଲମ୍ବନ ଆଦେଶ ପ୍ରତ୍ୟାହାର ହେବା ପରେ ସେ ଉକ୍ତ କଲେଜରେ ପୁନର୍ବାର ଅଧ୍ୟକ୍ଷ ଦାୟିତ୍ୱରେ ଅବସ୍ଥାପିତ ହୋଇଥିଲେ । ଏତେ ସବୁ ସତ୍ତେ୍ୱ ଅଧ୍ୟକ୍ଷ ତାଙ୍କ ବଦଭ୍ୟାସ ଛାଡ଼ି ନଥିଲେ ବୋଲି ଅଧ୍ୟାପିକାମାନେ ଦର୍ଶାଇଛନ୍ତି ।
ସେମାନଙ୍କ ଅଭିଯୋଗ ଯେ, ଅଧ୍ୟକ୍ଷ ରାଗ ଶୁଝାଇବା ସହ ମନ୍ଦ ଉଦ୍ଦେଶ୍ୟ ପୂରଣ ପାଇଁ ଅନେକ ସମୟରେ ପୁରୁଷ କର୍ମଚାରୀଙ୍କ ସମ୍ମୁଖରେ ସେମାନଙ୍କୁ ଗାଳିମନ୍ଦ କରିଥାନ୍ତି । ଚଳପ୍ରଚଳ ସମୟରେ ଅନ୍ୟମାନଙ୍କୁ ଲଗାଇ ଅଧ୍ୟକ୍ଷ ଫଟୋ ଉଠାଇବା ସହ ପ୍ରକୋଷ୍ଠକୁ ଏକା ଡକାଇ ଅଶ୍ଳୀଳ ଇଙ୍ଗିତ କରିଥାନ୍ତି । ଖରାପ ବ୍ୟବହାର କରିବା ସହ ଯୌନ ନିର୍ଯାତନା ଓ ମାନସିକ ନିର୍ଯାତନା ଦେଇଥାନ୍ତି । ଏପରି ଆଚରଣରେ ଅତିଷ୍ଠ ହୋଇ ଗୁରୁଡ଼ିଝାଟିଆ ଥାନାରେ ଏତଲା ଦେବା ସହ ଅଧ୍ୟାପିକାମାନେ ସୁରକ୍ଷା ମାଗିଛନ୍ତି ।
ଅଭିଯୋଗ ସଂକ୍ରାନ୍ତରେ କଲେଜର ଅଧ୍ୟକ୍ଷ ଅଶୋକ ସାମନ୍ତରାୟ ପ୍ରତିକ୍ରିୟା ଦେଇ କହିଛନ୍ତି, ମୋ ବିରୋଧରେ ଏଭଳି ମିଛ ଅଭିଯୋଗ ହୋଇଛି । କର୍ତ୍ତବ୍ୟରେ ଅବହେଳା କରିବା ନେଇ ଅଭିଯୋଗକାରିଣୀଙ୍କୁ କାରଣ ଦର୍ଶାଇବାକୁ କହିବାରୁ ସେମାନେ ମିଛ ଅଭିଯୋଗ କରିଛନ୍ତି । ଅପରପକ୍ଷରେ, ଅଧ୍ୟାପିକାଙ୍କ ଏତଲା ସଂକ୍ରାନ୍ତରେ ଗୁରୁଡ଼ିଝାଟିଆ ଥାନା ଅଧିକାରୀ ପରେଶ କୁମାର ମହାନ୍ତି କହିଛନ୍ତି, ଏତଲା ପାଇବା ପରେ ଷ୍ଟେସନ୍ ଡାଏରୀ କରି ଘଟଣାର ତଦନ୍ତ କରୁଛି । କଲେଜ ଅଧ୍ୟକ୍ଷ ମଧ୍ୟ ଅଧ୍ୟାପିକାଙ୍କ ନାଁରେ ଏତଲା ଦେଇଛନ୍ତି । ଅଭିଯୋଗଗୁଡ଼ିକ କଲେଜ୍ର ଆଭ୍ୟନ୍ତରୀଣ ବିବାଦ । ତେଣୁ ଦୁଇଟିଯାକ ଏତଲାକୁ ନେଇ ଷ୍ଟେସନ୍ ଡାଏରୀ କରିଛୁ ।
