ଭୁବନେଶ୍ୱର,୨୫/୦୩: ବିଜେପି ରବିବାର ଓଡ଼ିଶାର ୧୮ଜଣ ଲୋକସଭା ପ୍ରାର୍ଥୀ ତାଲିକା ଘୋଷଣା କରିଥିବା ବେଳେ କଂଗ୍ରେସର ଆହୁରି ବିଳମ୍ବ ହେବ ବୋଲି ସୂଚନା ମିଳିଛି । ଆସନ୍ତା ୨୮ ତାରିଖରେ କଂଗ୍ରେସର କେନ୍ଦ୍ରୀୟ ନିର୍ବାଚନ କମିଟି (ସିଇସି) ବୈଠକ ବସିବ । ଦିନକରେ ଯଦି ପ୍ରାର୍ଥୀ ତାଲିକା ଚୂଡାନ୍ତ ନ ହୋଇପାରିବ, ତେବେ ୨୯ ତାରିଖରେ ବି ବୈଠକ ଚାଲିବ ।
ସେହିପରି ଆସନ୍ତା ୩୦ ଓ ୩୧ ତାରିଖରେ ଚୂଡ଼ାନ୍ତ ପ୍ରାର୍ଥୀ ତାଲିକାରେ ଯେଉଁମାନେ ସ୍ଥାନ ପାଇବେ, ସେମାନଙ୍କ ସହ ଏଆଇସିସି ପଦାଧିକାରୀ ୱାନ୍ ଟୁ ୱାନ୍ ଆଲୋଚନା କରିବେ ବୋଲି ବରିଷ୍ଠ କଂଗ୍ରେସ ନେତା ସୂଚନା ଦେଇଛନ୍ତି । ତେଣୁ ଚଳିତ ମାସ ଶେଷ ସୁଦ୍ଧା ବି କଂଗ୍ରେସ ଟିକଟ ଚୂଡାନ୍ତ ହେବା ନେଇ ସନ୍ଦେହ । ଏପ୍ରିଲ ପ୍ରଥମ ସପ୍ତାହକୁ କଂଗ୍ରେସର ଓଡ଼ିଶାର ପ୍ରଥମ ପ୍ରାର୍ଥୀ ତାଲିକା ଘୋଷଣା ହୋଇପାରେ ବୋଲି ବହୁ କଂଗ୍ରେସ ନେତା କହିଛନ୍ତି ।
ଅପରପକ୍ଷେ, ଶନିବାର କଂଗ୍ରେସ ଚତୁର୍ଥ ଲୋକସଭା ପ୍ରାର୍ଥୀ ଜାରି ହୋଇଥିବା ବେଳେ ଏଥିରେ ଓଡ଼ିଶାର ଜଣେ ହେଲେ ବି ପ୍ରାର୍ଥୀଙ୍କ ନାମ ସ୍ଥାନ ପାଇନି । ଆସାମ, ଆଣ୍ଡାମାନ, ଛତିଶଗଡ଼, ମଧ୍ୟପ୍ରଦେଶ, ମହରାଷ୍ଟ୍ର, ମଣିପୁର, ମିଜୋରମ, ରାଜସ୍ଥାନ, ତାମିଲନାଡ଼ୁ, ଉତ୍ତରପ୍ରଦେଶ, ଉତ୍ତରାଖଣ୍ଡ ଓ ପଶ୍ଚିମବଙ୍ଗର ମୋଟ ୪୬ଜଣ ଲୋକସଭା ପ୍ରାର୍ଥୀଙ୍କ ନାମ ରହିଛି । ସେହିପରି କଂଗ୍ରେସର ‘ଆଇଏନ୍ସି ସନ୍ଦେଶ’ରେ ସିକିମ ବିଧାନସଭାର ୩୨ ଆସନରୁ ୧୮ଟିରେ ପ୍ରାର୍ଥୀ ତାଲିକା ବି ଘୋଷଣା ହୋଇଥିଲେ ବି ଓଡ଼ିଶାର ବିଧାନସଭା ପ୍ରାର୍ଥୀ ତାଲିକା ବି ଆସିପାରିନି।
