ଆଳି,୦୮/୦୯: ଗୋଟିଏପଟେ, ବିବାହ ବେଦିରେ ବସିଥିଲେ ବରକନ୍ୟା । ଧୁମ୍ଧାମ୍ରେ ଚାଲିଥିଲା ବାହାଘର । ଭୋଜିଭାତରେ ମସ୍ଗୁଲ୍ ଥିଲେ ପୁଅଘର ଲୋକେ ଓ ସେମାନଙ୍କ ବନ୍ଧୁବାନ୍ଧବ । ଅନ୍ୟପଟେ, ଝିଅ ପକ୍ଷର ଲୋକେ ଶୁଦ୍ଧିକ୍ରିୟା କରୁଥିଲେ । ଝିଅର ଫଟୋରେ ଫୁଲମାଳ ଦେଇ ତାକୁ ଶୁଦ୍ଧି ହୋଇ, ଜ୍ଞାତିକୁଟୁମ୍ବଙ୍କୁ ଡାକି ପଂକ୍ତି ଭୋଜନ ଦେଉଥିଲେ । - ଏଭଳି ଅଭାବନୀୟ ଘଟଣା ଘଟିଛି କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ୍ ଅନ୍ତର୍ଗତ ଦେମାଳ ପଞ୍ଚାୟତର ନୂଆବଜାରରେ । ଏଭଳି ଘଟଣା ପୂର୍ବରୁ କେବେ ଘଟିନଥିବାରୁ ଅଞ୍ଚଳରେ ଏହା ଚର୍ଚ୍ଚାର ବିଷୟ ହୋଇଛି।
ମିଳିଥିବା ବିବରଣୀରୁ ପ୍ରକାଶ, ଅନନ୍ତ ମଳିକଙ୍କ ପୁଅ ରାଜେନ୍ଦ୍ର(୨୦) ତାଙ୍କ ପଡ଼ୋଶୀରେ ରହୁଥିବା ମୁନା ମଳିକଙ୍କ ଝିଅ ଦୀପାଞ୍ଜଳି(୧୯)ଙ୍କୁ ଭଲ ପାଉଥିଲେ । ଏହା ଜଣାପଡ଼ିବା ପରେ ଦୀପାଞ୍ଜଳିଙ୍କ ପରିବାର ଲୋକେ ଏ ସଂପର୍କକୁ ବିରୋଧ କରିଥିଲେ । ତେଣୁ ଦୁଇ ମାସ ତଳେ ରାଜେନ୍ଦ୍ର ଓ ଦୀପାଞ୍ଜଳି ଫେରାର ହୋଇ ଯାଇଥିଲେ । ଦୀପାଞ୍ଜଳିଙ୍କ ପରିବାର ଲୋକେ ବହୁ ଖୋଜାଖୋଜି କରିବା ପରେ ଝିଅର ସନ୍ଧାନ ପାଇ ତାକୁ ବୁଝାଶୁଝା କରି ଘରକୁ ନେଇ ଆସିଥିଲେ । ଗତ ସୋମବାର ପୁନର୍ବାର ଦୀପାଞ୍ଜଳି ରାଜେନ୍ଦ୍ରଙ୍କ ସହ ତାଙ୍କ ଘରକୁ ପଳାଇଥିଲେ । ଏହି ଘଟଣା ଥାନାକୁ ଯିବା ପରେ ସେଠାରେ ଆପୋସ ସମାଧାନ ପାଇଁ ଆଲୋଚନା ହୋଇଥିଲା । ଦୀପାଞ୍ଜଳି ତାଙ୍କ ପ୍ରେମିକ ରାଜେନ୍ଦ୍ରଙ୍କୁ ବିବାହ କରିବା ପାଇଁ ଜିଦ୍ ଧରିଥିଲେ । ଉଭୟ ସାବାଳକ ହୋଇଥିବାରୁ ପୁଲିସ କୌଣସି ସମାଧାନ କରି ପାରିନଥିଲା । ତେଣୁ ଦୀପାଞ୍ଜଳି ଆଉ ବାପଘରକୁ ନଫେରି ରାଜେନ୍ଦ୍ରଙ୍କ ସହ ତାଙ୍କ ଘରକୁ ଚାଲି ଯାଇଥିଲେ । ରାଜେନ୍ଦ୍ରଙ୍କ ପରିବାର ପକ୍ଷରୁ ଗତକାଲି ବିବାହର ଆୟୋଜନ କରାଯାଇଥିଲା । ବନ୍ଧୁବାନ୍ଧବଙ୍କ ଗହଣରେ ଧୁମ୍ଧାମ୍ରେ ବିବାହ ହୋଇଥିଲେ ମଧ୍ୟ କନ୍ୟାଘର ପକ୍ଷ ଲୋକ ଏଥିରେ ସାମିଲ ହୋଇନଥିଲେ । ଅପରପକ୍ଷରେ ଠିକ୍ ସେହି ସମୟରେ ଝିଅ ଘର ପରିବାର ପକ୍ଷରୁ ରାଗ, ଅଭିମାନରେ ଝିଅର ଶୁଦ୍ଧିକ୍ରିୟା କରାଯାଇଥିଲା । ଝିଅ ଦୀପାଞ୍ଜଳିଙ୍କ ଫଟୋରେ ଫୁଲମାଳ ପକାଇ ରୀତିନୀତି ମୁତାବକ ଶୁଦ୍ଧିକ୍ରିୟା କରାଯିବା ସହ ସାମିଆନା ଟାଙ୍ଗି କୁଟୁମ୍ବଙ୍କୁ ପଂକ୍ତି ଭୋଜନ ଦିଆଯାଇଥିଲା ।
ଏ ସଂପର୍କରେ ଦୀପାଞ୍ଜଳି କହିଛନ୍ତି, ମୁଁ ରାଜେନ୍ଦ୍ରଙ୍କୁ ଭଲ ପାଉଥିଲି । ଘର ଲୋକେ ବିରୋଧ କରିବାରୁ ମୁଁ ପ୍ରଥମ ଥର ତାଙ୍କ ସହ ଚାଲିଯିବା ପରେ ଘର ଲୋକେ ମୋତେ ଫେରାଇ ଆଣିଥିଲେ । ସେମାନେ ମୋ ଇଚ୍ଛା ବିରୋଧରେ ମୋତେ ଅନ୍ୟତ୍ର ବିବାହ କରାଇ ଦେବାକୁ ଉଦ୍ୟମ କରୁଥିବା ଜାଣି ମୁଁ ପୁଣି ରାଜେନ୍ଦ୍ରଙ୍କ ସହ ତାଙ୍କ ଘରକୁ ପଳାଇଥିଲି । ମୁଁ ବଞ୍ଚି ଥାଉ ଥାଉ ମୋ ପରିବାର ଲୋକେ ମୋତେ ଶୁଦ୍ଧି ହୋଇ ପଡ଼ିବା ମୋତେ ବହୁତ କଷ୍ଟ ଦେଇଛି ।
ଅନ୍ୟପକ୍ଷରେ, ଦୀପାଞ୍ଜଳିଙ୍କ ଦାଦା ବାବୁଲି ମଳିକ କହିଛନ୍ତି, ଆମେ ଯେତେ ବୁଝାଇଲେ ମଧ୍ୟ ଝିଅ ଆମ କଥା ନମାନିବା ଆମକୁ ଦୁଃଖ ଦେଇଥିଲା । ସେହିଭଳି ପୁଅ ଘର ଲୋକେ ମଧ୍ୟ ଆମ କଥା ଶୁଣିନଥିଲେ । ଝିଅର ଏଭଳି କାମ ସାଙ୍ଗକୁ ପୁଅ ଘର ଲୋକେ ଆମ ଘର ଆଗରେ ଡିଜେ ବଜାଇ, ବାଣ ଫୁଟାଇ ରୋଷଣି କରି ବାହାଘର କରିବା ଆମକୁ ଖୁବ୍ ବାଧିଥିଲା । ତେଣୁ ପରିବାରର ଅନ୍ୟ ଝିଅମାନଙ୍କୁ ଶିକ୍ଷା ଦେବା ଏବଂ ଦୀପାଞ୍ଜଳି ଓ ତା’ର ଶାଶୂଘର ପରିବାର ସହ ସବୁ ସମ୍ପର୍କ ଛିନ୍ନ କରିବା ପାଇଁ ଆମେ ଏପରି କରିଛୁ ।
