ମସ୍କୋ,୧୯/୦୪: ୪ ବର୍ଷ ହେଲା ନିଖୋଜ ଥିବା ଜର୍ମାନ୍-ଆମେରିକୀୟ ଅରବପତି କାର୍ଲ-ଏରିଭାନ୍ ହାଉବଙ୍କୁ ରୁଷ୍ରେ ଠାବ କରାଯାଇଛି । ହାଉବଙ୍କୁ ଶେଷଥର ପାଇଁ ୨୦୧୮ ଏପ୍ରିଲରେ ସ୍ୱିଜରଲାଣ୍ଡର ଜର୍ମେଟରେ ଦେଖିବାକୁ ମିଳିଥିଲା । ସେ ସେତେବେଳେ ସେଠାରେ ଛୁଟି କଟାଉଥିଲେ । ସେ ନିଖୋଜ ହୋଇଯିବା ନେଇ ଖବର ସାମ୍ନାକୁ ଆସିବା ପରେ ସ୍ୱିଜରଲାଣ୍ଡ ଓ ଜର୍ମାନୀ ସରକାର ତଲାସୀ ଅଭିଯାନ ଆରମ୍ଭ କରିଥିଲେ । ତାଙ୍କୁ ଖୋଜିବା ପାଇଁ ୫ଟି ହେଲିକପ୍ଟର ୬ ଦିନ ଧରି ଘୂରି ବୁଲିଥିଲା ।
ତଲାସୀ ଅଭିଯାନରେ ହାଉବ ନ ମିଳିବାରୁ ୨୦୨୧ରେ ଜର୍ମାନୀର ଏକ ଅଦାଲତ ତାଙ୍କୁ ଆଇନଗତ ଭାବେ ମୃତ ଘୋଷିତ କରିଥିଲେ । ହାଉବ ଅଗ୍ରଣୀ ଖୁଚୁରା କମ୍ପାନି ଟେଞ୍ଜେଲ୍ମ୍ୟାନ୍ ଗ୍ରୁପର ମାଲିକ । ଏହି କମ୍ପାନିର କାରବାର ସାରା ବିଶ୍ୱକୁ ଲମ୍ବିଛି । କମ୍ପାନିରେ ୭୫ ହଜାରରୁ ଅଧିକ କର୍ମଚାରୀ କାର୍ଯ୍ୟରତ । ଅଦାଲତଙ୍କ ନିଷ୍ପତ୍ତି ପରେ କମ୍ପାନିକୁ ତାଙ୍କ ଭାଇ ଖ୍ରୀଷ୍ଟିଆନ୍ ହାଉବ ଚଳାଉଛନ୍ତି । ହାଉବଙ୍କର ଦୁଇ ସନ୍ତାନ ରହିଛନ୍ତି ।
ହାଉବ ଯେଉଁଦିନ ନିଖୋଜ ହୋଇଥିବା ଖବର ଆସିଥିଲା, ସେହିଦିନ ସେ ତାଙ୍କ ବାନ୍ଧବୀ ଭେରୋନିକା ଏର୍ମିଲୋଭାଙ୍କୁ ୧୩ ଥର ଫୋନ୍ କରିଥିଲେ ଏବଂ ଘଣ୍ଟାଏ ପର୍ଯ୍ୟନ୍ତ କଥା ହୋଇଥିଲେ । ଏହାକୁ ନେଇ ସ୍ୱିଜରଲାଣ୍ଡ ଓ ଜର୍ମାନୀର ସଂଯୁକ୍ତ ଏଜେନ୍ସିର ସନ୍ଦେହ ଉପୁଜିଥିଲା । ଏହାପରେ ଏଜେନ୍ସି ସେଠାରେ ପହଞ୍ଚି ଜାଣିବାକୁ ପାଇଥିଲା ଯେ ହାଉବ ନିଜ ବାନ୍ଧବୀଙ୍କ ସହ ସେଠାରେ ରହୁଛନ୍ତି ।
ତଦନ୍ତ ଏଜେନ୍ସିର ସୂଚନା ମୁତାବକ ୨୦୦୮ରେ ୬୪ ବର୍ଷୀୟ ହାଉବ ଏବଂ ଏର୍ମିଲୋଭା ମିଶି ଷଡ଼ଯନ୍ତ୍ର ରଚିଥିଲେ । ଏହାପରେ ହାଉବ ବାରମ୍ବାର ରୁଷ୍ ଗସ୍ତ କରିଥିଲେ । ୨୦୧୮ ଏପ୍ରିଲ ୭ରେ ସେ ଏକ ପାହାଡ଼ରେ ଚଢ଼ୁଥିବା ବେଳେ ନିଖୋଜ ହୋଇଯାଇଥିଲେ । ସ୍ୱିଜରଲାଣ୍ଡର ସେ ଯେଉଁ ହୋଟେଲରେ ରହୁଥିଲେ ସେଠାକୁ ନ ଫେରିବାରୁ ସନ୍ଦେହ ଉପୁଜିଥିଲା । ତେବେ ସେ ନିଜେ ତାଙ୍କ ମୃତ୍ୟୁ ନେଇ ମିଥ୍ୟା ଖବର ପ୍ରସାରଣ କରିଥିବା କୁହାଯାଉଛି । ତାଙ୍କ ବାନ୍ଧବୀ ଏର୍ମିଲୋଭା ରୁଷ୍ର ସିକ୍ୟୁରିଟି ଏଜେନ୍ସି ଏଫ୍ଏସ୍ବିରେ କାମ କରୁଛନ୍ତି । ଏବେ ତାଙ୍କ ସହ ହାଉବ ରୁଷ୍ରେ ରହୁଛନ୍ତି । ଏର୍ମିଲୋଭା ଓ ହାଉବଙ୍କୁ ନିକଟରେ ଏକତ୍ର ଠାବ କରାଯାଇଥିଲା ।
ଘଟଣା ଭିନ୍ନ ମୋଡ଼ ନେବା ପରେ ୪୪ ବର୍ଷୀୟା ଏର୍ମିଲୋଭା ତଦନ୍ତ ପରିସରକୁ ଆସିଛନ୍ତି । ତେବେ ସେ କହିଛନ୍ତି, ହାଉବଙ୍କ ସହ ତାଙ୍କର କେବଳ ବ୍ୟବସାୟ ସମ୍ପର୍କ ରହିଛି । ମସ୍କୋରେ ମୁଁ ତାଙ୍କ ସହ ଏକାଠି ରହୁଥିବା ଖବର ମିଛ । ମୁଁ ଜଣେ ବିବାହିତା ମହିଳା । ମୋର ଏକ ସନ୍ତାନ ବି ଅଛି । ରିପୋର୍ଟ ମୁତାବକ ୨୦୦୮ ଜୁଲାଇରେ ଉଭୟଙ୍କୁ ରୁଷ୍ର ମସ୍କୋ ଓ ସୋଚିରେ ଏକାଠି ଦେଖିବାକୁ ମିଳିଥିଲା । ୨୦୦୯ ମେ’ରେ ଉଭୟ ଗୋଟିଏ ଟ୍ରେନ୍ରେ ମସ୍କୋରୁ ସେଣ୍ଟ ପିଟର୍ସବର୍ଗ ଯାତ୍ରା କରିଥିଲେ । ଏମିତି କି ଏହାପରେ ୨୦୧୦ରେ ଓମ୍ସ୍କ, ୨୦୧୧ରେ ସୋଚି, ୨୦୧୪ରେ ବାକୁ ଏବଂ ୨୦୧୫ ଓ ୨୦୧୭ରେ ମସ୍କୋରେ ଉଭୟଙ୍କୁ ଦେଖିବାକୁ ମିଳିଥିଲା । ତେବେ କ’ଣ ପାଇଁ ଉଭୟଙ୍କୁ ଏକାଠି ବାରମ୍ବାର ଦେଖିବାକୁ ମିଳିଥିଲା, ତାହା ସ୍ପଷ୍ଟ ହୋଇନାହିଁ ।
