ନୂଆଦିଲ୍ଲୀ: ଭାରତରେ ସାଧାରଣ ନିର୍ବାଚନ ପରେ ପଡୋଶୀ ଦେଶ ସହ ସମ୍ପର୍କ ସୁଦୃଢ ହେବ ବୋଲି ଆଶା ପ୍ରକଟ କରିଛନ୍ତି ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖାୱାଜା ଆସିଫ । ତେବେ କିଛି ଦିନ ପୂର୍ବରୁ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ସିଙ୍ଗାପୁରରେ କହିଥିଲେ ଯେ, ପାକିସ୍ତାନ ଆତଙ୍କବାଦକୁ "ଶିଳ୍ପ ଭଳି" ପ୍ରାୟୋଜିତ କରୁଛି । ଆଉ ଏଭଳି ସ୍ଥଳେ ଆତଙ୍କବାଦୀଙ୍କ ସମସ୍ୟାକୁ ଅଣଦେଖା କରିବା ପାଇଁ ଭାରତ ଆଉ କୌଣସି ମନୋଭାବରେ ନାହିଁ ବୋଲି ସେ କହିଥିଲେ ।
ଇସଲାମାବାଦରେ ସଂସଦ ଭବନ ବାହାରେ ସାମ୍ବାଦିକ ମାନଙ୍କ ସହ କଥାବାର୍ତ୍ତା କରି ଖାୱାଜା ଆସିଫ ସୋମବାର କହିଛନ୍ତି ଯେ, ନିର୍ବାଚନ ପରେ ଭାରତ ସହ ଆମର ସମ୍ପର୍କ ସୁଦୃଢ ହୋଇପାରିବ । ସେ କହିଛନ୍ତି ଯେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କର ନିଜସ୍ୱ “ପୃଷ୍ଠଭୂମି” ରହିଛି । ଆଫଗାନିସ୍ତାନ ବିଷୟରେ ଆଲୋଚନା କରି ପ୍ରତିରକ୍ଷା ମନ୍ତ୍ରୀ ଆସିଫ କହିଛନ୍ତି ଯେ, ସେ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ସହିତ ଆଫଗାନିସ୍ତାନ ଗସ୍ତ କରିଛନ୍ତି ଏବଂ ଆତଙ୍କବାଦକୁ ବନ୍ଦ କରିବା ପାଇଁ ସେଠାରେ ତାଲିବାନ ସରକାରଙ୍କୁ ଅନୁରୋଧ କରିଛନ୍ତି ।
‘ଜିଓ ନ୍ୟୁଜ୍’ ଖବର ଅନୁଯାୟୀ ଆସିଫ କହିଛନ୍ତି ଯେ, କାବୁଲ ଦ୍ବାରା ପ୍ରସ୍ତାବିତ ସମାଧାନ ବ୍ୟବହାରିକ ଭାବରେ ସମ୍ଭବ ନୁହେଁ । ଆସିଫ ଆହୁରି ମଧ୍ୟ କହିଛନ୍ତି ଯେ, ଆଫଗାନିସ୍ତାନର ଅନ୍ତରୀଣ ସରକାରଙ୍କ ପାକିସ୍ତାନ ପ୍ରତି ଥିବା ମନୋଭାବରେ ପରିବର୍ତ୍ତନ ହେତୁ ପଡୋଶୀ ଦେଶ ପାଇଁ ଆମର ବିକଳ୍ପ ଦିନକୁ ଦିନ ହ୍ରାସ ପାଉଛି । ପାକିସ୍ତାନ ସର୍ବଦା ଆଫଗାନିସ୍ତାନ ସହ ଛିଡା ହୋଇଛି, ସେମାନଙ୍କ ପାଇଁ ବଳିଦାନ ଦେଇଛି ଏବଂ ଏପର୍ଯ୍ୟନ୍ତ ପହଞ୍ଚିବା ପାଇଁ ସେମାନଙ୍କ ସହ ଯୁଦ୍ଧ ମଧ୍ୟ କରିଛି ।
