ନୂଆଦିଲ୍ଲୀ,୫।୯: ସାରା ବିଶ୍ବର ବ୍ୟକ୍ତି ଓ ଘଟଣାକୁ ବିସୃତ ଭାବରେ ସୂଚନା ଦେଉଥିବା ଓ୍ବେବସାଇଟ୍ ଓ୍ବିକିପିଡିଆକୁ ଦିଲ୍ଲୀ ହାଇକୋର୍ଟଙ୍କ କଡା ଭର୍ତ୍ସନା। କୋର୍ଟ ନ୍ୟୁଜ୍ ଏଜେନ୍ସି ଏଏନ୍ଆଇ ବିଷୟରେ ସୂଚନା ଦେଇଥିବା ପେଜ୍ରେ ସଂଶୋଧନ କରାଯିବା ମାମଲାରେ ଓ୍ବିକିପିଡିଆକୁ କଡା ଭର୍ତ୍ସନା କରିଛନ୍ତି। ଖଣ୍ଡପୀଠ କହିଛନ୍ତି, ଯଦି ଆପଣ ଭାରତକୁ ପସନ୍ଦ କରନ୍ତି ନାହିଁ ତେବେ ଏଠାରେ କାମ ମଧ୍ୟ କରନ୍ତୁ ନାହିଁ। କୋର୍ଟ କହିଛନ୍ତି, ଆମେ ସରକାରଙ୍କୁ ଓ୍ବିକିପିଡିଆାକୁ ଭାରତରେ ବ୍ଲକ କରିବାକୁ କହିବୁ। ଏହା ସହ ହାଇକୋର୍ଟ ଓ୍ବିକିପିଡିଆକୁ ଅବମାନନା ନୋଟିସ୍ ଜାରି କରିଛନ୍ତି ଓ ପଚାରିଛନ୍ତି ସେ ଖଣ୍ଡପୀଠର ସେହି ନିର୍ଦେଶକୁ କାହିଁକି ପାଳନ କଲା ନାହିଁ, ଯେଉଁଥିରେ କୁହାଯାଇଥିଲା ସେହି ଲୋକଙ୍କ ବିଷୟରେ ସୂଚନା ଦିଆଯାଉ। ଯେଉଁ ଲୋକମାନେ ଏଏନ୍ଆଇର ପେଜ୍ରେ ପରିବର୍ତ୍ତନ କରିଛନ୍ତି।
ଉଲ୍ଲେଖନୀୟ ଯେ, ନ୍ୟୁଜ ଏଜେନ୍ସି ଏନଏନ୍ଆଇ ଓ୍ବିକିପିଡିଆ ବିରୋଧରେ ମାନହାନୀ ମାମଲା ରୁଜୁ କରିଥିଲା। ଏଜେନ୍ସିର କହିବା ଅନୁସାରେ, ଏ ବିଷୟରେ ଦିଆଯାଇଥିବା ସୂଚନାରେ ଯେଉଁ ସଂଶୋଧନ କରାଯାଇଛି, ତାହା ମାନହାନୀ କରୁଛି। ଏଜେନ୍ସି ବିଷୟରେ କେହି ଓ୍ବିକିପିଡିଆ ପେଜ୍ରେ ସଂଶୋଧନ କରି ଲେଖିଛନ୍ତି ସେଠାରେ ଥିବା ସରକାରଙ୍କ ଏହା ଏକ ପ୍ରୋପାଗଣ୍ଡା ଟୁଲ। ମାମଲାର ଶୁଣାଣି କରି କୋର୍ଟ ଓ୍ବିକିପିଡିଆକୁ ନିର୍ଦେଶ ଦେଇଥିଲେ ସେହି ୩ ଜଣ ଲୋକଙ୍କ ବିଷୟରେ ସୂଚନା ଦିଅନ୍ତୁ, ଯେଉଁମାନେ ପେଜ୍ରେ ପରିବର୍ତ୍ତନ କରିଥିଲେ। ଏହି ମାମଲାରେ କୌଣସି ପଦକ୍ଷେପ ନେଇନଥିବାରୁ ଏଜେନ୍ସି ଗୁରୁବାର ମାନହାନୀ ମାମଲା ହାଇକୋର୍ଟରେ ଦାଖଲ କରିଛି।
ଏହା ଉପରେ ଓ୍ବିକିପିଡିଆର ଓକିଲ କହିଛନ୍ତି, ଆମକୁ କୋର୍ଟରେ ହାଜର ହେବା ପାଇଁ ସମୟ ଦିଅନ୍ତୁ, କାରଣ ଓ୍ବିକିପିଡିଆର କାମ ଭାରତରୁ ପରିଚାଳିତ ହୁଏନି। ଏହା ଉପରେ ଜଷ୍ଟିସ୍ ନବୀନ ଚାଓ୍ବଲା କଡା ଆପତ୍ତି କରିଛନ୍ତି। ସେ କହିଛନ୍ତି, ପୂର୍ବରୁ ମଧ୍ୟ ଓ୍ବିକିପିଡିଆ ଏହି ଦଲିଲ୍ ଦେଇଥିଲା, ଏଭଳି ସ୍ଥିତିରେ ଏହାକୁ ଖାରଜ କରାଯାଉଛି। ଖଣ୍ଡପୀଠ ଓ୍ବିକିପିଡିଆକୁ କହିଛନ୍ତି, ଆପଣଙ୍କ ବିରୋଧରେ ଅବମାନନା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରେ। ଆମେ ଆପଣଙ୍କ ଉପରେ ଅବମାନନା ଆକ୍ସନ ନେବୁ। ମାମଲା ଏହି କଥା ଉପରେ ନୁହେଁ ଯେ, ଓ୍ବିକିପିଡିଆ ଭାରତରୁ ଚାଲୁଛି କି ନାହିଁ। ଆମେ ଏଠାରେ ଆପଣଙ୍କ ବିଜନେସ୍ ବନ୍ଦ କରିଦେବୁ। ସରକାରଙ୍କୁ କହିବୁ ଭାରତରେ ଓ୍ବିକିପିଡିଆକୁ ବ୍ଲକ କରି ଦିଆଯାଉ।
