ମୁମ୍ବାଇ,୫।୬: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଲୋକସଭା ନିର୍ବାଚନରେ ବିଜେପି ଭଲ ପ୍ରଦର୍ଶନ ନକରିବା ପାଇଁ ନିଜକୁ ଦାୟୀ କରିଛନ୍ତି। ଏଥିପାଇଁ ସେ ଇସ୍ତଫା ଦେବାକୁ ଚାହାନ୍ତି ବୋଲି କହିଛନ୍ତି। ସେ ବୁଧବାର ଗଣମାଧ୍ୟମ ସହିତ କଥା ହୋଇ କହିଛନ୍ତି ଆମକୁ ମହାବିକଶ ଅଘାଡିର ତିନି ପାର୍ଟି ବ୍ୟତୀତ ନ୍ୟାରେଟିଭ୍ରୁ ମଧ୍ୟ ଲଢିବାକୁ ପଡିଛି। ଦେବେନ୍ଦ୍ର ଫଡନାଭିସ୍ କହିଛନ୍ତି, ଶୀର୍ଷ ନେତାଙ୍କୁ କହିବି ମୋତେ ସରକାରଙ୍କ କାମରୁ ମୁକ୍ତ କରି ଦିଆଯାଉ।
ଫଡନାଭିସ୍ କହିଛନ୍ତି, ମୁଁ ପଳାଇ ଯାଉଥିବା ଲୋକ ନୁହେଁ। ଏହି ପରାଜୟ ପାଇଁ ନିଜକୁ ଦାୟୀ କରୁଛି। ଜନତାଙ୍କ ଭିତରକୁ ଯିବୁ ଓ ନୂଆ ଭାବରେ କାମ କରିବୁ। ମୁଁ ଚାହୁଁଛି ବିଜେପି ସଂଗଠନକୁ ମଜବୁତ କରିବାରେ ଲାଗୁ। ବିଜେପିର ମହାରାଷ୍ଟ୍ର ୟୁନିଟ୍ର ମିଟିଂ ପରେ ସେ ଏହି କଥା କହିଛନ୍ତି। ବୁଧବାର ବିଜେପି ନେତାଙ୍କ ବୈଠକ ହୋଇଥିଲା, ଯେଉଁଥିରେ ଲୋକସଭା ନିର୍ବାଚନରେ ଆସିଥିବା ଫଳାଫଳ ଉପରେ ମନ୍ଥନ କରାଯାଇଥିଲା।
ରାଜ୍ୟ ବିଜେପି ମାତ୍ର ୯ଟି ଆସନରେ ଜିତିଛି। ସେଭଳି ୨୦୧୯ରେ ବିଜେପିକୁ ରାଜ୍ୟରେ ୨୩ଟି ଆସନରେ ଜିତିଛି। ବିଜେପିକୁ ଏଥର ଲୋକସଭା ନିର୍ବାଚନରେ ୨୪୦ଟି ଆସନ ମିଳିଛି। ୟୁପି,ମହାରାଷ୍ଟ୍ର, ପଶ୍ଚିମବଙ୍ଗ ଓ ରାଜସ୍ଥାନ ଭଳି ରାଜ୍ୟରେ ବିଜେପିକୁ ବଡ ଝଟକା ଲାଗିଛି। ସେହି ରାଜ୍ୟରୁ ମିଳିଥିବା ଝଟକା କାରଣରୁ ବିଜେପି ବହୁମତଠାରୁ ଦୂରେଇ ଯାଇଛି।