କୁତ୍ରା, ୨୦/୪ : ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକର ବିଭିନ୍ନ ଅଞ୍ଚଳରେ ଝାଡାବାନ୍ତି ବ୍ୟାପିଛି। କୁତ୍ରା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ୩୦ରୁ ଉର୍ଦ୍ଧ୍ବ ଆକ୍ରାନ୍ତ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି। ତେବେ ଝାଡ଼ାବାନ୍ତି ବ୍ୟାପିବାର କାରଣ ଜଣାପଡ଼ି ନାହିଁ। ବହୁ ଲୋକ ନିଜ ଘରେ ଔଷଧ ଖାଇ ଚିକିତ୍ସିତ ହେଉଥିବା ଜଣାପଡ଼ିଛି। 

ସ୍ୱାସ୍ଥ୍ୟକେନ୍ଦ୍ର ଅଧିକାରୀ ଡ ଶ୍ରୀକାନ୍ତ ଟପ୍ପୋଙ୍କ ସୂତ୍ରରୁ ପ୍ରକାଶ ଯେ, ଗତ ୨ ଦିନ ହେଲା କୁତ୍ରା ବ୍ଲକ ଅନ୍ତର୍ଗତ ନୂଆଗାଁ, ଜଉରାମୁଣ୍ଡା, ପଞ୍ଚରା,ଏଲଗା, ପଙ୍ଗନିଆବାହାଲ, ଝରେନ ଆଦି ଗ୍ରାମାଞ୍ଚଳରୁ ଝାଡାବାନ୍ତିରେ ଆକ୍ରାନ୍ତ ହୋଇ ଅନେକ ଚିକିତ୍ସା ହେବା ପାଇଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆସୁଛନ୍ତି। ଆଜି ପ୍ରାୟ ୩୦ରୁ ଉର୍ଦ୍ଧ୍ବ ଆକ୍ରାନ୍ତ ଏଠାରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି। ଅନ୍ୟପକ୍ଷରେ ଅନେକ ଆକ୍ରାନ୍ତ ନିଜ ନିଜ ଘରେ ରହି ଔଷଧ ଖାଉଛନ୍ତି। ବିଭିନ୍ନ ସ୍ଥାନରେ ଏହି ଝାଡାବାନ୍ତି ଦେଖା ଦେଇଥିବାରୁ ଏହା ବ୍ୟାପିବାର କାରଣ ସଂପର୍କରେ ଜଣାପଡି ନାହିଁ। ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପକ୍ଷରୁ ଲୋକେ ଆକ୍ରାନ୍ତ ହେଉଥିବା ଅଞ୍ଚଳ ପ୍ରତି ଦୃଷ୍ଟି ରଖାଯିବା ସହ ଜଳଛତ୍ର ଖୋଲାଯାଇ ଓଆରଏସ ପାଣି ବଣ୍ଟନ କରାଯାଇ ସଚେତନ କରାଯାଉଛି। ହେଲେ ଏହି ଝାଡାବାନ୍ତିର ପ୍ରକୋପ ନିୟନ୍ତ୍ରଣରେ ଥିବା ସ୍ୱାସ୍ଥ୍ୟକେନ୍ଦ୍ର ଅଧିକାରୀ ଡ ଶ୍ରୀକାନ୍ତ ଟପ୍ପୋ ପ୍ରକାଶ କରିଛନ୍ତି।