ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪ ପୂର୍ବରୁ କଂଗ୍ରେସର ମୁଖପାତ୍ର ରଣଦୀପ ସିଂହ ସୁରଜେଓ୍ବାଲାଙ୍କୁ ବଡ଼ ଝଟକା ଲାଗିଛି । ଭାରତୀୟ ନିର୍ବାଚନ ଆୟୋଗ ତାଙ୍କର ନିର୍ବାଚନ ପ୍ରଚାର ଉପରେ ରୋକ ଲଗାଇଛନ୍ତି । ବିଜେପି ସାଂସଦ ପ୍ରାର୍ଥୀ ହେମା ମାଳିନୀଙ୍କ ଉପରେ ବିବାଦୀୟ ଟିପ୍ପଣୀ ଦେଇଥିବା ନେଇ ଅଭିଯୋଗ ପରେ କଂଗ୍ରେସ ନେତାଙ୍କ ବିରୋଧରେ ନିର୍ବାଚନ ଆୟୋଗ ଆକ୍ସନ ନେଇଛନ୍ତି । ସୁରଜେଓ୍ବାଲା ନିର୍ବାଚନ ପ୍ରଚାର କରିପାରିବେ ନାହିଁ ଏବଂ ମିଡିଆରେ ସାକ୍ଷାତକାର ଦେଇପାରିବେ ନାହିଁ । ତେବେ କଂଗ୍ରେସ ନେତା ସୁରଜେଓ୍ବାଲାଙ୍କ ଉପରେ ୪୮ ଘଣ୍ଟାର ବ୍ୟାନ ଲଗାଇଛନ୍ତି ନିର୍ବାଚନ ଆୟୋଗ ।
ଭାରତୀୟ ସମ୍ବିଧାନର ଅନୁଚ୍ଛେଦ ୩୨୪ ଏବଂ ଅନ୍ୟ କେତେକ ନିୟମ ଆଧାରରେ ନିର୍ବାଚନ ଆୟୋଗ ଏପ୍ରିଲ ୧୬ ତାରିଖ ସନ୍ଧ୍ୟା ୬ଟାରୁ ଆଗାମୀ ୪୮ ଘଣ୍ଟା ଯାଏଁ ସୁରଜେଓ୍ବାଲାଙ୍କ ନିର୍ବାଚନୀ ପ୍ରଚାର ଉପରେ ରୋକ ଲଗାଇଛନ୍ତି । ଏହି ଅବଧି ମଧ୍ୟରେ ସେ କୌଣସି ବୈଠକ, ସଭା ସମିତି , ରାଲି, ରୋଡ ଶୋ ଏବଂ ମିଡିଆରେ ସାକ୍ଷାତକାର ଦେଇପାରିବେ ନାହିଁ । ଏପରିକି ସେ ସୋସିଆଲ ମିଡିଆରେ ମଧ୍ୟ କୌଣସି ପ୍ରକାର ପୋଷ୍ଟ କରିପାରିବେ ନାହିଁ ବୋଲି ଜଣାପଡ଼ିଛି ।
ମଥୁରା ଲୋକସଭା ଆସନରୁ ବିଜେପିର ପ୍ରାର୍ଥୀ ହେମା ମାଳିନୀଙ୍କ ଉପରେ ବିବାଦୀୟ ଟିପ୍ପଣୀ ଦେବା ପରେ ସୁରଜେଓ୍ବାଲାଙ୍କ ବିରୋଧରେ ଇସିଙ୍କ ଦ୍ବାରସ୍ଥ ହୋଇଥିଲା ବିଜେପି । ଏହା ପରେ ନିର୍ବାଚନ ଆୟୋଗ ସୁରଜେଓ୍ବାଲାଙ୍କୁ ନୋଟିସ କରି ଜବାବ ମାଗିଥିଲେ । ଏହି କାରଣ ଦର୍ଶାଅ ନୋଟିସରେ ବିଜେପି ନେତ୍ରୀଙ୍କ ଉଦ୍ଦେଶ୍ୟରେ କଂଗ୍ରେସ ନେତା କରିଥିବା ଟିପ୍ପଣୀକୁ ‘ଅଶୋଭନୀୟ, ଅଶ୍ଳୀଳ ଏବଂ ଅସଭ୍ୟ’ ବୋଲି ଦର୍ଶାଇଥିଲେ ନିର୍ବାଚନ ଆୟୋଗ ।
ସେପଟେ ରଣଦୀପ ସୁରଜେଓ୍ବାଲା କହିଥିଲେ ଯେ, ମୋର ଭିଡିଓକୁ ବିକୃତ କରି ଦେଖାଯାଇଛି । ପରେ ଏହି ଭିଡିଓକୁ ନେଇ ବିଜେପି ଅଭିଯୋଗ କରିଛି । ସୂଚନାଯୋଗ୍ୟ ଯେ, ୭୫ ବର୍ଷୀୟା ବଲିଉଡ ଅଭିନେତ୍ରୀ ତଥା ରାଜନେତ୍ରୀ ହେମା ମାଳିନୀ ପୁଣି ଥରେ ବିଜେପି ଟିକେଟରେ ନିର୍ବାଚନ ଲଢ଼ିବାକୁ ଯାଉଛନ୍ତି । ଦୁଇ ଥର ସାଂସଦ ହୋଇଥିବା ହେମା ମାଳିନୀଙ୍କୁ ବଲିଉଡରେ ଡ୍ରିମ୍ ଗର୍ଲ ନାଁରେ ମଧ୍ୟ ଜଣାଯାଏ ।
