ନୂଆଦିଲ୍ଲୀ,୩୧/୦୮: ହରିୟାଣା ବିଧାନସଭା ନିର୍ବାଚନର ତାରିଖ ବଦଳାଇଛନ୍ତି ନିର୍ବାଚନ ଆୟୋଗ। ବର୍ତ୍ତମାନ ଅକ୍ଟୋବର ୫ ତାରିଖରେ ହରିୟାଣାର ସମସ୍ତ ଆସନରେ ନିର୍ବାଚନ ଅନୁଷ୍ଠିତ ହେବ। ଭୋଟ ଗଣତି ଅକ୍ଟୋବର ୮ ତାରିଖରେ ହେବ। ବିଜେପି ଏବଂ ଇଣ୍ଡିଆନ ନାସନାଲ ଲୋକଦଳ ପ୍ରଥମେ ଏନେଇ ଦାବି କରିଥିଲା। ସୂଚନାଥାଉକି, ଜାମ୍ମୁ କାଶ୍ମୀରରେ ମଧ୍ୟ ଭୋଟ୍ ଗଣନା ଅକ୍ଟୋବର ୮ ତାରିଖରେ ହେବ। ଜାମ୍ମୁ କାଶ୍ମୀରରେ ମତଦାନ ତାରିଖରେ କୌଣସି ପରିବର୍ତ୍ତନ କରାଯାଇ ନାହିଁ। ଏହା ପୂର୍ବରୁ ସ୍ଥିର ହୋଇଥିବା ତିନୋଟି ପର୍ଯ୍ୟାୟର ତାରିଖରେ ମତଦାନ ହେବ। ସେପ୍ଟେମ୍ବର ୧୮ ରୁ ଜାମ୍ମୁ କାଶ୍ମୀରରେ ତିନୋଟି ପର୍ଯ୍ୟାୟରେ ମତଦାନ ଅନୁଷ୍ଠିତ ହେବ। ମୁଖ୍ୟ ନିର୍ବାଚନ କମିଶନର କହିଛନ୍ତି ଯେ ଜାମ୍ମୁ କାଶ୍ମୀରରେ ପ୍ରଥମ ପର୍ଯ୍ୟାୟ ଭୋଟ୍ ୧୮ ସେପ୍ଟେମ୍ବର, ଦ୍ୱିତୀୟ ପର୍ଯ୍ୟାୟ ୨୫ ସେପ୍ଟେମ୍ବର ଏବଂ ତୃତୀୟ ପର୍ଯ୍ୟାୟ ଅକ୍ଟୋବର ୧ ତାରିଖରେ ଅନୁଷ୍ଠିତ ହେବ।

କ'ଣ କହିଲେ ନିର୍ବାଚନ ଆୟୋଗ?

ନିର୍ବାଚନ ଆୟୋଗ କହିଛନ୍ତି ଯେ, ହରିୟାଣା ପାଇଁ ମତଦାନ ତାରିଖକୁ ୧ ଅକ୍ଟୋବରରୁ ୫ ଅକ୍ଟୋବର ୨୦୨୪କୁ ସଂଶୋଧନ କରାଯାଇଛି ଏବଂ ତଦନୁସାରେ ଜମ୍ମୁ-କାଶ୍ମୀର ଏବଂ ହରିୟାଣାରେ ବିଧାନସଭା ନିର୍ବାଚନ ପାଇଁ ମତଗଣନା ତାରିଖ ଅକ୍ଟୋବର ୪ ତାରିଖରୁ ଅକ୍ଟୋବର ୮ ତାରିଖକୁ ସଂଶୋଧନ କରାଯାଇଛି। ବିଷ୍ଣୋଇ ସମ୍ପ୍ରଦାୟର ମତଦାନ ଅଧିକାର ଓ ମରମ୍ପରା ଉଭୟକୁ ସମ୍ମାନ ଜଣାଇ ଏହି ନିର୍ଣ୍ଣୟ ନିଆଯାଇଛି। 

ହରିୟାଣା ବିଧାନସଭା ନିର୍ବାଚନ ପାଇଁ ଭୋଟ୍ ତାରିଖ (୦୧. ୧୦. ୨୦୨୪) ପୁନଃ ସ୍ଥିର କରିବାକୁ ନିର୍ବାଚନ ଆୟୋଗଙ୍କୁ ଅନୁରୋଧ କରିଥିଲେ ଅଖିଳ ଭାରତୀୟ ବିଷ୍ଣୋଇ ମହାସଭାର ରାଷ୍ଟୀୟ ଅଧ୍ୟକ୍ଷ। ସେ କହିଥିଲେ ଯେ, ପିଢ଼ି ପରେ ପିଢ଼ି ଆମେ ପଞ୍ଜାବ, ରାଜସ୍ଥାନ ଏବଂ ହରିୟାଣାର ଅନେକ ବିଷ୍ଣୋଇ ପରିବାର ପାଇଁ ଆସୋଜ୍ ଅମାବାସ୍ୟା ପର୍ବରେ ଅଂଶଗ୍ରହଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଚଳିତ ବର୍ଷ ଏହି ଉତ୍ସବ ଅକ୍ଟୋବର ୨ ରେ ଅନୁଷ୍ଠିତ ହେବ ଏବଂ ସିରସା, ଫତେହାବାଦ ଏବଂ ହିସାରରେ ରହୁଥିବା ହଜାର ହଜାର ବିଷ୍ଣୋଇ ପରିବାର ମତଦାନ ଦିନ ରାଜସ୍ଥାନ ଯାତ୍ରା କରିବେ, ଯାହା ଦ୍ବାରା ସେମାନଙ୍କୁ ଭୋଟ୍ ଦେବାରେ ଅସୁବିଧା ହେବ। ତେଣୁ ତମାମ କାର୍ଯ୍ୟକ୍ରମକୁ ନଜରରେ ରଖି ମତଦାନ ତାରିଖ ପୁନଃ ନିର୍ଦ୍ଧାରଣ କରିବରକୁ ନିର୍ବାଚନ କମିଶନଙ୍କୁ ଅନୁରୋଧ କରାଯାଇଥିଲା।