ନୂଆଦିଲ୍ଲୀ – ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଲାଞ୍ଚ ନେଇ ପ୍ରଶ୍ନ ପଚାରିବା ମାମଲାରେ ତୃଣମୂଳ କଂଗ୍ରେସ (ଟିଏମସି)ର ନେତା ମହୁଆ ମୋଇତ୍ରାଙ୍କ ବିରୋଧରେ ମନି ଲଣ୍ଡରିଂର ମାମଲା ରୁଜୁ କରିଛି। ମଙ୍ଗଳବାର ସୂତ୍ରାନୁସାରେ ଏହି ସୂଚନା ମିଳିଛି। ଉକ୍ତ ମାମଲା କେନ୍ଦ୍ରୀୟ ଯାଞ୍ଚ ବ୍ୟୁରୋ (ସିବିଆଇ) ଦ୍ୱାରା ରୁଜୁ କରାଯାଇ ଥିବା ଏଫଆଇଆର ଆଧାରରେ ରୁଜୁ କରାଯାଇଛି। ଏହା ପୂର୍ବରୁ ଇଡି ବିଦେଶୀ ମୁଦ୍ରା ପ୍ରବନ୍ଧନ ଅଧିନିୟମ (ଫେମା)ର ଉଲ୍ଲଙ୍ଘନ ମାମଲାରେ ପଚରାପଚରି ପାଇଁ ମୋଇତ୍ରା ଓ ଦୁବାଇରେ ରହୁଥିବା ବ୍ୟବସାୟୀ ଦର୍ଶନ ହୀରାନନ୍ଦାନୀଙ୍କୁ ନୂଆ ସମନ ଜାରି କରାଯାଇ ଥିଲା।
ହେଲେ ମହୁଆ ପ୍ରବର୍ତ୍ତନ ନିର୍ଦ୍ଦେଶାଳୟର ସମନକୁ ନଜର ଅନ୍ଦାଜ କରି ଗୁରୁବାର କୃଷ୍ଣାନଗର ଲୋକସଭା କ୍ଷେତ୍ରରେ ନିର୍ବାଚନ ପ୍ରଚାରରେ ବ୍ୟସ୍ତ ରହିଥିଲେ। ଟିଏମସିର ୪୯ ବର୍ଷିୟା ନେତ୍ରୀ ମହୁଆ ମୋଇତ୍ରାଙ୍କୁ କେନ୍ଦ୍ରୀୟ ଏଜେନ୍ସି ପୂର୍ବରୁ ମଧ୍ୟ ଦୁଇଥର ପଚରାପଚରି ପାଇଁ ଡକାଇ ଥିଲେ, କିନ୍ତୁ ସେ ଅଫିସିଆଲି କାମ ଥିବା ଦର୍ଶାଇ ଉପସ୍ଥିତ ହୋଇ ନଥିଲେ ଏବଂ ନୋଟିସ୍କୁ ସ୍ଥଗିତ କରିବାକୁ ଦାବି କରିଥିଲେ।
ମୋଇତ୍ରାଙ୍କୁ ଡିସେମ୍ୱରରେ ଅନୈତିକ ଆଚରଣ ପାଇଁ ଲୋକସଭାରୁ ବାହାର କରିଦିଆ ଯାଇଥିଲା। ତାଙ୍କୁ ତାଙ୍କର ପାର୍ଟି ଆଗାମୀ ଲୋକସଭା ନିର୍ବାଚନରେ ପଶ୍ଚିମବଙ୍ଗର କୃଷ୍ଣାନଗର ସିଟ୍ରୁ ପୁଣି ଥରେ ପ୍ରାର୍ଥୀ କରାଇଛି। କେନ୍ଦ୍ରୀୟ ଯାଞ୍ଚ ଏଜେନ୍ସି (ସିବିଆଇ) ଅର୍ଥ ନେଇପ୍ରଶ୍ନ ପଚାରିବା ସମ୍ୱନ୍ଧରେ ଶନିବାର ଟିଏମସି ନେତାଙ୍କ ଘରେ ଚଢଉ କରିଥିଲା।
ଏହାର କିଛିଦିନ ପୂର୍ବରୁ ଲୋକପାଳ ସିବିଆଇକୁ ବିଜେପି ସାଂସଦ ନିଶିକାନ୍ତ ଦୁବେଙ୍କ ଦ୍ୱାରା ମୋଇତ୍ରାଙ୍କ ବିରୋଧରେ ଲଗାଯାଇ ଥିବା ଅଭିଯୋଗର ଯାଞ୍ଚ କରିବାକୁ ନିର୍ଦ୍ଦେଶ ଦେଇଥିଲା। ମୋଇତ୍ରାଙ୍କ କହିବାନୁସାରେ ସେ କିଛି ବି ଭୁଲ କରି ନାହାନ୍ତି।
