ଦିଗପହଣ୍ଡି,୧୯/୦୯: ବାର୍ଦ୍ଧକ୍ୟ ଭତ୍ତା ଆଣିବାକୁ ଯାଇ କେନାଲରେ ଭାସିଗଲେ ବୃଦ୍ଧା । ଚୁଡଙ୍ଗପୁର ଗ୍ରାମ ଦେଈ ଯାଇଥିବା ଘୋଡ଼ାହାଡ କେନାଲରେ ଭାସି ଯାଇ ପ୍ରାଣ ହରାଇଲେ ବୃଦ୍ଧା । ବୃଦ୍ଧା ଜଣକ ଚୁଡଙ୍ଗପୁର ଗ୍ରାମର ଏମ୍ ଅରାଲୁ ପାତ୍ର ବୋଲି ଜଣା ପଡ଼ିଛି । ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅନ୍ତର୍ଗତ ସାନଖେମୁଣ୍ଡି ଚୁଡଙ୍ଗପୁର ଗାଁରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ବୃଦ୍ଧା ଜଣକ ତାଙ୍କର ବାର୍ଦ୍ଧକ୍ୟ ଭତ୍ତା ଆଣିବାକୁ ଯାଇଥିଲେ । ଯିବା ବେଳେ ଭାରସାମ୍ୟ ହରାଇ ଚୁଡଙ୍ଗପୁର ଗ୍ରାମ ଦେଇ ଯାଇଥିବା ଘୋଡ଼ାହାଡ କେନାଲରେ ପଡ଼ି ଭାସି ଯାଇଥିଲେ ବୃଦ୍ଧା । ଏହା ଦେଖି ସ୍ଥାନୀୟଲୋକେ ତୁରନ୍ତ ଅଗ୍ନିଶମ ବାହୀନି ଏବଂ ପୋଲିସକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗର କର୍ମଚାରୀ ଏବଂ ପୋଲିସ ଘଟଣାସ୍ଥଳରେ ପହଞ୍ଚିଥିଲେ । ନିଖୋଜ ବୃଦ୍ଧାଙ୍କୁ ସାରା ରାତି ଖୋଜାଖୋଜି କରି ୧୦ ଘଣ୍ଟା ପରେ ତାଙ୍କ ମୃତଦେହ ଉଦ୍ଧାର କରିଥିଲେ । ମୃତଦେହ ଉଦ୍ଧାର କରି ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରେ ମୃତଦେହକୁ ବ୍ୟବଚ୍ଛେଦ ପାଇଁ ବ୍ରହ୍ମପୁର ମେଡିକାଲ ପଠାଇଥିଲା ପୋଲିସ । ଏହା ସହ ଘଟଣାସ୍ଥଳରେ ଉପସ୍ଥିତ ରହି ଘଟଣାର ତଦନ୍ତ ଚଳାଇଛି ପୋଲିସ ।