ଖୋର୍ଦ୍ଧା,୩୧/୫ : ବୁଥରେ ଇଭିଏମ୍ ଭଙ୍ଗାରୁଜା ମାମଲାରେ ବାହୁବଳୀ ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଜାମିନ ଆବେଦନ ଖାରଜ । ଜାମିନ ଖାରଜ କଲେ ଦ୍ବିତୀୟ ଅତିରିକ୍ତ ଜିଲ୍ଲା ଦୌରାଜଜ୍ । ଏ ନେଇ ସୂଚନା ଦେଇଛନ୍ତି ପ୍ରଶାନ୍ତଙ୍କ ଓକିଲ ପ୍ରଭାତ ଦାସ।
ସୂଚନାଯୋଗ୍ୟ ଯେ, ଗତ ଶନିବାର ବୋଲଗଡ଼ ବ୍ଲକ ବଡକୁମାରୀ ପଞ୍ଚାୟତ କାଉଁରୀପାଟଣାସ୍ଥିତ ୧୧୪ନଂ. ବୁଥ୍କୁ ମତଦାନ କରିବାକୁ ଯାଇଥିଲେ ଜଗଦ୍ଦେବ । ଏହି ସମୟରେ କୌଣସି କାରଣରୁ ଉତ୍ତେଜିତ ହୋଇ ସେ ଇଭିଏମ୍ ଭଙ୍ଗାରୁଜା କରିଥିବା ଅଭିଯୋଗ ହୋଇଥିଲା । ସାଂସଦ ଅପରାଜିତା ଷଡ଼ଙ୍ଗୀଙ୍କ କାର୍ରେ ଫେରୁଥିବାବେଳେ ବେଗୁନିଆ ନିକଟରୁ ପୁଲିସ୍ ତାଙ୍କୁ ଉଠାଇ ନେଇଥିଲା । ପ୍ରିଜାଇଡିଂ ଅଧିକାରୀ ଜ୍ଞାନରଞ୍ଜନ ତ୍ରିପାଠୀଙ୍କ ଅଭିଯୋଗ କ୍ରମେ ପୁଲିସ ତାଙ୍କ ବିରୋଧରେ ଏକ ମାମଲା (ନଂ. ୧୧୭/୨୪) ରୁଜୁ କରିଥିଲା । ସରକାରୀ କାର୍ଯ୍ୟରେ ବାଧା ଦେବା, ମହିଳାଙ୍କୁ ଅସଦାଚରଣ କରିବା ଭଳି ବିଭିନ୍ନ ଦଫା ତାଙ୍କ ବିରୋଧରେ ଲାଗିଛି । ପ୍ରଶାନ୍ତଙ୍କ ପକ୍ଷରୁ ହାଇକୋର୍ଟ ଓକିଲ ପିତାମ୍ବର ଆଚାର୍ଯ୍ୟ ଏବଂ ସରକାରୀ ଓକିଲ ରଜନୀ ପଟ୍ଟନାୟକ ଯୁକ୍ତି ବାଢିଥିଲେ। ଉଭୟ ପକ୍ଷଙ୍କ ଯୁକ୍ତି ଶୁଣିବା ପରେ କୋର୍ଟ ତାଙ୍କ ଜାମିନ ଖାରଜ କରିଥିବା ସରକାରୀ ଓକିଲ ରଜନୀ ପଟ୍ଟନାୟକ କହିଛନ୍ତି।
