ନୂଆଦିଲ୍ଲୀ, ୩।୯: ସାଧାରଣତଃ ଫ୍ୟାସନ୍ ଶୋ ପାଇଁ ସ୍ୱତନ୍ତ୍ର ମଞ୍ଚ ପ୍ରସ୍ତୁତ କରାଯାଏ । ଶୋ’ ରେ ଭାଗ ନେଉଥିବା ପ୍ରତିଯୋଗୀ ବିଭିନ୍ନ ବେଶଭୂଷା ପିନ୍ଧି କ୍ୟାଟ୍ୱାକ୍ କରିଥାନ୍ତି । ଏବେ ଏହି ଆଧାରରେ ପରିବର୍ତ୍ତନ ଆସିଛି । ଷ୍ଟେଜ୍ ବଦଳରେ ଚଳନ୍ତା ମେଟ୍ରୋ ଟ୍ରେନ୍ରେ ଆୟୋଜିତ ହୋଇଛି ଫ୍ୟାସନ୍ ଶୋ । ନିକଟରେ ମହାରାଷ୍ଟ୍ରର ନାଗପୁରରେ ଏକ ଚଳନ୍ତା ମେଟ୍ରୋ ମଧ୍ୟରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା । ଚଳନ୍ତା ମେଟ୍ରୋରେ ମଡେଲ୍ମାନେ କ୍ୱାଟ୍ୱାକ୍ କରିଥିଲେ । ମଡେଲ୍ମାନଙ୍କୁ ଦେଖି ମେଟ୍ରୋରେ ଥିବା ଯାତ୍ରୀ ଚକିତ ହୋଇଯାଇଥିଲେ ।
ତେବେ ମେଟ୍ରୋରେ ଅଧିକାଂଶ ରବିବାର ଛୁଟିଦିନରେ ଅଧିକ ଭିଡ଼ ଲାଗିରହିଥାଏ । ତେଣୁ ଏହି ଦିନ ଫ୍ୟାସନ୍ ଶୋ ଆୟୋଜନ କରାଯିବାକୁ ନିଷ୍ପତ୍ତି ନିଆଯାଇଥିଲା । ଏହି ଫ୍ୟାସନ୍ ଶୋରେ ଭାଗ ନେଇଥିବା ପ୍ରତିଯୋଗୀ ବିଭିନ୍ନ ଡିଜାଇନ୍ର ପୋଷାକ ପିନ୍ଧିଥିଲେ କ୍ୟାଟ୍ୱାକ୍ କରିଥିଲେ । ଏହି ପୋଷାକ ବିଭିନ୍ନ ଫ୍ୟାସନ୍ ସଂସ୍ଥାଗୁଡ଼ିକର ଯୁବ ଡିଜାଇନରମାନଙ୍କ ଦ୍ୱାରା ଡିଜାଇନ୍ କରାଯାଇଥିଲା । ତେବେ ଏଥିରେ ଭାଗ ନେବା ପାଇଁ କୌଣସି ନିର୍ଦ୍ଦିଷ୍ଟ ସମୟ ସୀମା ନଥିଲା । ୨ ବର୍ଷରୁ ଆରମ୍ଭ କରି ୫୦ ବର୍ଷର ମହିଳା ଏଥିରେ ଭାଗ ନେଇଥିଲେ ।
ଏହି ଫ୍ୟାସନ୍ ଶୋର ନାଁଥିଲା ସେଲିବ୍ରେସନ୍ ଅନ୍ ହ୍ୱିଲ୍ । ନାଗପୁର ମେଟ୍ରୋ ଏହି କାର୍ଯ୍ୟକ୍ରମର ଆୟୋଜନ କରେ । ଏଥିପାଇଁ ଅନେକ ସଙ୍ଗଠନ, ଗ୍ରୁପ୍ କିମ୍ୱା ବ୍ୟକ୍ତିବିଶେଷ କିଛି ଟଙ୍କା ପୈଠ କରନ୍ତି ଓ ମେଟ୍ରୋରେ ବିଭିନ୍ନ ଉତ୍ସବ କିମ୍ୱା କାର୍ଯ୍ୟକ୍ରମର ଆୟୋଜନ କରିଥାନ୍ତି । ଚଳନ୍ତା ମେଟ୍ରୋରେ ଏହି ଫ୍ୟାସନ୍ ଶୋ’ ର କିଛି ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଥିଲା । ଦୁଇଟି ଲାଇନ୍ରେ ଏହି ଫ୍ୟାସନ୍ ଶୋ’ ଚାଲୁଥିବା ବେଳେ ମେଟ୍ରୋର ସିଟ୍ରେ ବସିଥିବା ଯାତ୍ରୀମାନେ ମଡେଲଙ୍କୁ ଉତ୍ସାହିତ କରିବାକୁ ତାଳି ମାରିଥିଲେ ।
