ବୌଦ୍ଧ,୦୭/୦୮: ତିନି ଦିନ ଧରି ଲଗାଣ ବର୍ଷାରେ ବେହାଲ ହୋଇଛି ସମଗ୍ର ବୌଦ୍ଧ ଜିଲ୍ଲା । ଲଗାଣ ବର୍ଷାରେ ଭୁସୁଡ଼ିଲା ମହାନଦୀର ବନ୍ୟା ନିରୋଧକ ପାଚେରୀ । ସୃଷ୍ଟି ହେଲା ୪୦ ଫୁଟର ବିରାଟ ଘାଇ । ଫଳରେ ସହର ମୁହାଁ ହେବାକୁ ଯାଉଛି ମହାନଦୀର ବନ୍ୟାଜଳ । 

ସୂଚନା ଅନୁଯାୟୀ, ବିଗତ ଦିନରେ ଲାଗି ରହିଥିବା ବର୍ଷା କାରଣରୁ ବେହାଲ ହୋଇଛି ସାରା ଓଡ଼ିଶା । ଏଥିରୁ ବୌଦ୍ଧ ଜିଲ୍ଲା ମଧ୍ୟ ବାଦ୍ ପଡ଼ିନାହିଁ  । ତିନି ଦିନ ଧରି ହୋଇଥିବା ତୁହାକୁ ତୁହା ବର୍ଷାରେ ଅସ୍ତବ୍ୟସ୍ତ ହୋଇପଡ଼ିଛି ଜନଜୀବନ । ସେପଟେ ଲଗାଣ ବର୍ଷାରେ ମହାନଦୀର ବନ୍ୟା ନିରୋଧକ ପାଚେରୀ ଭୁସୁଡ଼ି ପଡ଼ିଛି । ଯାହା ଫଳରେ କେନ୍ଦ୍ରୀୟ ବିଦ୍ୟାଳୟ ନିକଟରେ ଏକ ୪୦ ଫୁଟର ବିରାଟ ଘାଇ ସୃଷ୍ଟି ହୋଇଛି । ଏହି ଘାଇ ଯୋଗୁଁ ମହାନଦୀର ବନ୍ୟାଜଳ ସହର ମୁହାଁ ହେବାକୁ ଯାଉଛି । ଏଥିସହିତ ହଜାର ହଜାର ହେକ୍ଟର ଚାଷଜମି ଜଳମଗ୍ନ ହୋଇଥିବା ବେଳେ ବୌଦ୍ଧରେ ସର୍ବାଧିକ ୧୧୦ ମିମି ବର୍ଷା ରେକର୍ଡ କରାଯାଇଛି । ମହାନଦୀ ଜଳସ୍ତର ବିପଦ ସଂକେତ ତଳେ ପ୍ରବାହିତ ହେଉଛି । ଆଗକୁ ଯଦି ଏପରି ବର୍ଷା ଜାରି ରହେ, ତେବେ ସ୍ଥିତି ସଙ୍ଗୀନ ହେବାର ଆଶଙ୍କା କରାଯାଉଛି ।  

ଅନ୍ୟପଟେ ବିଭିନ୍ନ ସ୍ଥାନ ପରିଦର୍ଶନ କରିବାକୁ ସମସ୍ତ ତହସିଲଦାର ଏବଂ ବିଡ଼ିଓଙ୍କୁ ନିର୍ଦ୍ଦେଶ ଦିଆଯାଇଛି । ଏଥି ସହିତ ସମସ୍ତ ଅଧିକାରୀଙ୍କୁ ଆଲର୍ଟ ରହିବା ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ତଳି ଅଞ୍ଚଳରେ ଥିବା ଲୋକଙ୍କୁ ଉଚ୍ଚ ସ୍ଥାନକୁ ସ୍ଥାନନ୍ତରିତ କରାଯିବା ନେଇ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି କରାଯାଇଛି । ବନ୍ୟା ଜଳ ପଶିଥିବା ସ୍ଥାନରେ ପ୍ରଶାସନ ପକ୍ଷରୁ ରନ୍ଧା ଖାଦ୍ୟ ଯୋଗାଇ ଦିଆଯାଇଛି।