ଭୁବନେଶ୍ୱର,୨୭/୦୨: ବିଦେଶିନୀଙ୍କୁ ଅସଦାଚରଣ ମାମଲାର ସପ୍ତାହେ ଭିତରେ ବିଚାର ପକ୍ରିୟା ଆରମ୍ଭ ହୋଇଛି । ଖୁବ୍କମ୍ ଦିନରେ ମାମଲାର ଚାର୍ଜସିଟ୍ ଦାଖଲ ହୋଇଛି । ଯାହାକି, କମିଶନରେଟ୍ ପୁଲିସ ଇତିହାସରେ ବିରଳ ଓ ଭୁବନେଶ୍ୱର ନ୍ୟାୟିକ ବ୍ୟବସ୍ଥାରେ ପ୍ରଥମ ।
ଶ୍ରୀଲିଙ୍ଗରାଜ ଥାନା ପୁଲିସ ୩୫/୨୦୨୪ରେ ମାମଲା ରୁଜୁ କରି ଅଭିଯୁକ୍ତ କୁନ୍ଦନ ମହାପାତ୍ର ବିରୋଧରେ ଆଇପିସି ଦଫା ୩୪୧, ୩୫୪, ୩୫୪(ଏ) ଲଗାଇଥିଲା । କୁନ୍ଦନକୁ ଗିରଫ କରାଯିବାର ୪ ଦିନ ପରେ ଅର୍ଥାତ୍ ୨୩ ତାରିଖରେ ପୁଲିସ ମାମଲାର ଚାର୍ଜସିଟ୍ ଅଦାଲତରେ ଦାଖଲ କରିଥିଲା । ସପ୍ତାହେ ପରେ ଅର୍ଥାତ୍ ସୋମବାର ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତରେ ମାମଲାର ଶୁଣାଣି ଆରମ୍ଭ ହୋଇଛି । ଶୁଣାଣି ବେଳେ ସରକାରୀ ଓକିଲ (ପିପି) ବିଜୟ କୁମାର ବାରିକ୍ ପୀଡିତା ତଥା ସ୍ୱିଡେନ୍ର ଯୁବତୀଙ୍କ ସାକ୍ଷ୍ୟ ଗ୍ରହଣ କରିଛନ୍ତି । ପୀଡିତାଜଣକ ଶ୍ରୀଲିଙ୍ଗରାଜ ମନ୍ଦିର ଓ ବାହାରେ ହୋଇଥିବା ଅସଦାଚରଣର କାହାଣୀ ଗୋଟି ଗୋଟି କରି ବିଚାରପତିଙ୍କ ସାମ୍ନାରେ ବଖାଣିଥିଲେ । ପ୍ରତିପକ୍ଷ ଓକିଲ ଶୁଣାଣି ବେଳେ ପୀଡିତାଙ୍କୁ ନାନା ପ୍ରଶ୍ନ ପଚାରିଥିଲେ । ଅନ୍ୟ ସାକ୍ଷ୍ୟମାନଙ୍କ ବୟାନ ରେକର୍ଡ ଲାଗି ଆଉ ଏକ ତାରିଖ ଧାର୍ଯ୍ୟ କରାଯାଇଛି ।
ସରକାରୀ ଓକିଲ ଶ୍ରୀ ବାରିକ୍ କହିଛନ୍ତି, ବିଦେଶିନୀଙ୍କୁ ଅସଦାଚରଣ ଏକ ସମ୍ବେଦନଶୀଳ ଘଟଣା । ଏହାର ତ୍ୱରିତ ନ୍ୟାୟିକ ପ୍ରକ୍ରିୟା ଦରକାର ଥିଲା । ସପ୍ତାହେ ଭିତରେ ଶୁଣାଣି ଆରମ୍ଭ ଓଡିଶା ନ୍ୟାୟିକ ଇତିହାସର ଏକ ବିରଳତମ ଘଟଣା । ତ୍ୱରିତ ତଦନ୍ତ ଓ ଚାର୍ଜସିଟ୍ ଦାଖଲ ପାଇଁ କମିଶନରେଟ୍ ପୁଲିସକୁ ସାବାସୀ ।
ସୂଚନାଯୋଗ୍ୟ, ସ୍ୱିଡେନ୍ରୁ ଆସିଥିବା ଯୁବତୀଜଣକ ହେଉଛନ୍ତି ଆର୍କିଓଲୋଜି ବିଭାଗର ଛାତ୍ରୀ । ସେ ଭୁବନେଶ୍ୱରର ବିଭିନ୍ନ ମନ୍ଦିର ବିଷୟରେ ଗବେଷଣା ପାଇଁ ଆସିଥିଲେ । ଗତ ୨୦ ତାରିଖରେ ଅଭିଯୁକ୍ତ କୁନ୍ଦନ ତାଙ୍କୁ ଶ୍ରୀଲିଙ୍ଗରାଜ ମନ୍ଦିର ବୁଲାଇବା ବାହାନା ଦେଖାଇ ଅସଦାଚରଣ କରିଥିଲା ।
