ପ୍ୟାରିସ, ୧୦/୦୬: ପୂର୍ବରୁ ଟପ୍‌ ସିଡ୍‌ ଖେଳାଳିମାନେ ଧରାସାୟୀ ହେବା ପରେ ଫ୍ରେଞ୍ଚ୍‌ ଓପନ ଫାଇନାଲରେ ମୁହାଁମୁହିଁ  ହୋଇଥିଲେ କାର୍ଲୋସ ଅଲକାରାଜ ଏବଂ ଆଲେକଜାଣ୍ଡର ଭେରେଭ । ଶେଷରେ ୫ ସେଟର ଲଢ଼େଇରେ ଅଲକାରାଜ  ୬-୩, ୨-୬, ୫-୭, ୬-୧,  ୬-୨ରେ ବିଜୟୀ ହୋଇ ଜିତିଥିଲେ କ୍ୟାରିୟରରେ ପ୍ରଥମ ଫ୍ରେଞ୍ଚ୍‌ ଓପନ ଟାଇଟଲ ।  

ବିଶ୍ୱର ୩ ନମ୍ବର ଖେଳାଳି ସ୍ପେନର ଅଲକାରାଜ ଏବଂ ୪ ନମ୍ବର  ଖେଳାଳି ଜର୍ମାନୀର ଭେରେଭ ଫ୍ରେଞ୍ଚ  ଓପନରେ ପ୍ରଥମ ଟାଇଟଲ ଜିତିବା  ନେଇ କୋର୍ଟକୁ ଓହ୍ଲାଇଥିଲେ । ବେଶ  ସଂଘର୍ଷପୂର୍ଣ୍ଣ ଥିଲା ଫାଇନାଲ ଲଢ଼େଇ । ୪  ଘଣ୍ଟା ୧୯ ମିନିଟ ଧରି ଚାଲିଥିଲା ମ୍ୟାଚ୍‌ ।  

ଯୁବ ତାରକା ଅଲକାରାଜ କ୍ୟାରିୟରରେ ତୃତୀୟ ଏବଂ ଭେରେଭ  ପ୍ରଥମ ଗ୍ରାଣ୍ଡ୍‌ସ୍ଲାମ ଜିତିବା ନେଇ ନିଜ  ନିଜର ସମସ୍ତ ଶକ୍ତି ଓ ରଣନୀତି ପ୍ରୟୋଗ  କରିଥିଲେ । ପ୍ରଥମ ସେଟ୍‌ରେ ଅଲକାରାଜ  ୬-୩ରେ ଅଗ୍ରଣୀ ହେବା ପରେ ଚମତ୍କାର  ପ୍ରତ୍ୟାବର୍ତ୍ତନ ସହ ଦ୍ୱିତୀୟ ସେଟ୍‌କୁ ୬-୨ରେ  କବ୍‌ଜା କରିଥିଲେ ଭେରେଭ ।  

ତୃତୀୟ ସେଟ୍‌ରେ (୭-୫)  ମଧ୍ୟ ନିଜର ଦବଦବା ଜାହିର  କରିଥିଲେ । ଚତୁର୍ଥ ସେଟ୍‌ରେ  ପୁଣି ଚମକପୂର୍ଣ୍ଣ ପ୍ରତ୍ୟାବର୍ତ୍ତନ  ସହ ଅଲକାରାଜ ଏକତରଫା ଭାବେ  ୬-୧ରେ ଜିତି ନେଇଥିଲେ । ପଞ୍ଚମ ସେଟ୍‌ରେ  ମଧ୍ୟ ସେ ନିଖୁଣ ଖେଳ ପ୍ରଦର୍ଶନ କରି  ଭେରେଭଙ୍କୁ କୌଣସି ସୁଯୋଗ ଦେଇନଥିଲେ ।  

ମାତ୍ର ୨୧ ବର୍ଷ ବୟସରେ ଅଲକାରାଜ ତୃତୀୟ ଗ୍ରାଣ୍ଡସ୍ଲାମ ଜିତିବାରେ ସଫଳ ହୋଇଛନ୍ତି । ପୂର୍ବରୁ ସେ ୨୦୨୨ରେ  ୟୁଏସ୍‌ ଓପନ ଏବଂ ୨୦୨୩ରେ ୱିମ୍ବଲଡନରେ ଚାମ୍ପିଅନ ହୋଇଥିଲେ।