ବ୍ରହ୍ମପୁର,୧୦/୦୫: ଗଞ୍ଜାମ ଜିଲ୍ଲାର ୫ ହାଇପ୍ରୋଫାଇଲ ପ୍ରାର୍ଥୀ ନିର୍ବାଚନ ମଇଦାନରେ ଅବତୀର୍ଣ୍ଣ ହୋଇଛନ୍ତି । ବ୍ରହ୍ମପୁର, ଗୋପାଳପୁର, ଦିଗପହଣ୍ଡି, ଭଞ୍ଜନଗର ଓ ସାନଖେମୁଣ୍ଡି ବିଧାନସଭା ଆସନରେ ଏସବୁ ହେଭିୱେଟ୍ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ । ବ୍ରହ୍ମପୁର ଆସନରୁ ବିଜେଡି ପ୍ରାର୍ଥୀ ଡା. ରମେଶଚନ୍ଦ୍ର ଚ୍ୟାଉପଟ୍ଟନାୟକ, ଗୋପାଳପୁର ଆସନରୁ ବିଜେଡିର ବିକ୍ରମ ପଣ୍ଡା, ଦିଗପହଣ୍ଡି ଆସନରୁ ବିଜେପି ପ୍ରାର୍ଥୀ ସିଦ୍ଧାନ୍ତ ମହାପାତ୍ର, ଭଞ୍ଜନଗର ଆସନରୁ ବିଜେଡି ପ୍ରାର୍ଥୀ ବିକ୍ରମ କେଶରୀ ଆରୁଖ ଓ ସାନଖେମୁଣ୍ଡି ଆସନରୁ କଂଗ୍ରେସ ପ୍ରାର୍ଥୀ ରମେଶ ଚନ୍ଦ୍ର ଜେନା । ଏହି ସମସ୍ତ ପ୍ରାର୍ଥୀ ରାଜନୀତିରେ ଲମ୍ବା କ୍ୟାରିୟର ଅତିକ୍ରମ କରିଛନ୍ତି । ଚଳିତ ଥର ସେମାନଙ୍କ ବିଜୟ କିମ୍ବା ପରାଜୟ ଭବିଷ୍ୟତ ଗତିପଥ ନିର୍ଦ୍ଧାରଣ କରିବା ସମ୍ଭାବନା ରହିଛି ।
ବ୍ରହ୍ମପୁର ବିଧାନସଭା ଆସନରୁ ବିଜେଡିର ୫ ଥରର ବିଧାୟକ ଡା. ରମେଶଚନ୍ଦ୍ର ଚ୍ୟାଉପଟ୍ଟନାୟକ ୫ ବର୍ଷ ବ୍ୟବଧାନରେ ପୁଣି ମଇଦାନକୁ ଓହ୍ଲାଇଛନ୍ତି । ତାଙ୍କୁ ମୁକାବିଲା କରିବାକୁ ମଇଦାନରେ ଠିଆ ହୋଇଛନ୍ତି ବିଜେପିର ନବାଗତ କେ. ଅନୀଲ କୁମାର । ତେଣୁ ଡା. ଚ୍ୟାଉପଟ୍ଟନାୟକଙ୍କ ଏହି ନିର୍ବାଚନ ଭବିଷ୍ୟତ ରାଜନୀତି କ୍ୟାରିୟରକୁ ପ୍ରଭାବିତ କରିବ ବୋଲି ଅନେକ ଆକଳନ କରିଛନ୍ତି । ଗୋପାଳପୁର ବିଧାନସଭା ଆସନ ଏବେ ରାଜ୍ୟ ରାଜନୀତି ଲେନ୍ସରେ ରହିଛି । ବ୍ରହ୍ମପୁର ବିଧାୟକ ବିକ୍ରମ ପଣ୍ଡାଙ୍କୁ ଗୋପାଳପୁରରୁ ବିଜେଡି ପ୍ରାର୍ଥୀ କରିଛି ।
ଗୋପାଳପୁର ଆସନର ୩ ଥର ଲଗାତାର ବିଧାୟକ ହୋଇଥିବା ପ୍ରଦୀପ ପାଣିଗ୍ରାହି ଦଳରୁ ବହିଷ୍କୃତ ହେବା ପରେ ବ୍ରହ୍ମପୁର ସଂସଦୀୟ କ୍ଷେତ୍ରରୁ ବିଜେପି ପ୍ରାର୍ଥୀ । ଗୋପାଳପୁର ଆସନରେ ବିଜେପି ବିଭୂତି ଜେନାଙ୍କ ଉପରେ ପୁଣି ଆସ୍ଥା ପ୍ରକଟ କରିଛି । ସେ ବିଜୟୀ ହେଲେ ତାଙ୍କର ରାଜନୈତିକ ପତିଆରା ଅକ୍ଷୁର୍ଣ୍ଣ ରହିବ । ଦିଗପହଣ୍ଡି ଆସନରେ ବିଜେପିରୁ ପ୍ରାର୍ଥୀ ହୋଇଛନ୍ତି ଓଲିଉଡ୍ ସୁପରଷ୍ଟାର ସିଦ୍ଧାନ୍ତ ମହାପାତ୍ର । ସେ ବ୍ରହ୍ମପୁର ଲୋକସଭା ଆସନରୁ ୨ ଥର ସାଂସଦ । ତାଙ୍କ ବିପକ୍ଷରେ ନିର୍ବାଚନ ଲଢ଼ୁଛନ୍ତି ୬ ଥରର ବିଧାୟକ ତଥା ଦିବଙ୍ଗତ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ରଙ୍କ ପୁଅ ବିପ୍ଲବ ପାତ୍ର । ରାଜନୀତିକୁ ନବାଗତ । ତେବେ ବିଜେପି ପ୍ରାର୍ଥୀ ସିଦ୍ଧାନ୍ତ ମହାପାତ୍ର ଏଠାରେ କଡ଼ା ମୁକାବିଲାର ସମ୍ମୁଖୀନ ହୋଇଛନ୍ତି ।
ଗଞ୍ଜାମ ଜିଲ୍ଲାର ବରିଷ୍ଠ ନେତା ବିକ୍ରମ କେଶରୀ ଆରୁଖ ସପ୍ତମ ଥର ପାଇଁ ଭଞ୍ଜନଗର ବିଧାନସଭା ନିର୍ବାଚନମଣ୍ଡଳୀରୁ ବିଜେଡି ପ୍ରାର୍ଥୀ ହୋଇଛନ୍ତି । ତାଙ୍କୁ କଡ଼ା ଚାଲେଞ୍ଜ ଦେଉଛନ୍ତି ବିଜେପିର ପ୍ରଦ୍ୟୁମ୍ନ ନାୟକ । ଗତଥର ବିକ୍ରମ ପ୍ରାୟ ୯ ହଜାର ଭୋଟରେ ବିଜୟୀ ହୋଇଥିଲେ । ପ୍ରତି ନିର୍ବାଚନରେ ତାଙ୍କର ଭୋଟ ହାର ହ୍ରାସ ପାଇଥିବା ଜଣାପଡ଼ିଛି । ଚଳିତ ନିର୍ବାଚନରେ ଏଭଳି ସ୍ଥିତି ଲାଗି ରହିଲେ ବିଜେଡି ପାଇଁ କଡ଼ା ଚାଲେଞ୍ଜ ହେବା ଆଶଙ୍କା ରହିଛି ।
ସାନଖେମୁଣ୍ଡି ଆସନରେ କଂଗ୍ରେସ ପ୍ରାର୍ଥୀ ରମେଶ ଜେନା ୨୦୦୯ ଓ ୨୦୧୯ରେ ସେ ଦୁଇ ଥରର ବିଧାୟକ ନିର୍ବାଚିତ ହୋଇଥିଲେ । ଚଳିତ ନିର୍ବାଚନରେ ସେ ଚତୁର୍ଥ ଥର ଭାଗ୍ୟ ପରୀକ୍ଷା କରୁଛନ୍ତି । ଗଞ୍ଜାମ ଜିଲ୍ଲାର ଏକମାତ୍ର ଆସନରେ କଂଗ୍ରେସର ପତିଆରା ରହିଥିବାରୁ ସେ ରାଜ୍ୟ ରାଜନୀତିରେ ଚର୍ଚ୍ଚାରେ ରହିଛନ୍ତି । ଜିଲ୍ଲା କଂଗ୍ରେସର ପୂର୍ବତନ ସଭାପତି ରମେଶ ଜେନାଙ୍କୁ ଏଥର କଡ଼ା ପ୍ରତିଦ୍ୱନ୍ଦ୍ୱିତାର ସମ୍ମୁଖୀନ ହେବାକୁ ପଡ଼ିଛି । ପୂର୍ବ ବିଧାୟିକା ନନ୍ଦିନୀ ଦେବୀଙ୍କ ଝିଅ ସୁଲକ୍ଷଣା ଗୀତାଞ୍ଜଳି ଦେବୀଙ୍କୁ ଏଥର ବିଜେଡି ପ୍ରାର୍ଥୀ କରିଛି ।