ଭୁବନେଶ୍ୱର,୦୪/୧୧: ଭୁବନେଶ୍ୱରରେ ଅଦା କିଲୋ ପିଛା ପାଇକାରୀ ଦର  ୧୧୦ ଟଙ୍କା ରହିଛି । ତେବେ ଖୁଚୁରା ବ୍ୟବସାୟୀମାନେ ଏହାକୁ ୨୦୦ ଟଙ୍କା କିମ୍ବା ଏହାଠାରୁ ଅଧିକ ମୂଲ୍ୟରେ ବିକ୍ରି କରୁଛନ୍ତି । ଦରରେ ତାଳମେଳ ରହୁନାହିଁ । ଖୁଚୁରା  ବ୍ୟବସାୟୀ ଅଦା ପାଇଁ ଚଢ଼ା ଦର ନେଉଛନ୍ତି । ଯାହାକୁ ନେଇ ଖାଉଟିଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।  

ସ୍ଥାନୀୟ ରସୁଲଗଡ଼ର ଶିଶିର ପଟ୍ଟନାୟକ  କହିଛନ୍ତି, କେବଳ ଅଦା ନୁହେଁ ପରିବା ମଧ୍ୟ ଚଢ଼ାରେ  ବିକୁଛନ୍ତି ବ୍ୟବସାୟୀ । ସବୁ ଲୋକ ୧ ନମ୍ବର ହାଟ ଯିବା  ସମ୍ଭବ ନୁହେଁ । ବାଧ୍ୟ ହୋଇ ବେପାରୀ ଯାହା କହୁଛନ୍ତି  ସେହି ଦର ଦେଇ ନେବାକୁ ପଡୁଛି ।  ରାଜଧାନୀ କଞ୍ଚାପରିବା ବ୍ୟବସାୟୀ ସଂଘର  ସଭାପତି କବିରାଜ ସ୍ୱାଇଁ କହିଛନ୍ତି, ଶୁକ୍ରବାର ଅଦାର  ପାଇକାରୀ ଦର ୧୧୦ ଟଙ୍କା ରହିଛି । ତେବେ ଖୁଚୁରା  ବଜାରରେ ପ୍ରାୟ ୨୦୦ ଟଙ୍କା ଯାଏ ବିକ୍ରି ହେଉଛି । 

ପିଆଜ,  ଅଦା, ରସୁଣ ଏବଂ ବିନ୍ସ ବାଦ ଦେଲେ ୟୁନିଟ୍‌ ୧ ହାଟରେ  ଏବେ ଅଧିକାଂଶ ପରିବା ଦର ୪୦ରୁ ୫୦ ଟଙ୍କା ରହିଛି । ରସୁଲଗଡ଼ ଅଞ୍ଚଳରେ ଏବେ ଧନିଆପତ୍ର କିଲୋ  ପିଛା ଦର ୩୦୦ ଟଙ୍କା ରହିଛି । ସେହିଭଳି ଅଦା ଏବଂ  ରସୁଣ କିଲୋ ପିଛା ଦର ୨୦୦ ଟଙ୍କା ରହିଛି । ଏହାବାଦ୍‌  ବିନ୍ସ ୧୨୦ ଟଙ୍କା, ଟମାଟୋ ୪୦, ବାଇଗଣ ୪୦, ପୋଟଳ  ୬୦, ଭେଣ୍ଡି ୬୦, କଲରା ୮୦, ଜହ୍ନି ୮୦, ବନ୍ଧା କୋବି,  ଫୁଲକୋବି ୪୦, ଝୁଡଙ୍ଗ ୬୦, ପିଆଜ ୬୦ ଏବଂ ଆଳୁ  ୨୦ ଟଙ୍କାରେ ବିକ୍ରି ହେଉଛି । ଏବେ ନାସିକା ଓ ଅନ୍ୟ  ରାଜ୍ୟରୁ ଆବଶ୍ୟକ ମୁତାବକ ପିଆଜ ଆସିପାରୁନାହିଁ ।  ସେଥିପାଇଁ ଦର ଉଚ୍ଚା ରହୁଛି ।