ସିିମ୍‌ଲା,୦୭/୦୯: ହିମାଚଳ ପ୍ରଦେଶରେ ଗଞ୍ଜେଇ ଚାଷକୁ ଆଇନଗତ ଅନୁମତି ମିଳିବାକୁ ଯାଉଛି । ଏ ସଂକ୍ରାନ୍ତ ଏକ ବିଲ୍‌ ଶୁକ୍ରବାର ବିଧାନସଭାରେ ଗୃହୀତ ହୋଇଛି । ବିଧାନସଭା ଷ୍ଟାଣ୍ଡିଂ କମିଟି ରିପୋର୍ଟ ଆଧାରରେ ସରକାର ଏଭଳି ପଦକ୍ଷେପ  ନେଇଛନ୍ତି । ଔଷଧ ଓ ବ୍ୟବସାୟିକ ଉଦ୍ଦେଶ୍ୟରେ ଗଞ୍ଜେଇ ଚାଷ କରାଯିବା ଲାଗି କମିଟି ପ୍ରସ୍ତାବ ଦେଇଥିଲା । ତା’ଛଡା  ଗଞ୍ଜେଇ ଚାଷରୁ ଅର୍ଥନୀତି ସୁଧୁରିବ । 

କମିଟିର ଅଧ୍ୟକ୍ଷ ତଥା  ରାଜସ୍ୱ ମନ୍ତ୍ରୀ ଜଗତ ସିଂହ ନେଗି କହିଛନ୍ତି ଗଞ୍ଜେଇ ଚାଷକୁ  ଅନୁମତି ଦେବା ଲାଗି ବିଧାନସଭାରେ ଏକ ପ୍ରସ୍ତାବ ଆସିଥିଲା ।  ତାକୁ ସବୁ ସଦସ୍ୟ ସମର୍ଥନ କରିଥିଲେ । ତା’ଉପରେ  ଅନୁଧ୍ୟାନ କରିବା ଲାଗି କମିଟି ଗଠନ କରାଯାଇଥିଲା । କମିଟି  ସବୁ ଜିଲ୍ଲା ଗସ୍ତ କରି ସ୍ଥାନୀୟ ଲୋକଙ୍କ ସହ ଗଞ୍ଜେଇ  ଚାଷ ଉପରେ ଆଲୋଚନା କରିଥିଲା । 

ଏହି କ୍ଷେତ୍ରରେ  ଜମ୍ମୁ-କାଶ୍ମୀର, ଉତ୍ତରାଖଣ୍ଡ ଓ ମଧ୍ୟପ୍ରଦେଶ କିଭଳି ସଫଳ  ହୋଇଛନ୍ତି ତାହାର ଅନୁଧ୍ୟାନ କରାଯିବା ପରେ କମିଟି ତାର  ରିପୋର୍ଟ ଦେଇଥିଲା । ସେ କହିଛନ୍ତି ଗଞ୍ଜେଇ ଚାଷ ପାଇଁ  ଅଧିକ ପାଣି ଦରକାର ପଡିବ ନାହିଁ, ଏହାକୁ ବନ୍ୟପ୍ରାଣୀ ଖାଇ  ନଷ୍ଟ କରିପାରିବେ ନାହିଁ ଏବଂ ଏଥିରେ ରୋଗପୋକ ଲାଗିବେ  ନାହିଁ । ତେଣୁ ବ୍ୟବସାୟିକ ଓ ଔଷଧୀୟ ଉଦ୍ଦେଶ୍ୟରେ ଏହି  ଚାଷ ବେଶ୍‌ ଲାଭଦାୟକ ହୋଇପାରିବ ।