ନୂଆଦିଲ୍ଲୀ,୨୫/୦୨: ପଶ୍ଚିମବଙ୍ଗରେ ବହୁ ବାଦବିବାଦ ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଟିଏମ୍ସି ଓ କଂଗ୍ରେସ ମଧ୍ୟରେ ଇଣ୍ଡିଆ ମେଣ୍ଟ ଅଧୀନରେ ଆସନ ବୁଝାମଣା ଚୂଡାନ୍ତ ହୋଇଛି । ଉଭୟ ଦଳ ମଧ୍ୟରେ ହୋଇଥିବା ବୁଝାମଣା ଅନୁସାରେ କଂଗ୍ରେସ ପାଇଁ ୫ ଲୋକସଭା ଆସନ ଛାଡିଛନ୍ତି ଦିଦି (ମମତା) । ଏସବୁ ଆସନ ମଧ୍ୟରେ ରହିଛି ଦାର୍ଜିଲିଂ, ରାୟଗଞ୍ଜ, ଦକ୍ଷିଣ ମାଲ୍ଦା, ବହରମପୁର ଓ ପୁରୁଲିଆ । ଏଥିସହ ଉଭୟ ଦଳ ମଧ୍ୟରେ ମେଘାଳୟ ଓ ଆସାମ ପାଇଁ ମଧ୍ୟ ଆସନ ବୁଝାମଣା ଚୂଡାନ୍ତ ହୋଇଛି ।
ଟିଏମ୍ସିକୁ ମେଘାଳୟରେ ତୁରା ଆସନ ଦେବାକୁ କଂଗ୍ରେସ ରାଜି ହୋଇଛି । ଆସାମରେ ମଧ୍ୟ ଟିଏମ୍ସି ପାଇଁ ଗୋଟିଏ ଆସନ ଛାଡିବ କଂଗ୍ରେସ । ଏହା ପୂର୍ବରୁ କଂଗ୍ରେସ ନେତା ଜୟରାମ ରମେଶ କହିଥିଲେ ଟିଏମ୍ସି ସହିତ ଆସନ ବୁଝାମଣା ନେଇ ଆଲୋଚନା ଜାରି ରହିଛି । ମମତା କହିଆସୁଛନ୍ତି କି ବିଜେପିକୁ ହରାଇବାର ଆବଶ୍ୟକତା ରହିଛି । କଂଗ୍ରେସ ମଧ୍ୟ ଏହା ଚାହୁଁଛି । ହେଲେ ଏଥିପାଇଁ ଇଣ୍ଡିଆ ମେଣ୍ଟକୁ ମଜଭୁତ କରିବାକୁ ପଡିବ । ତେଣୁ ଖୁବଶୀଘ୍ର ଉଭୟ ଦଳ ମଧ୍ୟରେ ଆସନ ବୁଝାମଣା ଚୂଡାନ୍ତ ହେବ ।
ମମତା ପ୍ରଥମେ କହିଥିଲେ କଂଗ୍ରେସକୁ ୨ଟି ଆସନ ଦେବାକୁ ତାଙ୍କ ଦଳ ରାଜି । ମାତ୍ର ପରେ ଦୁଇଦଳ ଭିତରେ ଆସନ ବୁଝାମଣାକୁ ନେଇ ଦ୍ୱନ୍ଦ୍ୱ ସୃଷ୍ଟି ହେବାରୁ ମମତା ତାଙ୍କ ଦଳ ରାଜ୍ୟରେ ଏକାକୀ ନିର୍ବାଚନ ଲଢ଼ିବ ବୋଲି ଘୋଷଣା କରିଥିଲେ । ଏପରିକି ନିକଟରେ ଟିଏମ୍ସିର ବରିଷ୍ଠ ନେତା ତଥା ସାଂସଦ ଡେରେକ ଓ’ବ୍ରିଏନ କହିଥିଲେ କି ଦଳ ଏକାକି ଲଢ଼ିବା ଲାଗି ମୁଖ୍ୟମନ୍ତ୍ରୀ ଘୋଷଣା କରିସାରିଛନ୍ତି ମାନେ ଦଳ ଏକା ଲଢ଼ିବ । କୌଣସି ଦଳ ସହିତ ଆଉ ଟିଏମ୍ସିର ମେଣ୍ଟ କରାଯିବ ନାହିଁ ବୋଲି ସେ କହିଥିଲେ ।
