ପୁରୀ,୧୯/୦୯: ଭାଦ୍ରବ ପୂର୍ଣ୍ଣିମା ବୁଧବାର ଶ୍ରୀମନ୍ଦିରରେ ଇନ୍ଦ୍ର ଗୋବିନ୍ଦ ବନ୍ଦାପନା ନୀତି  ଅନୁଷ୍ଠିତ ହୋଇଛି । ଠାକୁରଙ୍କ ସନ୍ଧ୍ୟା ଆଳତି ସରିବା  ପରେ ଏହି ସ୍ୱତନ୍ତ୍ର ନୀତି ବଢିଥିଲା । ଶ୍ରୀବିଗ୍ରହଙ୍କ  ସନ୍ଧ୍ୟା ଆଳତି ବେଳେ ମହାପ୍ରଭୁଙ୍କୁ  ଆଜ୍ଞାମାଳ ଲାଗି ହୋଇଥିଲା । ଦକ୍ଷିଣ ଘର ଭୋଗ ସରିବା ପରେ ଶ୍ରୀଦୋଳଗୋବିନ୍ଦଙ୍କୁ  ମହାଜନମାନେ ସିଂହାସନରେ ବିଜେ  କରାଇଥିଲେ । ପୂଜାପଣ୍ଡା ସାଆନ୍ତ ଆଜ୍ଞାମାଳ  ଦେବା ପରେ ଶ୍ରୀଦୋଳଗୋବିନ୍ଦଙ୍କୁ ବଟମୂଳେ  ଥିବା ପାଲିଙ୍କିରେ ବିଜେ କରାଗଲା । ବିମାନବଡ଼ୁ  ସେବକମାନେ ଘଣ୍ଟଘଣ୍ଟା, କାହାଳୀ ସହ ପାଲିଙ୍କି ନେଇ ସିଂହଦ୍ୱାର ପାଶ୍ୱର୍ରେ ପହଞ୍ଚିଥିଲେ । ଠାକୁରଙ୍କୁ  ଶୀତଳ ଭୋଗ ଅର୍ପଣ ପରେ ଇନ୍ଦ୍ର, ଚନ୍ଦ୍ର ଓ  ଗୋବିନ୍ଦଙ୍କୁ ବନ୍ଦାପନା କରାଯାଇଥିଲା । ହରଚଣ୍ଡୀ  ସାହିରୁ ଇନ୍ଦ୍ର ହାତୀ ବାହାରି ସିଂହଦ୍ୱାରେ  ପହଞ୍ଚିଥିଲା । ଦୁଇଜଣ ବେଶଧାରୀ ଇନ୍ଦ୍ର  ଓ ଚନ୍ଦ୍ର ରହିଥାନ୍ତି । ସେଠାରେ ଇନ୍ଦ୍ର  ହାତୀ ପ୍ରସ୍ତାବ ହୋଇଥିଲା । ଏହାପରେ  ଶ୍ରୀଦୋଳଗୋବିନ୍ଦ ବଡ଼ଦେଉଳକୁ ବାହୁଡ଼ା ବିଜେ  କରିଥିଲେ । ଦର୍ଶନାର୍ଥୀମାନେ ଠାକୁରଙ୍କ ଏହି ଦିବ୍ୟ  ନୀତି ଦେଖିବାର ସୌଭାଗ୍ୟ ଲଭିଥିଲେ ।