ମୁମ୍ବାଇ,୨୮/୦୯: ଆଗାମୀ ଆଇପିଏଲ୍ରେ ମ୍ୟାଚ୍ ସଂଖ୍ୟା ବୃଦ୍ଧି ନକରିବାକୁ ନିଷ୍ପତ୍ତି ନିଆଯାଇଛି । ଖେଳାଳିଙ୍କ କାର୍ଯ୍ୟଭାରକୁ ନଜରରେ ରଖି ବିସିସିଆଇ ଏହି ନିଷ୍ପତ୍ତି ନେଇଛି । ଗତ ଆଇପିଏଲ୍ରେ ମୋଟ୍ ୭୪ଟି ମ୍ୟାଚ୍ ଖେଳାଯାଇଥିଲା । ମାତ୍ର ଆସନ୍ତା ସିଜନରେ ମ୍ୟାଚ୍ ସଂଖ୍ୟା ୮୪କୁ ବୃଦ୍ଧି କରିବାକୁ ଯୋଜନା ରହିଥିଲା । ୨୦୨୩ରୁ ୨୦୨୭ ସିଜନ ପାଇଁ ପ୍ରଦାନ କରାଯାଇଥିବା ପ୍ରସାରଣ ଅଧିକାର ସମ୍ବନ୍ଧୀୟ ଚୁକ୍ତିନାମାରେ ମ୍ୟାଚ ସଂଖ୍ୟା ବୃଦ୍ଧି ବିଷୟରେ ଉଲ୍ଲେଖ ରହିଛି । ୨୦୨୩ ଓ ୨୦୨୪ ସଜିନରେ ମ୍ୟାଚ୍ ସଂଖ୍ୟା ୭୪ରେ ସୀମିତ ରଖାଯିବ ।
୨୦୨୫ ଓ ୨୦୨୬ ସିଜନରେ ମ୍ୟାଚ୍ ସଂଖ୍ୟା ୮୪କୁ ବୃଦ୍ଧି କରାଯିବ ଓ ୨୦୨୭ ସଂସ୍କରଣରେ ମୋଟ୍ ୯୪ ମ୍ୟାଚ୍ ଖେଳାଯିବା ପାଇଁ ପ୍ରସାରଣ ଅଧିକାର ପ୍ରମାଣ ପତ୍ରରେ ଉଲ୍ଲେଖ କରାଯାଇଛି । ମାତ୍ର ଆସନ୍ତା ବର୍ଷ ଭାରତୀୟ କ୍ରିକେଟ୍ ଦଳର ବ୍ୟସ୍ତପୂର୍ଣ୍ଣ ସିଜନ ରହିଛି । ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ ପଏଣ୍ଟ ତାଲିକାରେ ଭରାତ ସମ୍ପ୍ରତି ଶୀର୍ଷରେ ରହି ଫାଇନାଲ୍ ପାଇଁ ପଥ ପ୍ରସ୍ତୁତ କରିଛି । ଜୁନ୍ ୧୧ ତାରିଖରେ ଲର୍ଡ୍ସ କ୍ରିକେଟ୍ ଗ୍ରାଉଣ୍ଡ୍ରେ ଫାଇନାଲ୍ ଖେଳାଯିବ । ଭାରତର ଫାଇନାଲ୍ ସୁଯୋଗ ରହିଥିବାରୁ ବିସିସିଆଇ ଏହା ପୂର୍ବରୁ ଖେଳାଳିମାନଙ୍କୁ ଆବଶ୍ୟକ ବିଶ୍ରାମ ଦେବାକୁ ଚାହୁଁଛି । ତେଣୁ ଆଇପିଏଲ୍ର ମ୍ୟାଚ୍ ସଂଖ୍ୟାକୁ ପୂର୍ବ ବର୍ଷ ଭଳି ଅପରିବର୍ତ୍ତିତ ରଖିବାକୁ ଚିନ୍ତା କରୁଥିବା ଜଣା ପଡ଼ିଛି ।
