ଜୟପୁର ୨୦/୦୯: ଜାତୀୟ ରାଜପଥ ୨୬ର ଜୟପୁର ଘାଟିରେ ଟନେଲ୍ ଖୋଳାଯିବା ଆଶା ଉଜ୍ଜ୍ୱଳ ହେବାରେ ଲାଗିଛି । ପ୍ରକଳ୍ପକୁ ୨୦୨୪-୨୫ ବାର୍ଷିକ ଯୋଜନା(ଆନୁଆଲ୍ ପ୍ଳାନ୍)ରେ ସାମିଲ କରାଯାଇଛି । ୬ ଲେନ୍ ବିଶିଷ୍ଟ ରାସ୍ତା ସହ ଟନେଲ୍ର ଡିପିଆର୍ ପ୍ରସ୍ତୁତି ଲାଗି ଜାତୀୟ ରାଜପଥ ବିଭାଗ ୪ କୋଟି ଟଙ୍କା ମଞ୍ଜୁର କରିଛି । ରିପୋର୍ଟ ଦାଖଲ ପରେ ପରବର୍ତ୍ତି ପଦକ୍ଷେପ ନିଆଯିବ ବୋଲି ଏନଏଚ୍ ନିର୍ବାହୀ ଯନ୍ତ୍ରୀ ରବୀନ୍ଦ୍ର କୁମାର ବେହେରା କହିଛନ୍ତି ।
ଶ୍ରୀ ବେହେରା କହିଛନ୍ତି, ୨୦୨୨-୨୩ ଡ୍ରାଫ୍ଟ ଆନୁଆଲ୍ ପ୍ଲାନ୍ରେ ଟନେଲ୍ ପ୍ରକଳ୍ପକୁ ସାମିଲ କରାଯାଇଥିଲା । କେନ୍ଦ୍ର ଜାତୀୟ ରାଜପଥ ବିଭାଗ ଦ୍ୱାରା ଏହାକୁ ଏଥରର ବାର୍ଷିକ ଯୋଜନାରେ ସାମିଲ କରାଯାଇଛି । ଗତ ଜୁଲାଇରେ ମଞ୍ଜୁର ହୋଇଛି ୪ କୋଟି ଟଙ୍କା । ଖୁବଶୀଘ୍ର ବିଭାଗ ପକ୍ଷରୁ ଟେଣ୍ଡର ଡକାଯିବ । ଅନୁଭୂତି ଥିବା କନସଲଟାନ୍ସିକୁ ଟନେଲ୍ ନିର୍ମାଣ ଡିପିଆର ପ୍ରସ୍ତୁତି ଲାଗି ଦାୟିତ୍ୱ ଦିଆଯିବ । ଏନଏଚ-୨୬ର ୩୪୫/୩୮୦ ରୁ ୩୫୧/୪୮୦ର ଲମ୍ବ ୬ କିମି । ଏହି ୬ କିମି ରାସ୍ତାର ଉପଯୋଗିତା, ସର୍ଭେ, ମାଟି ନମୁନା ପରୀକ୍ଷା, ସ୍କେଚ୍ମ୍ୟାପ୍, ସୁରକ୍ଷା, ଏଲିଭେସନ୍, ପ୍ରଭାବିତ ହେବାକୁ ଥିବା ଜଙ୍ଗଲ, ସାଧାରଣ ଜମି, ଜୀବଜନ୍ତୁ ସହ ଅନ୍ୟାନ୍ୟ ଆନୁସଙ୍ଗିକ କାର୍ଯ୍ୟ କରାଯିବ । ଟନେଲ୍ର ଲମ୍ବ, ଓସାର, ବାୟୁ ଚଳାଚଳ, ଆଲୋକୀକରଣ, ସିସିଟିଭି କ୍ୟାମେରା, ସାଉଣ୍ଡ ସିଷ୍ଟମ୍, ତାପମାତ୍ରା ସନ୍ତୁଳନ ବାବଦରେ ତଥ୍ୟ ସଂଗ୍ରହ ହେବ । ଡିପିଆର ପ୍ରସ୍ତୁତ ପରେ ଏହାକୁ ଭୁବନେଶ୍ୱର ଜାତୀୟ ରାଜପଥ ବିଭାଗ ଆଞ୍ଚଳିକ କାର୍ଯ୍ୟାଳୟରେ ଦାଖଲ କରାଯିବ । ପ୍ରଶାସନିକ ଅନୁମୋଦନ ପରେ ପ୍ରକଳ୍ପ କାମ ଆଗକୁ ବଢିବ ।
ସୂଚନାଥାଉକି, ୨୦୨୨ରେ ତତ୍କାଳୀନ ଏନଏଚ୍ ନିର୍ବାହୀ ଯନ୍ତ୍ରୀ କ୍ଷୀରଧର ଖଣ୍ଡପାଣି ଏହି ପ୍ରକଳ୍ପ ଲାଗି ପ୍ରାଥମିକ ନକ୍ସା ପ୍ରସ୍ତୁତ କରିଥିଲେ । ନକ୍ସା ଅନୁଯାୟୀ ପ୍ରସ୍ତାବିତ ଟନେଲ୍ ତଳ କୋଲାବ ଛକରୁ ଆରମ୍ଭ ହୋଇ ଦେଓଘାଟି ସ୍କୁଲ ନିକଟ ହନୁମାନ ମନ୍ଦିର ପର୍ଯ୍ୟନ୍ତ ହେବ । ଏହାର ଲମ୍ବ ୨ ରୁ ଅଢେଇ କିଲୋମିଟର ଏବଂ ଓସାର ୧୫୦ ଫୁଟ ରହିବ । ନିର୍ମାଣ ସରିଲେ କୋରାପୁଟକୁ ଦୂରତା କମିବ, ସମୟ ବଞ୍ଚିବ ଏବଂ ଯାତ୍ରୀଙ୍କ ଜୀବନ ସୁରକ୍ଷିତ ରହିବ । ଦୁର୍ଘଟଣା ଜନିତ ରାସ୍ତା ଜାମ୍ ଅସୁବିଧାରୁ ଜନସାଧାରଣ ରକ୍ଷା ପାଇବେ । ପର୍ଯ୍ୟଟନକୁ ସହାୟତା ମିଳିବ । ଘାଟି ଉପରେ ଗାଡ଼ି ଚଳାଚଳ କମିବା ଦ୍ୱାରା ଜଙ୍ଗଲ ଏବଂ ବନ୍ୟପ୍ରାଣୀ ସୁରକ୍ଷିତ ରହିବେ ।ଣ ସାମଗ୍ରୀ ଜମା ନକରିବାକୁ ପୌର ନିର୍ବାହୀ ଅଧିକାରୀ ଶ୍ରୀ ପଟ୍ଟନାୟକ ଜନସାଧାରଣଙ୍କୁ ଅପିଲ କରିଛନ୍ତି ।
