ନୂଆଦିଲ୍ଲୀ: ଗୁରୁବାର ଜାମ୍ମୁକାଶ୍ମୀରର ଲାଇନ୍ ଅଫ୍ କଣ୍ଟ୍ରୋଲ( LOC)ରେ ଆତଙ୍କବାଦୀଙ୍କ ଅନୁପ୍ରବେଶ ଉଦ୍ୟମକୁ ପଣ୍ଡ କରିଛି ଭାରତୀୟ ସେନା । ସୂଚନାନୁସାରେ, ଏହି ସମୟ ମଧ୍ୟରେ ସୁରକ୍ଷା ବାହିନୀ ଦୁଇଜଣ ଆତଙ୍କବାଦୀଙ୍କୁ ହତ୍ୟା କରିଛନ୍ତି । ଏହା ପରେ ସୁରକ୍ଷା ବାହିନୀ ଅନ୍ୟ ଆତଙ୍କବାଦୀଙ୍କୁ ଖୋଜିବା ପାଇଁ ସମଗ୍ର ଅଞ୍ଚଳରେ ସର୍ଚ୍ଚ ଅପରେସନ ଆରମ୍ଭ କରିଛନ୍ତି । ସର୍ଚ୍ଚ ଅପରେସନ୍ ସମୟରେ ଦୁଇଟି ପିସ୍ତଲ, ଗୁଳିଗୋଳା ଏବଂ ଯୁଦ୍ଧ ଭଳି ଅନ୍ୟାନ୍ୟ ସାମଗ୍ରୀ ଉଦ୍ଧାର କରାଯାଇଛି ।

ସୂଚନାଥାଉକି,ଯେ ମେ ମାସରେ ସୁରକ୍ଷା ବାହିନୀ ଆଉ ତିନି ଜଣ ଆତଙ୍କବାଦୀଙ୍କୁ ହତ୍ୟା କରିଥିଲେ। ଏହାପୂର୍ବରୁ ମେ ୯ ରେ ୪୦ ଘଣ୍ଟା ନଜର ରଖିବା ପରେ ସେନା ତିନି ଜଣ ଆତଙ୍କବାଦୀଙ୍କୁ ହତ୍ୟା କରିଥିଲା । 'ଅପରେସନ୍ ରେଡୱାନି ପାଇନ୍' ସମୟରେ ସୁରକ୍ଷା ବାହିନୀ ଏହି ଆତଙ୍କବାଦୀଙ୍କୁ ହତ୍ୟା କରିଥିଲେ । ଭାରତୀୟ ବାୟୁସେନା ଗାଡି ଉପରେ ଗୁଳି ଚଳାଇବା ପରେ ଏହି ଅପରେସନ ଆରମ୍ଭ କରାଯାଇଥିଲା, ଯେଉଁଥିରେ ଜଣେ ବରିଷ୍ଠ ବାୟୁସେନା ଅଧିକାରୀଙ୍କ ମୃତ୍ୟୁ ଘଟିଥିଲା।