ନୂଆଦିଲ୍ଲୀ,୨୬/୦୮: ସୋମବାର ଜାମ୍ମୁ କାଶ୍ମୀର ବିଧାନସଭା ନିର୍ବାଚନ ପାଇଁ ବିଜେପି ପ୍ରାର୍ଥୀଙ୍କ ଏକ ନୂତନ ତାଲିକା ପ୍ରକାଶ କରିଛି। ଏଥିରେ ପ୍ରଥମ ପର୍ଯ୍ୟାୟରେ ହେବାକୁ ଥିବା ନିର୍ବାଚନ ପାଇଁ ୧୫ ଜଣ ପ୍ରାର୍ଥୀଙ୍କୁ ଟିକେଟ୍ ଦିଆଯାଇଛି। ସକାଳେ ବିଜେପି ୪୪ ଜଣ ପ୍ରାର୍ଥୀଙ୍କ ତାଲିକା ପ୍ରକାଶ କରିଥିବା ବେଳେ ଏବେ ଏହି ନୂଆ ତାଲିକା ପ୍ରକାଶ ପାଇଛି। ତେବେ ପୂର୍ବ ତାଲିକାକୁ ମାତ୍ର ଦୁଇ ଘଣ୍ଟା ମଧ୍ୟରେ ପ୍ରତ୍ୟାହାର କରାଯାଇଥିଲା। ଏହା ପରେ ତାଲିକାରେ ଉନ୍ନତି ସହିତ ଏହାକୁ ପୁନଃ ପ୍ରକାଶ କରାଯିବ ବୋଲି କୁହାଯାଇଥିଲା।

ସୂଚନାଥାଉକି, ବିଜେପିର ପ୍ରଥମ ତାଲିକା ସକାଳ ପ୍ରାୟ ୧୦ ଟାରେ ପ୍ରକାଶ ପାଇଥିଲା, ପରେ ମଧ୍ୟାହ୍ନ ୧୨ ଟାରେ ଏହାକୁ ପ୍ରତ୍ୟାହାର କରିବାକୁ ନିଷ୍ପତ୍ତି ନିଆଯାଇଥିଲା। ପରିବର୍ତ୍ତନ ସହିତ ଏକ ନୂତନ ତାଲିକା ପ୍ରକାଶ କରିବା ବିଷୟରେ ଦଳ ପକ୍ଷରୁ ସୂଚନା ଦିଆଯାଇଥିଲା। ଏହିପରି ଭାବରେ ମାତ୍ର ୨ ଘଣ୍ଟା ମଧ୍ୟରେ ପୂର୍ବ ତାଲିକାକୁ ପ୍ରତ୍ୟାହାର କରାଯାଇଥିଲା। ପୂର୍ବ ତାଲିକା ପ୍ରତ୍ୟାହାର ହେବାର ପ୍ରାୟ ଅଧ ଘଣ୍ଟା ପରେ ଏକ ନୂତନ ତାଲିକା ପ୍ରକାଶ ପାଇଲା, ଯେଉଁଥିରେ ୧୫ ଜଣ ପ୍ରାର୍ଥୀଙ୍କ ନାଁ ରହିଛି। ପୂର୍ବରୁ ପ୍ରକାଶ ପାଇଥିବା ତାଲିକାରେ ତିନିଟି ପର୍ଯ୍ୟାୟ ପାଇଁ ୪୪ ଜଣ ପ୍ରାର୍ଥୀଙ୍କ ନାଁ ରହିଥିଲା। ନୂତନ ତାଲିକାରେ କେବଳ ପ୍ରଥମ ପର୍ଯ୍ୟାୟ ପାଇଁ ୧୫ ଜଣ ପ୍ରାର୍ଥୀଙ୍କ ନାଁ ରହିଛି।

୮ ମୁସଲମାନ ପ୍ରାର୍ଥୀଙ୍କୁ ଟିକେଟ ଦେଇଛି ବିଜେପି: 

ବିଜେପି ପକ୍ଷରୁ ପ୍ରକାଶ ପାଇଥିବା ୧୫ ଜଣିଆ ପ୍ରାର୍ଥୀଙ୍କ ନୂଆ ତାଲିକାରେ ୮ ଜଣ ମୁସଲମାନ ପ୍ରାର୍ଥୀଙ୍କୁ ମଧ୍ୟ ଟିକେଟ ଦିଆଯାଇଛି। ଯେଉଁଠାରେ ଏହି ମୁସଲିମ ପ୍ରାର୍ଥୀମାନେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି, ସେମାନେ କାଶ୍ମୀର ଉପତ୍ୟକାରେ ଥିବା ଆସନଗୁଡିକରେ ନିର୍ବାଚନ ଲଢ଼ିବେ। ଇଞ୍ଜିନିୟର ସୟଦ ଶୌକତ ମୟୂର ଆନ୍ଦ୍ରାବୀ, ଅରସିଦ ଭଟ୍ଟ, ଜାଭେଦ୍ ଅହମ୍ମଦ କାଦ୍ରି, ମହମ୍ମଦ ରଫିକ୍ ୱାନି, ଆଡଭୋକେଟ୍ ସୟଦ ୱାଜାହତ, ସୋଫି ୟୁସୁଫ୍, ତାରିକ୍ କିନ୍ ଏବଂ ସଲିମ ଭଟ୍ଟ୍‌ଙ୍କୁ ବିଭିନ୍ନ ଆସନରେ ଟିକେଟ ଦିଆଯାଇଛି।