ଭୁବନେଶ୍ୱର,୨୮/୦୮: ଆସାମରେ ଜାପାନିଜ୍‌ ଏନସେଫାଲାଇଟିସ୍ ରୋଗ ଦ୍ରୁତ ଗତିରେ ବୃଦ୍ଧି ପାଉଛି । ଚଳିତ ବର୍ଷର ଜୁନ୍ ଏବଂ ଜୁଲାଇ ମାସରେ ଏହି ରୋଗରେ ୪୨୪ ଜଣ ଆକ୍ରାନ୍ତ ହୋଇଥିବା ବେଳେ ତନ୍ମଧ୍ୟରୁ ୨୯ ଜଣଙ୍କର ମୃତ୍ୟୁ ହୋଇଛି । ଏହି ରୋଗ ମଶା କାମୁଡ଼ିବା ଦ୍ୱାରା ବ୍ୟାପିଥାଏ । ବିଶେଷକରି ଜୁଲାଇ ମାସରେ ଏହା ଦ୍ରୁତ ଗତିରେ ବୃଦ୍ଧି ପାଇଛି, ଯେଉଁ କାରଣରୁ ପରିସ୍ଥିତି ଚିନ୍ତାଜନକ ହୋଇପଡିଛି । ନିଜକୁ ମଶାଠାରୁ ରକ୍ଷା କରିବା ଏବଂ ସତର୍କତା ଅବଲମ୍ବନ କରିବାକୁ ରାଜ୍ୟ ସ୍ୱାସ୍ଥ୍ୟ ବିଭାଗ ଲୋକଙ୍କୁ ପରାମର୍ଶ ଦେଇଛନ୍ତି । 

ଜାପାନିଜ୍‌ ଏନସେଫାଲାଇଟିସ୍ କ’ଣ?

ଜାପାନିଜ ଏନସେଫାଲାଇଟିସ୍ ଏକ ବିପଦପୂର୍ଣ୍ଣ ରୋଗ ଯାହା ମଶା କାମୁଡ଼ିବା ଦ୍ୱାରା ବ୍ୟାପିଥାଏ | ଏହି ରୋଗ ଜାପାନର ଏନସେଫାଲାଇଟିସ୍ ଜୀବାଣୁ ଦ୍ୱାରା ହୋଇଥାଏ । ଏହି ରୋଗ ବର୍ତ୍ତମାନ ଏସିଆର ଅନେକ ସ୍ଥାନରେ ଦେଖିବାକୁ ମିଳୁଛି । ପ୍ରଥମେ ମଶାମାନେ ଏହି ଜୀବାଣୁ ଦ୍ୱାରା ସଂକ୍ରମିତ ହୋଇ ମଣିଷଙ୍କୁ କାମୁଡ଼ିଥାନ୍ତି ।  ପରେ ଏହି ଜୀବାଣୁ ମାନବ ଶରୀରରେ ପ୍ରବେଶ କରି ତାଙ୍କୁ ଅସୁସ୍ଥ କରିଥାଏ ।

ଏହି ରୋଗ କିପରି ବ୍ୟାପିଥାଏ?

ଜାପାନିଜ୍ ଏନସେଫାଲାଇଟିସ୍ ଜଣେ ବ୍ୟକ୍ତିଙ୍କଠାରୁ ଅନ୍ୟ ଜଣକୁ ସିଧାସଳଖ ବ୍ୟାପି ନଥାଏ । ଏହା ମଶା ମାନଙ୍କ ଦ୍ୱାରା ବ୍ୟାପିଥାଏ । ବିଶେଷକରି ଠିକ ଭାବରେ ଜଳ ନିଷ୍କାସନ ହେଉନଥିବା , ଚାଷଜମି କିମ୍ବା ଅପରିଷ୍କାର ଅଞ୍ଚଳରେ ଏହି ରୋଗ ଅଧିକ ବ୍ୟାପିଥାଏ । ଏହି ସ୍ଥାନମାନଙ୍କରେ ମଶା ଶୀଘ୍ର ପ୍ରଜନନ କରନ୍ତି, ଯେଉଁଥିପାଇଁ ଏହି ରୋଗର ଆଶଙ୍କା ବଢିଥାଏ ।

ଜାପାନିଜ୍‌ ଏନସେଫାଲାଇଟିସର ଲକ୍ଷଣ -

• ଜ୍ୱର: ହଠାତ୍ ଅତ୍ୟଧିକ ଜ୍ୱର ହେବା
• ମୁଣ୍ଡବିନ୍ଧା: ମୁଣ୍ଡରେ ପ୍ରବଳ ଯନ୍ତ୍ରଣା ଅନୁଭବ ହେବା
• ବାନ୍ତି: ବାରମ୍ବାର ବାନ୍ତି ହେବା

ଏହି ରୋଗର ଲକ୍ଷଣ ଆରମ୍ଭରେ ସାମାନ୍ୟ ହୋଇପାରେ, କିନ୍ତୁ କିଛି ଦିନ ମଧ୍ୟରେ ସେଗୁଡ଼ିକ ଭୟଙ୍କର ହୋଇପାରେ । ଏହା ଜାପାନିଜ୍ ଏନସେଫାଲାଇଟିସ ରୋଗକୁ ବଢାଇବା ସହିତ ଅନେକ ଗୁରୁତର ରୋଗକୁ ମଧ୍ୟ ନିମନ୍ତ୍ରଣ ଦେଇପାରେ । ଯାହା ଫଳରେ ରୋଗୀର ଜୀବନ ବିପଦରେ ପଡିପାରେ ।

ଜାପାନିଜ୍ ଏନସେଫାଲାଇଟିସକୁ କିପରି ରୋକିବା-

ମଶାଙ୍କଠାରୁ ବଞ୍ଚିବା ପାଇଁ  ଶୋଇବା ବେଳେ ମଶାରୀର ବ୍ୟବହାର କରନ୍ତୁ ଏବଂ ମଶା ଘଉଡାଇବା କ୍ରିମ୍ କିମ୍ବା ସ୍ପ୍ରେ ବ୍ୟବହାର କରନ୍ତୁ । ପରିଷ୍କାର ପରିଚ୍ଛନ୍ନତା ବଜାୟ ରଖନ୍ତୁ । ଘର ଚାରିପାଖରେ ଜଳ ଜମା ହେବାକୁ ଦିଅନ୍ତୁ ନାହିଁ ।  ଏହି ରୋଗକୁ ରୋକିବା ପାଇଁ ଟୀକାକରଣ ମଧ୍ୟ ଉପଲବ୍ଧ ରହିଛି । ବିଶେଷକରି ଏହି ରୋଗ ବ୍ୟାପିଥିବା ଅଞ୍ଚଳରେ ବାସ କରୁଥିବା ଲୋକମାନେ ଟୀକାକରଣ କରିବା ଉଚିତ୍ ।

ଜାପାନିଜ୍ ଏନସେଫାଲାଇଟିସ୍ ଏକ ଗୁରୁତର ରୋଗ, କିନ୍ତୁ ଉପଯୁକ୍ତ ସୂଚନା ଏବଂ ସତର୍କତା ଅବଲମ୍ବନ କରି ଏହାକୁ ଏଡାଇ ଦିଆଯାଇପାରିବ ।  ଯଦି ଆପଣ ଏହି ଲକ୍ଷଣଗୁଡିକ ଅନୁଭବ କରୁଛନ୍ତି ତେବେ ତୁରନ୍ତ ଡାକ୍ତରଙ୍କ ସହିତ ଯୋଗାଯୋଗ କରନ୍ତୁ । ମଶାଠାରୁ ଦୂରେଇ ରହିବା ସହ ପରିଷ୍କାର ପରିଚ୍ଛନ୍ନତାର ଯତ୍ନ ନେଇ ଆପଣ ନିଜକୁ ଏବଂ ଆପଣଙ୍କ ପରିବାରକୁ ଏହି ରୋଗରୁ ରକ୍ଷା କରିପାରିବେ।