ବାଲିପାଟଣା,୦୬/୦୫: ନିର୍ବାଚନ ପୂର୍ବରୁ ଭୁବନେଶ୍ୱର ସଂସଦୀୟ କ୍ଷେତ୍ର ଅନ୍ତର୍ଗତ ଜୟଦେବ ଆସନରେ ଏକ ରୋଚକ ସ୍ଥିତି ଦେଖିବାକୁ ମିଳିଛି । ଏଠାରେ ସ୍ୱାଧୀନ ପ୍ରାର୍ଥୀଙ୍କ ଭୋଟ୍ ନିର୍ଣ୍ଣାୟକ ହେବାକୁ ଯାଉଛି । ଯଦିଓ ବିଜୁ ଜନତା ଦଳ, ଭାରତୀୟ ଜନତା ପାର୍ଟି(ବିଜେପି), ଓ କଂଗ୍ରେସ ମଧ୍ୟରେ ଏବେ କଡ଼ା ଟକ୍କର ହେବାକୁ ଯାଉଛି, ତଥାପି ସ୍ୱାଧୀନ ପ୍ରାର୍ଥୀ ବି ଭୋଟ ହାତେଇବାକୁ ଲାଗିପଡିଛନ୍ତି । ତିନିଦଳ ତୁଳନାରେ ସ୍ୱାଧୀନ ପ୍ରାର୍ଥୀ ଘନଘନ ଭୋଟରଙ୍କ ପାଖକୁ ଯାଉଛନ୍ତି । ସ୍ୱାଧୀନ ଭାବରେ ପ୍ରତିଦ୍ୱନ୍ଦ୍ୱିତା କରୁଥିବା ସତ୍ୟପ୍ରିୟ ବେହେରା କର୍ମୀ ସମ୍ମିଳନୀ ଓ ପଦଯାତ୍ରା କରି ନିଜର ଲୋକପ୍ରିୟତା ବଢ଼ାଉଛନ୍ତି । ଯଦି ସେ ୨୦ ହଜାରରୁ ଅଧିକ ଭୋଟ ହାତେଇ ନିଅନ୍ତି, ତେବେ ତ୍ରିମୁଖୀ ପ୍ରତିଦ୍ୱନ୍ଦ୍ୱୀତା କରୁଥିବା ଦଳ ମାନଙ୍କର ସ୍ଥିତି ଟଳମଳ ହେବ ବୋଲି ରାଜନୈତିକ ସମୀକ୍ଷକମାନେ କୁହନ୍ତି ।
ଗୋଟିଏ ପଟେ ଭୋଟ୍ ପାଇଁ ବିଜେପି ଓ କଂଗ୍ରେସ ପକ୍ଷରୁ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଶେଷ ହୋଇଛି । ବିଗତ ବର୍ଷ ଅର୍ଥାତ୍ ୨୦୧୯ ସଧାରଣ ନିର୍ବାଚନରେ କଂଗ୍ରେସ ଦଳ ପକ୍ଷରୁ ଜୟଦେବରେ କୌଣସି ପାର୍ଥି ପ୍ରତିଦ୍ୱନ୍ଦ୍ୱୀତା କରି ନଥିଲେ । ଅନ୍ୟପଟେ ବିଧାୟକ ପ୍ରାର୍ଥୀ କୃଷ୍ଣଚନ୍ଦ୍ର ସଗରିଆ ଓ ସାଂସଦ ପ୍ରାର୍ଥୀ ୟାସିର ନୱାଜ୍ ଆସିବା ପରେ କଂଗ୍ରେସ ସୁଦୃଢ଼ ହେଉଥିବା ଚର୍ଚ୍ଚା ହେଉଛି । ଶ୍ରୀ ସଗରିଆ କୁହନ୍ତି ଆମେ ଜୟଦେବ ଭୋଟରଙ୍କ ମନଜିଣୁଛୁ ଓ ସେମାନଙ୍କ ମନରେ ଏକ ପରିବର୍ତ୍ତନର ହାୱା ସୃଷ୍ଟି କରିବାରେ ସଫଳ ହୋଇଛୁ । ଆମ ପୁରୁଣା ଭୋଟର ମାନଙ୍କୁ ଘର ବାହୁଡ଼ା କରିବା ପାଇଁ ସବୁସ୍ତରରେ ଚେଷ୍ଟା ଜାରିରହିଛି । ତତ୍ ସହିତ ଆମର ସାଂସଦ ପ୍ରାର୍ଥୀ ଶ୍ରୀ ନୱାଜ୍ ତାଙ୍କ ମୁସଲିମ ସମ୍ପ୍ରଦାୟର ଭୋଟରମାନଙ୍କୁ ସଂଗଠିତ କରୁଛନ୍ତି । ଜୟଦେବ ନିର୍ବାଚନ ମଣ୍ଡଳୀରେ ଥିବା ସମସ୍ତ ଦଳିତ ସଂଗଠନ ଏକତ୍ରିତ ହୋଇ ଜାତୀୟ କଂଗ୍ରେସ ଦଳକୁ ସମର୍ଥନ ଜଣାଇଛନ୍ତି ବୋଲି ସେ କହିଛନ୍ତି ।
ବିଜେପି ବିଧାୟକ ପ୍ରାର୍ଥୀ ଡଃ ଅରବିନ୍ଦ ଢ଼ାଲି ନିଜର ପୁରୁଣା ଫର୍ମୂଲା ଆପଣାଇବାକୁ ଯୋଜନା କରିଛନ୍ତି । ଏହାପୂର୍ବରୁ ସେ ବିଜେଡିରୁ ବିଧାୟକ ଥିଲେ । ହେଲେ ଚଳିତ ବର୍ଷ ନିର୍ବାଚନ ପୂର୍ବରୁ ସେ ବିଜେପିରେ ସାମିଲ ହୋଇଛନ୍ତି । ତେଣୁ ସେ ମଧ୍ୟ ସର୍ବାଧିକ ଭୋଟ ପାଇବାର ଆଶା ବାନ୍ଧିଛନ୍ତି । ସେ କହିଛନ୍ତି ଆମେ ପରିସ୍ଥିତିର ଫାଇଦା ଉଠାଇବା ଠିକ୍ ଭାବେ ଜାଣିଛୁ । କିଏ ଜିତିବ ଏହା ପୂର୍ବ ନିର୍ଦ୍ଧାରିତ, ତଥାପି ଆମେ ସଂଗ୍ରାମ ଜାରି ରଖିଛୁ । ଯଦି କଂଗ୍ରେସ,ବିଜେଡ଼ି, ଓ ବିଜେପି ମଧ୍ୟରେ ତ୍ରିମୁଖୀ ପ୍ରତଯୋଗିତା ହୁଏ, ବିଜେପି ହିଁ ଜିତିବ ବୋଲି ସେ ଦୃଢ଼ ଦାବି କରି କହିଛନ୍ତି । ଏପଟେ ବିଜେଡ଼ି ସାଂସଦ ପ୍ରାର୍ଥୀ ମନ୍ମଥ ରାଉତରାୟ ଓ ବିଧାୟକ ପ୍ରାର୍ଥୀ ନବ କିଶାର ମଲ୍ଲିକ ତାଙ୍କର ପ୍ରଚାର ଜୋରଦାର କରିଛନ୍ତି । ଆସନ୍ତା ସୋମବାର ପ୍ରାର୍ଥୀ ପତ୍ର ଦାଖଲ ପ୍ରକ୍ରିୟା ଶେଷ ହେବା ପରେ ଘରେ ଘରେ ଯୋଡ଼ି ଶଙ୍ଖ ପ୍ରଚାର ଜୋର ଧରିବ ।