କଟକ, ୨୪/୦୯: ଝାରସୁଗୁଡ଼ା ବିଧାନସଭା ନିର୍ବାଚନ ମାମଲାରେ ସୋମବାର ଜବାବ ଦାଖଲ କରିନପାରି ଅଦାଲତଙ୍କଠାରୁ ସମୟ ଲୋଡ଼ିଛନ୍ତି ବିଧାୟକ ଟଙ୍କଧର ତ୍ରିପାଠୀ । ମାମଲାର ଶୁଣାଣି ଅବସରରେ ବିଧାୟକ ଜବାବ ଦାଖଲ ପାଇଁ  ହାଇକୋର୍ଟଙ୍କଠାରୁ ୬ସପ୍ତାହ ସମୟ ଲୋଡ଼ିଥିଲେ । ଅଦାଲତ ମହଲତ ପ୍ରଦାନ  କରି ମାମଲାର ଶୁଣାଣି ଅକ୍ଟୋବର ୨୮ ତାରିଖକୁ ଧାର୍ଯ୍ୟ କରିଛନ୍ତି । ବିଜେଡିର ପରାଜିତ ପ୍ରାର୍ଥୀ ଦୀପାଳି ଦାସଙ୍କ ପକ୍ଷରୁ ଦାଏର ଏହି ମାମଲାର ଶୁଣାଣି କରି  ହାଇକୋର୍ଟର ବିଚାରପତି ଜଷ୍ଟିସ୍‌ ଶଶିକାନ୍ତ ମିଶ୍ର ଏହି ନିର୍ଦ୍ଦେଶ ଦେଇଛନ୍ତି ।  

ଆବେଦନକାରିଣୀ ଦୀପାଳି ଦାସ ଦାଖଲ କରିଥିବା ପିଟିସନ୍‌ରେ ଉଲ୍ଲେଖ  କରିଛନ୍ତି ଯେ, ଟଙ୍କଧର ତ୍ରିପାଠୀ ଯେଉଁ ସତ୍ୟପାଠ ଦାଖଲ କରିଥିଲେ ସେଥିରେ  ନିଜ ସମ୍ପର୍କରେ ଅନେକ ତଥ୍ୟ ଲୁଚାଇଛନ୍ତି । ସେହିପରି ନିଜର ସମ୍ପତ୍ତିକୁ ନେଇ  ମଧ୍ୟ ସେ ସବୁ ତଥ୍ୟ ଦେଇନହାନ୍ତି । ତେଣୁ ତାଙ୍କ ବିଧାନସଭା ସଦସ୍ୟତା ରଦ୍ଦ  କରିବା ସହ ସାନି ନିର୍ବାଚନ ପାଇଁ ନିର୍ଦ୍ଦେଶ ଦେବାକୁ ଆବେଦନକାରିଣୀ ପ୍ରାର୍ଥନା  କରିଛନ୍ତି । ଆବେଦନକାରିଣୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ବିଦ୍ୟାଧର ମିଶ୍ର ମାମଲା  ପରିଚାଳନା କରୁଥିଲାବେଳେ ଆଇନଜୀବୀ ତରଣୀକାନ୍ତ ବିଶ୍ୱାଳ ସହଯୋଗ କରୁଛନ୍ତି ।