ନୂଆଦିଲ୍ଲୀ ୦୭/୦୬: ଲୋକସଭା ନିର୍ବାଚନରେ ପ୍ରଥମ ଥର ପାଇଁ କଙ୍ଗନା ରାଣାୱତ ହିମାଚଳ ମଣ୍ଡି ଆସନରୁ ସଂସଦକୁ ନିର୍ବାଚିତ ହୋଇଥିବାବେଳେ ରାମ ବିଳାସ ପାଶୱାନଙ୍କ ପୁଅ ତଥା ଏଲ୍‌ଜେପି ନେତା ଚିରାଗ ପାଶୱାନ ୫୩.୩% ଭୋଟରେ ହାଜିପୁରରୁ ଜିତିଛନ୍ତି । ସେଲିବ୍ରିଟିରୁ ରାଜନେତା ହୋଇଥିବା ଏହି ଦୁଇଜଣ ଏବେ ସଂସଦରେ ପରସ୍ପରକୁ ପ୍ରଥମ ଥର ପାଇଁ ଭେଟିବେ । 

୨୦୧୧ରେ ଉଭୟେ ଫିଲ୍ମ ‘ମିଲେ ନା ମିଲେ ହମ୍‌’ କରିଥିଲେ । ଏଥିରେ କଙ୍ଗନା ଓ ଚିରାଗ ନାୟିକା ନାୟକ ଭୂମିକାରେ ଥିଲେ । ଏହି ଚଳଚ୍ଚିତ୍ର ଜରିଆରେ ଚିରାଗ ବଲିଉଡ୍‌ରେ ଡେବ୍ୟୁ କରିଥିଲେ । ତେବେ ଏହି ଫିଲ୍ମ ଫ୍ଲପ୍‌ ହେବା ପରେ ଚିରାଗ ସିନେଜଗତରୁ ଦୂରେଇ ଯାଇଥିଲେ ଏବଂ ବାପାଙ୍କ ସହ ରାଜନୀତି ଦୁନିଆରେ ପାଦ ରଖିଥିଲେ । ଏବେ ବିହାର ରାଜନୀତିରେ ଚିରାଗଙ୍କ ସ୍ୱତନ୍ତ୍ର ପରିଚୟ ରହିଛି । ତାଙ୍କ ଲୋକ ଜନଶକ୍ତି ପାର୍ଟି (ରାମ ବିଳାସ) ମୋଟ ୫ଟି ଆସନରେ ଲଢ଼ିଥିବାବେଳେ ସମସ୍ତ ଆସନ ଜିତିଛି । ତେବେ କଙ୍ଗନା ଦୀର୍ଘ ସମୟ ବଲିଉଡ୍‌ରେ ରହିଛନ୍ତି । ଅନେକ ସୁପରଷ୍ଟାରଙ୍କ ସହ ସେ କାମ କରିଛନ୍ତି । ବଲିଉଡ୍‌ରେ ସ୍ୱତନ୍ତ୍ର ପରିଚୟ ପରେ କଙ୍ଗନା ରାଜନୀତିରେ ପ୍ରବେଶ କରିଛନ୍ତି ।