କୋଲକାତା: ଆଇପିଏଲ ୨୦୨୪ର ୩୧ ତମ ମ୍ୟାଚ୍ରେ କୋଲକାତାର ଇଡେନ ଗାର୍ଡେନସ୍ରେ କେକେଆର ଏବଂ ରାଜସ୍ଥାନ ରୟାଲ୍ସ ମୁହାଁମୁହିଁ ହୋଇଛନ୍ତି । ଟସ୍ ହାରି ପ୍ରଥମେ ବ୍ୟାଟିଂ କରିଥିବା କେକେଆର ରନ୍ ବର୍ଷା କରିଛି । ନିର୍ଦ୍ଧାରିତ ଓଭରରେ ଦଳ ୬ ଓ୍ବିକେଟ ହରାଇ ୨୨୩ ରନ୍ କରିଛି । ଆଜିର ମ୍ୟାଚ୍ରେ ସୁନୀଲ ନାରାୟଣ ବିସ୍ଫୋରକ ବ୍ୟାଟିଂ କରିବା ସହ ୫୬ ବଲରୁ ୧୩ ଚୌକା ଏବଂ ୬ ଛକା ବଳରେ୧୦୯ ରନ୍ କରିଥିଲେ ।
ଫିଲିପ ସଲ୍ଟ (୧୦), ଅଙ୍ଗକ୍ରିସ ରଘୁବଂଶୀ (୩୦), ଶ୍ରେୟସ ଆୟର (୧୧), ଆଣ୍ଡ୍ରେ ରସେଲ (୧୩), ଭେଙ୍କଟେଶ ଆୟର (୮) ଏବଂ ରିଙ୍କୁ ସିଂଙ୍କ ଅପରାଜିତ ୨୦ ରନ୍ ଓ ରମଣଦୀପ ସିଂହ(୧)ଙ୍କ ବଳରେ ଦଳ ୨୨୩ ରନ୍ର ବିଶାଳ ସ୍କୋର କରିଛି । ରାଜସ୍ଥାନକୁ ୨୨୪ ରନ୍ ଟାର୍ଗେଟ ଦେଇଛି କେକେଆର ।
ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ରାଜସ୍ଥାନ ରୟାଲ୍ସ । ଆଭେଶ ଖାନ ଏବଂ କୁଲଦୀପ ସେନ ୨ଟି ଲେଖାଏଁ ଓ୍ବିକେଟ ନେଇଥିଲେ । ସେହିଭଳି ଟ୍ରେଣ୍ଟ ବୋଲ୍ଟ ଏବଂ ୟୁଜବେନ୍ଦ୍ର ଚହଲ ଗୋଟିଏ ଲେଖାଏଁ ଓ୍ବିକେଟ ନେଇଥିବା ବେଳେ ରବିଚନ୍ଦ୍ରନ ଅଶ୍ବିନ ୪୯ ରନ୍ ଦେଇଥିବା ସତ୍ତ୍ବେ ଗୋଟିଏ ବି ଓ୍ବିକେଟ ନେଇପାରିନଥିଲେ ।
