ମୁମ୍ବାଇ୧୨/୦୮: ବଲିଉଡର ସୁପ୍ରସିଦ୍ଧ ଗାୟକ କୁମାର ସାନୁ ଡିପ୍ଫେକ୍ ଭିଡିଓର ଶିକାର ହୋଇଛନ୍ତି । ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କ ପାଇଁ ସେ ସଙ୍ଗୀତ କାର୍ଯ୍ୟକ୍ରମ କରୁଥିବାର ଏକ ଭିଡିଓ ବିଭିନ୍ନ ସୋସିଆଲ ମିଡିଆରେ ଭାଇରାଲ ହୋଇଥିଲା । ଆଜି ଏହାକୁ ସେ ଖଣ୍ଡନ କରିଛନ୍ତି । ନିଜ ସୋସିଆଲ ମିଡିଆ ଏକ୍ସରେ ସେ ଏକଥା ସ୍ପଷ୍ଟ କରିଛନ୍ତି । କହିଛନ୍ତି ସେ ଇମ୍ରାନଙ୍କ ପାଇଁ କୌଣସି କାର୍ଯ୍ୟକ୍ରମ କରିନାହାନ୍ତି । ଯାହା ସୋସିଆଲ ମିଡିଆରେ ଭାଇରାଲ ହେଉଛି ତାହା ତାଙ୍କର ଡିପ୍ଫେକ୍ ଭିଡିଓ । କିଛି ଲୋକ ତାଙ୍କୁ ବଦନାମ କରିବା ଲାଗି ଏଭଳି ପନ୍ଥା ଗ୍ରହଣ କରିଛନ୍ତି । ଟୋକ୍ନୋଲୋଜିର ଅପବ୍ୟବହାର କରାଯାଇଛି । ଏହାକୁ ବିଶ୍ୱାସ ନ କରିବାକୁ ସେ ପ୍ରଶଂସକ ଓ ଶୁଭେଚ୍ଛୁମାନଙ୍କୁ ଅନୁରୋଧ କରିଛନ୍ତି ।
ଏଥିସହ ଘଟଣାର ତଦନ୍ତ କରି ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଭାରତ ସରକାରଙ୍କୁ ଅନୁରୋଧ କରିଛନ୍ତି । ସୋସିଆଲ ମିଡିଆରେ କୁମାର ସାନୁଙ୍କର ସଙ୍ଗୀତ କାର୍ଯ୍ୟକ୍ରମର ଯେଉଁ ଭିଡିଓ ଭାଇରାଲ ହେଉଛି ସେଥିରେ କୁହାଯାଇଛି କି ଇମ୍ରାନ ଜେଲ୍ରୁ ମୁକ୍ତ ହେବା ଖୁସିରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଛି । କିନ୍ତୁ ବାସ୍ତବରେ ଉକ୍ତ ଭିଡିଓ ହେଉଛି ଚଳିତବର୍ଷ ବ୍ରିସବେନ୍ରେ କୁମାର ସାନୁ କରିଥିବା ତାଙ୍କର ଏକ କାର୍ଯ୍ୟକ୍ରମର । ତାକୁ ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) ଟେକ୍ନୋଲୋଜି ମାଧ୍ୟମରେ ବଦଳାଯାଇଛି ।
