ନୂଆଦିଲ୍ଲୀ: ବିହାର ରାଜନୀତିରେ କ୍ଷମତା ସମୀକରଣରେ ପରିବର୍ତ୍ତନ ହେବାର ଆଶଙ୍କା ମଧ୍ୟରେ ଏବେ ଏକ ବଡ ଖବର ଆସୁଛି । ସୂତ୍ରରୁ ପ୍ରକାଶ ଯେ ଲାଲୁ ପ୍ରସାଦ ଯାଦବଙ୍କ ଦଳ (ଆରଜେଡି) ଜୀତନ ରାମ ମାଂଝିଙ୍କୁ ରାଜ୍ୟର ମୁଖ୍ୟମନ୍ତ୍ରୀ କରିବାକୁ ପ୍ରସ୍ତାବ ଦେଇଛି । ଜୀତନ ରାମ୍ ମାଂଝି ହେଉଛନ୍ତି ହାମ୍ (HAM) ର ନେତା ଏବଂ ତାଙ୍କ ଦଳର ବିଧାନସଭାରେ ଚାରିଜଣ ବିଧାୟକ ଥିବାବେଳେ ଆରଜେଡିରେ ସର୍ବାଧିକ ୭୯ ଜଣ ବିଧାୟକ ଅଛନ୍ତି । ଜୀତନ ରାମ ମାଂଝି ପୂର୍ବରୁ ବିହାରର ସିଏମ ମଧ୍ୟ ରହି ସାରିଛନ୍ତି । ନୀତୀଶ କୁମାର ତାଙ୍କୁ ସିଏମ୍ କରିଥିଲେ ଏବଂ ପରେ ତାଙ୍କୁ ହଟାଇ ଦେଇଥିଲେ । 

ଏହା ଉପରେ ହାମ ପାର୍ଟି ମୁଖପାତ୍ର ଡାନିଶ ରିଜୱାନ ଏକ ଜାତୀୟ ଗଣମାଧ୍ୟମ ସହ କଥାବାର୍ତ୍ତା ବେଳେ ସ୍ପଷ୍ଟ କରିଛନ୍ତି । ସେ କହିଛନ୍ତି ଯେ ଯଦିଓ ସେ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ଦିଅନ୍ତି, ତଥାପି ଆମେ ତାଙ୍କ ସହିତ ଯିବୁ ନାହିଁ । ଆମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ରହିଛୁ ଏବଂ ରହିବୁ । କିଛି ଘଣ୍ଟା ମଧ୍ୟରେ ବିହାରରେ ଏକ ବଡ ପରିବର୍ତ୍ତନ ହେବ ବୋଲି ସେ ଦାବି କରିଛନ୍ତି । ସେ କହିଛନ୍ତି ଯେ ଆମ ପାଇଁ ପଦବୀ ନୁହେଁ ବରଂ ବିହାରର ବିକାଶ ହିଁ ଗୁରୁତ୍ୱପୂର୍ଣ୍ଣ । ଆମେ ଏନଡିଏ ସହିତ ରହିଛୁ ଏବଂ ଆମର ବିଧାୟକମାନେ ମଧ୍ୟ ଏକାଠି ଅଛନ୍ତି । 

ସୂଚନାଥାଉକି, ବିହାର ବିଧାନସଭା ସଦସ୍ୟଙ୍କ ସଂଖ୍ୟା ୨୪୩ ଅଟେ । ୨୦୨୦ ନିର୍ବାଚନରେ ଆରଜେଡି ସର୍ବବୃହତ ଦଳ ଭାବେ ଉଭା ହୋଇ ୭୯ ଟି ଆସନ ଜିତିଥିବାବେଳେ ବିଜେପି ୭୮ ଜଣ ପ୍ରାର୍ଥୀ ଜିତି ଦ୍ୱିତୀୟ ସ୍ଥାନରେ ରହିଛନ୍ତି । ତୃତୀୟ ସ୍ଥାନରେ ବର୍ତ୍ତମାନର ଗ୍ରାଣ୍ଡ ଆଲାଇନ୍ସର ସହଯୋଗୀ ଜେଡିୟୁ ଅଛନ୍ତି, ଯାହାର ୪୫ ଜଣ ବିଧାୟକ ଅଛନ୍ତି । ଶାସକ ଦଳର ଅନ୍ୟ ଏକ ଅଂଶ ହେଉଛି କଂଗ୍ରେସ, ତେବେ ବିଧାନସଭାରେ ଏହାର ୧୯ ଜଣ ସଦସ୍ୟ ଅଛନ୍ତି । ଅନ୍ୟପକ୍ଷରେ ଅନ୍ୟାନ୍ୟ ଦଳରୁ ମଧ୍ୟ ବିଧାୟକ ରହିଛନ୍ତି ।