ନୂଆଦିଲ୍ଲୀ, ୦୩/୦୩: ବିଗତ ୩ ଦିନ ହେଲା ଜମ୍ମୁ-କାଶ୍ମୀରରେ ପ୍ରବଳ ବର୍ଷା ସହ ବରଫପାତ ହେଉଛି । ଫଳରେ ବିଭିନ୍ନ ସ୍ଥାନରେ ଭୂ-ସ୍ଖଳନ ହୋଇଛି । ଜମ୍ମୁର ଜନବସତି ଅଞ୍ଚଳରେ ଭୂ-ସ୍ଖଳନ ଯୋଗୁଁ ଏକ କଚ୍ଚ ଘର ଭୁଶୁଡ଼ି ଯାଇଛି । ଫଳରେ ଘରେ ରହୁଥିବା ୪ ଜଣଙ୍କ ମୃତ୍ୟୁ ହୋଇଛି । ମାଆ ସହ ଆଖି ବୁଜିଛନ୍ତି ୩ ଛୁଆ । ଘଟଣାରେ ୨ ଜଣ ଆହତ ହୋଇଥିବା ଜଣାପଡ଼ିଛି ।

ପ୍ରବଳ ବର୍ଷା ଓ ବରଫପାତ ଯୋଗୁଁ ଲଗାତାର ଦ୍ୱିତୀୟ ଦନ ବନ୍ଦ ରହିଛି ଜମ୍ମୁ-କାଶ୍ମୀର ଜାତୀୟ ରାଜପଥ । ରାମବନ ଜିଲ୍ଲାର ଢାଲବାସ ଅଞ୍ଚଳରେ ଭୂ-ସ୍ଖଳନ ଯୋଗୁଁ ଯାତାୟତ ବାଧାପ୍ରାପ୍ତ ହୋଇଛି । ମୁଗଲ ରୋଡରେ ଶନିବାର ୭ଟି ଟ୍ରକ୍ ଫସି ଯାଇଥିବା ବେଳେ ଉଦ୍ଧାର କରାଯାଇଥିଲା ।

ଅନ୍ୟପଟେ ଉତ୍ତରପ୍ରଦେଶରେ ପ୍ରକୃତିର ପ୍ରକୋପ ଦେଖିବାକୁ ମିଳିଛି । କାଳବୈଶାଖୀ ସହ ବଜ୍ରପାତ ଯୋଗୁଁ ମୈଦାନିରେ ୩ ଜଣ ପ୍ରାଣ ହରାଇଛନ୍ତି । ଝାନସୀରେ କୁଆପଥର ବର୍ଷା ହୋଇଛି । ବର୍ଷା ଘଡ଼ଘଡ଼ି ଲାଗି ଉତ୍ତରପ୍ରଦେଶର ୫୦ ଜିଲ୍ଲାକୁ ଆଲର୍ଟ ଜାରି କରିଛି ପାଣିପାଗ ବିଭାଗ ।

ସେପଟେ ମଧ୍ୟପ୍ରଦେଶର ଗୁନା, ଅଶୋକ ନଗର ଓ ଶିବପୁରୀ ସମତେ ଆଉ କେତେକ ଜିଲ୍ଲାରେ ଘଡ଼ଘଡ଼ି ସହ ବର୍ଷା ହୋଇଛି । କେତେକ ସ୍ଥାନରେ କୁଆପଥର ବର୍ଷା ବି ହୋଇଛି । ପଞ୍ଜାବ ଓ ହରିୟାଣାରେ ମଧ୍ୟ ବର୍ଷା ସହ କୁଆପଥର ମାଡ଼ ହୋଇଛି ।

ଘରୋଇ ପାଣିପାଗ ସଂସ୍ଥା ସ୍କାଏମେଟ୍ ଅନୁସାରେ, ଆସନ୍ତା ୨୪ ଘଣ୍ଟାରେ ଜମ୍ମୁ-କାଶ୍ମୀର, ଲଦାଖ, ହିମାଚଳ ପ୍ରଦେଶ ଓ ଉତ୍ତରାଖଣ୍ଡରେ ପ୍ରବଳ ବର୍ଷା ହୋଇପାରେ । ପଞ୍ଜାବ, ହରିୟାଣା, ଦିଲ୍ଲୀ ଓ ଉତ୍ତରପ୍ରଦେଶର କିଛି ଅଞ୍ଚଳରେ ମଧ୍ୟମଧରଣର ବର୍ଷା ସହ ବଜ୍ରପାତ ହେବା ନେଇ ପୂର୍ବାନୁମାନ କରାଯାଇଛି ।