ନୂଆଦିଲ୍ଲୀ: ଜାତୀୟ ତଦନ୍ତ ଏଜେନ୍ସି (ଏନଆଇଏ) ରାମେଶ୍ବରମ କାଫେ ବ୍ଲାଷ୍ଟ ମାମଲାରେ ଆଉ ଜଣେ ଅଭିଯୁକ୍ତକୁ ଗିରଫ କରିଛି । କାଫେ ବିସ୍ଫୋରଣ ମାମଲାରେ ୪ଟି ରାଜ୍ୟରେ ଚାଲିଥିବା ଚଢ଼ାଉରେ ସଫଳତା ପାଇଛି ଏନଆଇଏ । ଅଭିଯୁକ୍ତ ଲଶ୍କର-ଏ ତୋଇବାର ଆତଙ୍କବାଦୀ ବୋଲି ଜଣାପଡ଼ିଛି । ୩୫ ବର୍ଷୀୟ ଅଭିଯୁକ୍ତ ଶୋଏବ ଅହମ୍ମଦ ମିର୍ଜା ଓରଫ ଛୋଟୁ କର୍ଣ୍ଣାଟକର ହୁବଳି ସହରର ବାସିନ୍ଦା । ଏହି ମାମଲାର ସେ ପଞ୍ଚମ ଅଭିଯୁକ୍ତ । ସେ ଲଶ୍ମର ଏ ତୋଇବାର ଆତଙ୍କବାଦୀ ଷଡ଼ଯନ୍ତ୍ର ମାମଲାରେ ମଧ୍ୟ ଦୋଷୀ ।
ଏନଆଇଏ ତଦନ୍ତରୁ ଜଣାପଡ଼ିଛି ଯେ, ଶୋଏବ ମିର୍ଜା ଜେଲରୁ ବାହାରିବା ପରେ ନୂଆ ଷଡ଼ଯନ୍ତ୍ର ରଚିଥିଲା । ଅଭିଯୁକ୍ତ ମିର୍ଜା ୨-୧୮ରେ ମଥୀନ ତାହାକୁ ଜଣେ ଅନଲାଇନ୍ ହ୍ୟାଣ୍ଡଲର ସହ ସାକ୍ଷାତ କରାଇଥିଲା । ଏନକ୍ରିପ୍ଟେଡ ଚାଟ୍ ଲାଗି ତାକୁ ଏକ ଇମେଲ ଦେଇଥିଲା ମିର୍ଜା । ଅବ୍ଦୁଲ ମଥୀନ ତାହାକୁ ରାମେଶ୍ବରମ୍ କାଫେ ବ୍ଲାଷ୍ଟ ମାମଲାରେ ଏପ୍ରିଲ ୧୨ରେ ଗିରଫ କରିଥିଲା ଏନଆଇଏ । ମଥୀନ ତାହା ସମେତ ମୁସାବୀର ଶାଜିବ ମଧ୍ୟ ଗିରଫ ହୋଇଥିଲା ।
ଏନଆଇର ଟିମ୍ ମେ ୨୧ରେ ରାମେଶ୍ବର ବିସ୍ଫୋରଣ ମାମଲା ପଛର ସବୁ କାରଣ ଖୋଜିବା ଲାଗି ବିଭିନ୍ନ ରାଜ୍ୟରେ ଚଢ଼ାଉ କରିଥିଲା । ଏନଆଇଏ ଟିମ୍ କର୍ଣ୍ଣାଟକ, ତାମିଲନାଡୁ, ତେଲେଙ୍ଗାନା ଏବଂ ଆନ୍ଧ୍ରପ୍ରଦେଶରେ ୧୧ଟି ସ୍ଥାନରେ ଛାନଭିନ କରିଥିଲା । ବେଙ୍ଗାଲୁରୁର ବ୍ରୁକଫିଲ୍ଡରେ ଥିବା ରାମେଶ୍ବରମ କାଫେରେ ଆଇଇଡି ବିସ୍ଫୋରଣ ହୋଇଥିଲା । ଏଥିରେ ବହୁ ଗ୍ରାହକ ଏବଂ ଷ୍ଟାଫ ଆହତ ହୋଇଥିଲେ । ୧ ମାର୍ଚ୍ଚ ୨୦୨୪ରେ ରାମେଶ୍ବର କାଫେରେ ହୋଇଥିବା ବିସ୍ଫୋରଣ ମାମାଲାର ଯାଞ୍ଚ କରୁଛି ଏନଆଇଏ । ଆଉ ଏଥିପାଇଁ ଜାତୀୟ ତଦନ୍ତ ଏଜେନ୍ସି ଭାରତର ୨୯ ସ୍ଥାନରେ ଚଢ଼ାଉ କରିସାରିଛି ।